Read nande Matayo 2 Bible Online

Matayo 2 - nande bible

Matayo 2

¹Neryo Yesu mwabutwa omo mũyĩ wʼeBetelehemũ, omo kihugo kyʼeYũdea oko mugulu Herode abya mwami. Neryo lebaya, abandu bʼamenge mobalũa eyo eryuba likahulukira, mobahĩka eYerũsalema, bati,

²Ali hahi oyo wabutawa mo mwami wʼAbayũda kwehĩ? Kusangwa twabirilola oko ngũnũnũ yiwe eyo eryuba likahulukira, neryo twabĩrĩhĩka erĩmũramya.

³Omugulu omwami Herode owa ekĩ, mwahanga-hangya, nʼabandu bosĩ bʼeYerũsalema mobabya batya.

⁴Neryo Herode mwahĩndanĩa abahererĩ bakulu bosĩ nʼabakangĩrĩrya bʼemigambo, neryo mwabũlyabo Kristo ngʼangabutirwahi.

⁵Mobamũsũbĩrya bati, Omo mũyĩ wʼeBetelehemũ yʼeYũdea, kusangwa kĩsakĩre nʼomũmĩnyererĩ ati,

⁶Uwe Betelehemũ omo kihugo kyʼe Yũda, Suli muke nʼahake omo katĩkatĩ kʼabakulu bʼeYũda; Kusangwa omũtabalĩ asyalũa ewawe, Oyo wasyateya abandu bage Ĩsraelĩ.

⁷Neryo omwami Herode mwabirikira abʼamenge bo bũbĩso-bĩso, mwabũlyabo engũnũnũ eyo nga yahuluka mugulu wahi.

⁸Neryo Herode mwatumabo eBetelehemũ, ati, Mugende mukwese ndeke busana nʼomwana oyo; neryo mwamabimubana mwasyambwira, nage inayayo nʼerĩmũramya.

⁹Neryo babere babĩowa ebyo mwami Herode abũga, mobagenda, neryo lebaya engũnũnũ eyo balangira eyo eryuba likahulukira, moyagenda embere syabo erĩhĩka aho yahangana endata wʼaho mwana oyo abya.

¹⁰Neryo omugulu balangira engũnũnũ eyo mobatsema kutsibu nʼobutseme bunene.

¹¹Neryo mobingira omo nyũmba, mobalola oko mwana oyo haguma na nyĩnya wuwe ye Marĩa. Mobakũkama ahisi nʼerĩmũramya; kandi mobasengula ebindu byabo mobamuha olũsũnzo lwʼesyofranka syʼamagetsi, nʼobukwa nʼamanemane.

¹²Neryo Nyamuhanga mwahanabo omwʼilota sibasube ewʼomwami Herode; neryo mobasuba ewabo omo yindi nzira.

¹³Neryo, abʼamenge babere babigenda, omũlaĩka wʼomukama mwabutukira uku Yosefũ omo nzolĩ ati, Hangana, wĩmaye omwana na nyĩnya wuwe, musagire eMĩsĩrĩ, ubyeyo erĩhĩka aho nasyakubwirira. Herode akandisonda-sonda omwana erĩmwĩta.

¹⁴Neryo Yosefũ mwahangana, mwĩmya omwana na nyĩnya wuwe, mwagenda eMĩsĩrĩ omo kiro.

¹⁵Neryo mwĩkalayo erĩhĩka okwʼihola lya Herode. Ebĩ byakolawa erĩberererya ebyo Mukama abũgĩra omo mũmĩnyererĩ ati, Monabirikira Mugala wage erĩlũa eMĩsĩrĩ.

¹⁶Neryo omugulu omwami Herode aminya abandu bʼamenge ko babirimuteba mwahitana kutsibu. Neryo mwahamula erĩĩta abana bosĩ bʼobulume ababya eBetelehemũ nʼababya hakũhĩ nʼeBetelehemũ, ababya bʼemyaka ĩbĩrĩ nʼabalere kwʼaho, iniakaganza omugulu aminya oko bʼamenge abo.

¹⁷Neryo mokyabererera ekyabũgawa nʼomũmĩnyererĩ Yeremĩa ati,

¹⁸Omulenge akogũbawa eRama, Eririra nʼerĩsũsũmana ĩnene, Rakelĩ akalira busana nʼabana buwe, Rakelĩ akagana erĩkĩranĩbwa, Kusangwa abosĩ babirihola.

¹⁹Nĩkwa omwami Herode abere abihola, lebaya, omũlaĩka wʼomukama mwabutukira uku Yosefũ omo nzolĩ eMĩsĩrĩ, ati,

²⁰Hangana, wĩmaye omwana na nyĩnya, usube omo kihugo kyʼeĨsraelĩ, kusangwa abasonda erĩĩta omwana babirihola.

²¹Neryo Yosefũ mwahangana, mwĩmya omwana na nyĩnya, mobasuba omo kihugo kyʼeĨsraelĩ.

²²Nĩkwa omugulu Yosefũ owa ko Arkelayo akatabala eYũdea omo mwanya wa Herode ĩse wuwe, Yosefũ mubaha erisubayo. Kandi Nyamuhanga mwamuhana omo nzolĩ, kyaleka iniaya omo bihugo byʼeGalĩlaya.

²³Nĩkwa mwahĩka oko mũyĩ wʼeNazaretĩ neryo mwĩkalayo, erĩberererya ebyo bamĩnyererĩ babũga bati, Asyahulwa mo Mũnazaretĩ.