Read nande Matayo 21 Bible Online

Matayo 21 - nande bible

Matayo 21

¹Nʼomugulu bahĩka hakũhĩ nʼeYerũsalema, mobahĩka eBetefage, oko Kitwa kyʼeMĩzeĩtũnĩ. Neryo Yesu mwatuma abiga babiri,

²ati, Mwingire omo kayĩ akali embere syenyũ neryo mũkandĩeya epunda ĩnĩnahangĩreho nʼekyana kyayo haguma nayo. Muhangulesyo, mundeteresyo.

³Kandi omundu amababwira kĩnywa, mũkandĩbũga muti, Omukama ali nʼobwaga bwasyo, neryo-neryo akandisyatumasyo.

⁴Neryo ebĩ mobyabya busana nʼerĩberererya ebyabũgawa nʼomũmĩnyererĩ, ati,

⁵Mubwire mwali wʼeSĩonĩ, muti; Lebaya omwami wawe amasa ukʼuwe, Iye ni wʼomutima molo, kandi akahekawa nʼepunda, Kye kyana kyʼepunda kikamuheka.

⁶Neryo abiga mobagenda mobakola ngoko Yesu ategekabo.

⁷Mobaleta epunda eyo nʼekyana kyayo, mobahĩra kusyo kwʼesyongimba syabo, neryo Yesu mwĩkala kuyo.

⁸Kandi abangi bʼoko ndeko mobasanza esyongimba syabo omo nzira, nʼabandi mobatwa ebisanza byʼemiti, mobasanzabyo omo nzira.

⁹Nʼesyondeko mobagenda embere wa Yesu, nʼabamukwama mobabirikira, bati, Omugala wa Dawĩdĩ apipawe! Nyamuhanga ahire mũyĩsa oko yukasa omo lĩna lyʼomukama! Nyamuhanga wʼahendata kutsibu apipawe!

¹⁰Neryo Yesu abere ĩngĩra eYerũsalema, omũyĩ gosĩ mobahũlũngũkanĩa, bati, Oyo nindi kwehĩ?

¹¹Nʼesyondeko siti, Oyũ nĩ mũmĩnyererĩ Yesu oyũkalũa eNazaretĩ yʼeGalĩlaya.

¹²Neryo Yesu mwaya omo Hekalũ mwahigirabo eyĩhya abosĩ abagula, nʼabagũlĩraya omo Hekalũ, kandi mwakubula ehimesa hyʼabahĩnganaya esyofranka nʼebĩtũmbĩ byʼabagũlaya ehĩrĩkũkũ.

¹³Nĩkwa Yesu mwabwirabo ati, Kĩsakĩre kiti, Enyũmba yage yasyahulwa mo nyũmba yʼerisabiramo, nĩkwa ĩnywe mukayirayo mo bwĩkalo bwʼabanyeyĩ.

¹⁴Nʼesyondĩmatĩme nʼebirema mobamũhĩkako omo Hekalũ naye mwalamyabo.

¹⁵Nĩkwa abahererĩ bakulu nʼabakangĩrĩrya bʼEmigambo mobahitana omugulu balangira emyatsi yʼeriswekera eyo akola, kandi ngoko bana babirikira omo Hekalũ bati, Eripipwa uku Mugala wa Dawĩdĩ!

¹⁶Mobabwira Yesu bati, Wamowa ebyo aba bakabũga kwehĩ? Neryo Yesu mwabwirabo ati, Ega, nenyũ simwetasoma amasako ati, Wabĩrĩtegekania eripipa busana nawe erĩkalũa omo muno wʼabana nʼawʼesyomekeke kwehĩ?

¹⁷Neryo Yesu mwasĩgabo mwahuluka omo mũyĩ, mwaya eBetanĩa, mwagotserayo.

¹⁸Neryo engyakya omugulu Yesu asuba omo mũyĩ, mwakwa enzala.

¹⁹Neryo abere alangira omuti wʼomũtĩnĩ oko mũsĩke wʼenzira mwaya oko muti oyo, nĩkwa mwatabana kugo ko kindu, bye nʼebikoma bisa. Neryo Yesu mwabwira omuti wʼomũtĩnĩ ati, Siwendisyaswaheta na kera! Nʼomuti wʼomũtĩnĩ oyo muma neryo-neryo.

²⁰Neryo abiga babere balangira ekyo, mobasweka bati, Ko muti wʼomũtĩnĩ amuma ati neryo-neryo kwehĩ?

²¹Neryo Yesu mwasũbĩryabo ati, Kwenene ngabũga nenyũ nyiti, Mwamabya nʼerĩkĩrĩrya, isimwetika-tika, Simwendisyakola ekiriakolawa oko muti wʼomũtĩnĩ kisa, nĩkwa mwamabũga nʼekitwa ekĩ muti, Kulika, ugusawe omo ngetsi, kyasyakolwa kitya.

²²Kandi emyatsi yosĩ eyo mũkabũlaya omwʼisaba, ĩmũkĩkĩrĩraya, mwasyabanayo.

²³Neryo Yesu abere ahĩka omo Hekalũ, abahererĩ bakulu nʼabakulu bʼabandu mobamũhĩkako inianemũkangĩrĩrya. Mobamubwira bati, Ukakola emyatsi eyĩ omo hamũlĩ yahi kwehĩ? Kandi nindi wakuha ehamũlĩ eyĩ kwehĩ?

