Read nande Matayo 19 Bible Online

Matayo 19 - nande bible

Matayo 19

¹Nĩkwa Yesu abere abibuga emyatsi eyĩ, mwalũa eGalĩlaya, mwaya omo kihugo kyʼeYũdea eyisirya wʼolũsĩ lwʼeYorodanĩ.

²Nʼesyondeko nene mosyamukwama, naye mwalamyabo eyo.

³Abandi Bafarĩsayo mobahĩka uku Yesu bakamulengako bati, Emigambo ĩkalĩga omundu akahiga mũkalĩwe busana nʼemyatsi mitya-mitya kwehĩ?

⁴Yesu mwasũbĩryabo ati, Simwetasoma amasako aya kwehĩ? Ati, Oyo wahangikabo erĩmbere mwahangikabo, omulume nʼomũkalĩ,

⁵ati, Busana nʼomwatsi oyũ, omundu asyasĩga ĩse wuwe na nyĩnya wuwe, inialanda uku mũkalĩ wuwe, nʼababiri basyabya mubiri muguma.

⁶Neryo litya sibakiri babiri, nĩkwa mubiri muguma. Neryo abo Nyamuhanga abiriamatanĩa haguma, Sihabye mundu oyukagabulabo.

⁷Neryo Abafarĩsayo mobamũbũlya bati, Busana nakĩ Musa mwategeka eriha omũkalĩ yʼebarua yʼerimukomola nʼerimuhiga kwehĩ?

⁸Yesu mwabwirabo ati, Musa mwabalĩgĩra erikomola abakalĩ benyũ busana nʼerikala lyʼemitima yenyũ; nĩkwa okwʼĩtsũka lyʼerihangika sibyabya bitya.

⁹Nage ngababwira nyiti, Omundundi oyukakomola omũkalĩ wuwe, bite busana nʼerĩsĩngĩra, akahĩkya ogundi mũkalĩ, iniakasĩngĩra, nʼoyũkahĩkaya omũkalĩ oyulyakomolawa akasĩngĩra nibya.

¹⁰Neryo abiga mobamũbũlya bati, Omwatsi wʼomulume nʼomũkalĩ amabya atya, siritolere erĩhĩkya.

¹¹Nĩkwa Yesu mwabwirabo ati, Abandu bosĩ sibetoka erĩrĩga ekĩnywa ekĩ, ba nʼabahabawakyo.

¹²Hali myatsi mĩsĩndo-mĩsĩndo eyikaleka abandu ibatatoka erĩhĩkya. Abandi kusangwa babutawa batya; abandi kusangwa bandu bayirabo batya; nʼabandi sĩbehĩkaya busana nʼobwami bwʼelubula. Oyukatoka erĩrĩga omwatsi oyũ alĩgego.

¹³Neryo abandi bandu mobaletera Yesu yʼabana balere bati, ahĩre kubo kwʼebyala biwe, nʼerisaba, nĩkwa abiga mobakunga abandu abo.

¹⁴Nĩkwa Yesu mwabũga ati, Muleke abana base kwĩngye. Sĩmũkakĩrayebo, kusangwa Obwami bwʼelubula ni bwʼabandu abali ngʼaba.

¹⁵Neryo Yesu abere abĩhĩra kubo kwʼebyala biwe, mwalũayo.

¹⁶Neryo omundu muguma mwahĩka uku Yesu ati, Mũkangĩrĩrya, nangakola mũbĩrĩ wahi mubuya, inabana engebe yʼerikota kwehĩ?

¹⁷Nĩkwa Yesu mwamubwira ati, Busana nakĩ ukanyĩbũlaya busana nʼebibuya kwehĩ? Hali Muguma musa yona mubuya; nĩkwa wamanza eriingira omo ngebe, ũtegaye ebihano.

¹⁸Neryo mundu oyo mwamũbũlya ati, Ko ni bihano byahi kwehĩ? Yesu mwamũsũbĩrya ati, Ĩsĩwĩta, isiwasĩngĩra, Ĩsĩwĩba, isiwabihira abandi;

¹⁹Ũsĩkaye tata wawe na koyo wawe; kandi wanze mũlĩkyenyũ ngoko ũyanzĩre.

²⁰Omũlwana oyo mwamubwira ati, Ebihano byosĩ ebyo nabirikolabyo, nyĩkĩsĩya kyahi kwehĩ?

²¹Yesu mwamubwira ati, Wamanza erĩhĩkana ndeke, ugende, ũgũlaye ebindu byawe, uhe byʼoko bera, nawe wasyabya nʼebindu elubula; kandi wase Unyikwame.

²²Nĩkwa omugulu omũlwana oyo owa ebyo, mwalũaho nʼobũlĩge; kusangwa abya awite bindu bingi kutsibu.

²³Neryo Yesu mwabwira abiga buwe ati, Kwenene ngabũga nenyũ nyiti, rĩkalĩre busana nʼomundu wʼebindu eriingira omo Bwami bwʼelubula.

²⁴Kandi ngababwira nyiti, Ni ryolo busana nʼengamia erilaba omo kyũna kyʼesĩndanĩ kwilaba omundu wʼebindu eriingira omo Bwami bwa Nyamuhanga.

²⁵Omugulu abiga bowa ebĩ mobasweka kutsibu bati, Nĩkwa nindi wangatoka erĩlamĩbwa kwehĩ?

²⁶Yesu mwatungererabo, mwabwirabo ati, Oko bandu ekĩ sikyangatokekana, nĩkwa uku Nyamuhanga emyatsi yosĩ ikatokekana.

²⁷Neryo Petero mwamũsũbĩrya ati, Lebaya, ĩtwe twabĩrĩsĩga ebyosĩ twamakukwama, nĩkwa twasyabanakĩ kwehĩ?

²⁸Neryo Yesu mwabwirabo ati, Kwenene ngabũga nenyũ, nyiti, Omugulu Omugala wʼomundu asyĩkala oko kĩtũmbĩ kyʼobwami omo lukengerwa luwe, omo mugulu muhya-muhya, ĩnywe ĩkũmĩ nʼababiri mwabirinyikwama, mwasyĩkala oko bĩtũmbĩ byʼobwami erĩkũmĩ nʼebibiri, imukatswera ebihanda erĩkũmĩ nʼebibiri bya Ĩsraelĩ.

²⁹Nʼobuli mundu oyo wabĩrĩsĩga manyũmba, kutse bagala babo, kutse bali babo, kutse ĩse, kutse nyĩnya, kutse abana, kutse ebitaka busana nage, asyabanabyo ngendo ĩgana, kandi asyahabwa engebe yʼerikota.

³⁰Nĩkwa abangi bʼerĩmbere lino basyabya bʼenyũma, nʼabangi bʼenyũma lino, basyabya bʼerĩmbere.