Read nande Matayo 20 Bible Online

Matayo 20 - nande bible

Matayo 20

¹Kusangwa obwami bwʼelubula bulingene nʼomwenye kitaka oyo watsinduka erĩsondya abahĩngĩ busana nʼeririma liwe lyʼebĩnyũ.

²Naye mwalĩga eririha abahĩngĩ abo ekĩtsĩpa kiguma oko kiro kiguma, neryo mwatumabo omwʼirima liwe lyʼebĩnyũ.

³Neryo omukulima oyo mwahuluka oko saa ĩsatu mwalangira abandi ibanimene buyira omo katale.

⁴Neryo mwabwirabo ati, Nenyũ muye omwʼirima lyʼebĩnyũ, nʼesitolere nasyabahasyo. Neryo mobayayo.

⁵Kandi mwayayo oko saa yʼendatu, nʼoko saa yʼomwenda, neryo mwakola atya.

⁶Nʼoko saa yʼerĩkũmĩ nʼenguma mwaswahuluka, mweya abandi ibanimene. Neryo mwabwirabo ati, Busana nakĩ mwimene hano ho buyira omusibo gosĩ kwehĩ?

⁷Nabo mobamubwira bati, Sitwetabana mundu wʼerituha mũbĩrĩ. Neryo mwabwirabo ati, Nenyũ muye omwʼirima lyʼebĩnyũ.

⁸Neryo erĩgolo-golo lyabere ryahĩka, Omwenye eririma lyʼebĩnyũ mwabwira omwĩmanĩrĩ wuwe ati, Ubirikire abahĩngĩ Ulihebo obũhĩngĩ bwabo erĩtsũka oko bʼenyũma ũhĩke oko batsũka.

⁹Neryo abandu abatsũka omũbĩrĩ esaa erĩkũmĩ nʼenguma mobalihwa ekĩtsĩpa kiguma.

¹⁰Neryo abandu abatsũka erihabwa omũbĩrĩ mobahĩka mobaganĩrya bati bakandĩĩmya bingi kwʼaho; nĩkwa obuli mundu mwalihwa kĩtsĩpa kiguma.

¹¹Neryo babere bahambakyo, mobayikuna oko mwenye esyombibi,

¹²bati, Abandu bʼenyũma aba bamakola esaa nguma nyisa, nawe wabiririhabo ngatwe, tũlũe tũsĩbĩre tukanuba omo mũbĩrĩ, nʼeryuba likatutera.

¹³Nĩkwa Omwenye eririma mwasũbĩrya omuguma wa kubo ati, Mwĩra wage, sinditakuyira nabi, motutalagana nawe busana nʼekĩtsĩpa kiguma kwehĩ?

¹⁴Wĩmaye esyawe, ugende. Nĩkwa nyanzĩre eriha omundu wʼenyũma oyũ ngawe.

¹⁵Sindi nʼehamũlĩ erikola omo byage ngoko nyanzĩre kwehĩ? Kandi ukatsura kusangwa indi mubuya kwehĩ?

¹⁶Litya owʼenyũma asyabya wʼerĩmbere, kandi owʼerĩmbere asyabya wʼenyũma.

¹⁷Neryo omugulu Yesu asonda erihetukira eYerũsalema, mwatwala abiga ĩkũmĩ nʼababiri ĩbobene aho lutambi, neryo omo nzira mwabwirabo ati,

¹⁸Lebaya, tukahetukira eYerũsalema, nʼomugala wʼomundu asyahoterwa oko bahererĩ bakulu nʼabakangĩrĩrya bʼEmigambo, nabo basyamutswera ambu ahole.

¹⁹Kandi basyamuhotera oko Bihanda erĩmũsekererya nʼerĩmũswĩrya emikoba, nʼerimubamba oko musalaba, nʼenyũma wʼebiro bisatu asyalũbũkĩbwa.

²⁰Neryo nyĩnya wʼabagala ba Zebedayo mwahĩka uku Yesu haguma nʼabagala buwe, neryo mwamũnamira, mwamũbũlya omwatsi.

²¹Neryo Yesu mwamũbũlya ati, Ukasondakĩ kwehĩ? Naye mwamubwira ati, Uhane, uti abagala bage babiri aba, bĩkale muguma oko byala byawe byʼamali, nʼomuguma oko malembe omo Bwami bwawe.

²²Nĩkwa Yesu mwamũsũbĩrya ati, Sĩmwasĩ ebyo mũkabũlaya. Ĩnywe mwangatoka erĩpũlya oko lũtehĩ olo ngandĩpũlyako kwehĩ? Nabo mobamũsũbĩrya bati, Twanganatoka.

²³Neryo Yesu mwabwirabo ati, Mwasyapũlya oko lũtehĩ lwage, nĩkwa erĩĩkala oko byala byage byʼamali, nʼoko malembe, si ryage eribahalyo, nĩkwa ni ryʼabo Tata wage abĩrĩkokoteryalyo.

²⁴Nĩkwa omugulu abandi biga ĩkũmĩ mobowa ekĩ, mobahitana uku balĩkyabo abo babiri.

²⁵Nĩkwa Yesu mwabirikira abosĩ bo haguma, mwabwirabo ati, Mũnasĩ kwʼabatabalĩ bʼabandu bakatabalirabo, nʼabakulu babo bakahamulabo.

²⁶Nĩkwa ko bite bitya omo katĩkatĩ kenyũ. Nĩkwa oyo wanzĩre eribya mukulu omo katĩkatĩ kenyũ, asyabya mugombe wenyũ,

²⁷kandi oyo wanzĩre eribya wʼerĩmbere omo katĩkatĩ kenyũ asyabya mugombe wenyũ.

²⁸Kusangwa Omugala wʼomundu mwatasa erikolerwa, nĩkwa asa erikola, nʼeriha engebe yiwe mo bũgũlĩ busana nʼabandu bangi.

²⁹Neryo omugulu babya bakalũa eYerĩko, endeko nene moyakwama Yesu.

³⁰Neryo lebaya, esyondĩmatĩme ĩbĩrĩ babya bĩkere oko mũsĩke wʼenzira mobowa ambu Yesu akalabaho, mobabirikira kutsibu bati, Mukama, utuganyire, uwe Mugala wa Dawĩdĩ.

³¹Neryo endeko mobakungabo nʼeribwirabo bati, babye bũkũtũ. Nĩkwa mobabirikira kutsibu bati, Mukama, utuganyire, uwe Mugala wa Dawĩdĩ!

³²Neryo Yesu mwahangana mwabirikirabo, ati, Mukasonda inabakolerakĩ kwehĩ?

³³Nabo mobamubwira bati, Mukama, twanzĩre ĩwalĩbũla ameso wetu.

³⁴Neryo Yesu mwakwĩrabo bũlĩge, neryo mwatũla oko meso wabo; neryoneryo mobabana erilangira, mobamukwama.