²⁴Yesu mwasũbĩryabo ati, Nage ngandĩtababũlya kĩnywa kiguma, mwamanyibwirakyo, nage ngandibabwira nga nĩ hamũlĩ yahi ikaleka inakola emyatsi eyĩ.

²⁵Erĩbalĩsya lya Yoane lyalũahi, lyalũa elubula kutse lyalũa oko bandu kwehĩ? Nabo mobatsũka erĩkanĩrya omo katĩkatĩ kabo bati, Twamabũga tuti Ĩyalũa elubula, akanditubwira ati, Busana nakĩ momũtĩkĩrĩrya Yoane kwehĩ?

²⁶Kandi twamabũga, Tuti Ĩyalũa oko bandu, tukubaha endeko, kusangwa abosĩ bakaganza Yoane kwʼali mũmĩnyererĩ.

²⁷Neryo mobasũbĩrya Yesu bati, Sĩtwasĩ. Neryo Yesu mwabwirabo ati, Nage sindiendibabwira nga ni hamũlĩ yahi ikaleka inakola emyatsi eyĩ.

²⁸Nĩkwa mũkaganĩraya muti kwehĩ? Omundu abya nʼabagala babiri, neryo mwahĩka oko wʼerĩmbere ati, Mwana, ugende Ukole omũbĩrĩ omwʼirima lyʼebĩnyũ mũnabwĩre.

²⁹Neryo omwana oyo mwamũsũbĩrya ati, Sĩnyanzĩre, nĩkwa enyũma mwabinduka, mwayayo.

³⁰Neryo tata oyo mwasa oko mwana wʼakabiri, mwamubwira ngoko abwira ogundi. Nĩkwa omwana mwamũsũbĩrya ati, Ega Mukama, nĩkwa mwatagenda omwʼirima.

³¹Oko babiri abo nindi wakola erisonda lya tata wuwe kwehĩ? Mobabũga bati, Owʼerĩmbere. Neryo Yesu mwabũga nabo ati, Kwenene ngabũga nenyũ, nyiti, Abasolesya nʼabamalaya basyabatanga omo Bwami bwa Nyamuhanga.

³²Kusangwa Yoane mwabahĩkako omo nzira yʼeritunganene, nenyũ momutamwĩkĩrĩrya; nĩkwa abasolesya nʼabamalaya mobamwĩkĩrĩrya. Nenyũ nomo mwanalangira mutya, momutabinduka erireka ebibi, mũkamwĩkĩrĩrya.

³³Muhulikirire ogundi mũsyo. Habya omundu mwenye kitaka oyo wahera eririma lyʼebĩnyũ, kandi mwatĩmbya kulyo kwʼekĩyĩte, kandi mwatakula endindo yʼerikamira mwʼebĩnyũ, kandi mwahĩmbaho enyũmba eyĩsũngũlĩkĩre. Neryo mwasĩgĩrayo abalĩmĩ, neryo mwaya oko lugendo omo kindi kihugo.

³⁴Omugulu wʼeriera lyʼebĩnyũ abere asonda erĩhĩka, Omwenye kitaka mwatuma bakobe buwe oko balĩmĩ abo eribana oko bĩgũma biwe.

³⁵Abalĩmĩ abo mobahamba abakobe buwe, mobaswĩrya omuguma, mobĩta ogundi, kandi ogundi mobamũswĩrya amabwe.

³⁶Kandi mwaswatuma abandi bakobe bangi kwilaba abʼerĩmbere, neryo abalĩmĩ mobaswakolabo batya.

³⁷Nĩkwa enyũma mwatuma mugala wuwe kubo ati, Basyasĩkya mugala wage.

³⁸Nĩkwa omugulu abalĩmĩ abo balangira omugala oyo, mobabwirana bati, Oyũ ni mugala wʼomwenye eririma. Mwase, tũmwĩte, neryo eririma lyasyabya lyetu.

³⁹Neryo mobahamba mugala oyo, mobamukurira eyĩhya wʼeririma lyʼebĩnyũ, mobamwĩta.

⁴⁰Yesu mwabũlya ati, Omugulu Omwenye eririma lyʼebĩnyũ asyasa, asyakolakĩ nʼabalĩmĩ abo kwehĩ?

⁴¹Nabo mobamubwira bati, Kwenene asyaherya abandu babi abo, nʼerĩsĩgĩra eririma lyʼebĩnyũ eryo lyʼabandi balĩmĩ, abasyamuha ebĩgũma byʼebĩnyũ oko kirimo kitolere.

⁴²Kandi Yesu mwabũlyabo ati, Simwetasoma Amasako aya ati, Erĩbwe eryo abahĩmbĩ babana nga buyira, Erĩ molyabya erĩbwe lyʼesondo. Omwatsi oyũ mwakolwa nʼomukama, Ni wʼeriswekera omo meso wetu!

⁴³Neryo ngababwira nyiti, Obwami bwa Nyamuhanga mwasyasagulwabo, kandi bwasyahabwa ekihanda ekikabana ebĩgũma ebitolere. [

⁴⁴Nʼoyo wasyatererwako nʼerĩbwe erĩ asyabũnangika mo bitswebitswe; nĩkwa erĩbwe eryo lyamatogera oko mundu, lyasyamũbũnzũngũla mo lũtũtũ.]

⁴⁵Neryo omugulu abahererĩ bakulu nʼAbafarĩsayo bowa emĩsyo yiwe, mobaminya kwʼakahulabo.

⁴⁶Nĩkwa omugulu basonda-sonda erihamba Yesu, mobubaha esyondeko, kusangwa mobaganza Yesu mo mũmĩnyererĩ.