Read nande Matayo 22 Bible Online

Matayo 22 - nande bible

Matayo 22

¹Yesu mwatwa emĩsyo kandi omugulu abya akabũga nʼabandu ati,

²Obwami bwʼelubula buli ngʼOmwami oyo wakokotaya erirya lyʼerĩherũkya busana nʼomugala wuwe.

³Neryo mwatuma abagombe buwe eriyabwira bagenĩ bʼerirya ĩnene lyʼerĩherũkya abatumirawako ambu base, nĩkwa mobatanza erĩhĩka.

⁴Kandi mwatuma abandi bagombe ati, Mubwire abatumirawako muti, Lebaya, nabĩrĩkokotya erirya; esyonde syage, nʼesyosabwe syabĩrĩsĩnzwa, nʼebyosĩ bĩlũmĩre. Mwase okwʼirya lyʼerĩherũkya!

⁵Nĩkwa abagenĩ abo mobatatsomana, mobaya oko mĩbĩrĩ yabo, omuguma omwʼirima liwe, nʼogundi omo dũka yiwe.

⁶Nʼabandi bagenĩ mobahamba abagombe buwe, mobayirabo nabi, mobĩtabo.

⁷Nĩkwa omwami oyo mwahitana kutsibu, mwatuma emilondo yiwe, mwaherya abĩtĩ abo, kandi mwahĩsya omũyĩ wabo.

⁸Neryo mwabwira bagombe buwe ati, Erĩherũkya lĩlũmĩre, nĩkwa abatumirawako sibabya batolere.

⁹Neryo mugende omo syombalu, nʼabosĩ mũkandĩeya eyo, mubirikirebo okwʼirya lyʼerĩherũkya.

¹⁰Abagombe abo mobagenda omo syombalu mobahĩndanĩa abosĩ begayayo, ababi nʼababuya. Litya enyũmba yʼerĩherũkya moyũsũla mwʼabagenĩ.

¹¹Nĩkwa omugulu omwami ahĩkamo erĩrebya abagenĩ, mwalangira omundu oyutambite olukimba lwʼerĩherũkya.

¹²Neryo omwami mwabũlya ati, Mwĩra wetu, ulingira muno uti iwe utambite olukimba lwʼerĩherũkya kwehĩ? Naye mwabya bũkũtũ.

¹³Neryo omwami oyo mwabwira bagombe ati, Mumubohe oko byala nʼoko bisando, mumuguse omo mwĩrĩmya, eyo hasyabya eririra nʼerikeregeta ameno.

¹⁴Neryo Yesu mwabũga ati, Abangi bakabirikirawa, nĩkwa ni bake abakayisogawa.

¹⁵Neryo Abafarĩsayo mobagenda mobaya embĩta ngoko bangatega Yesu omo bĩnywa.

¹⁶Neryo mobatuma abiga babo haguma nʼAbanya Herode uku Yesu bati, Mũkangĩrĩrya, tũnasĩ kʼuli wʼekwenene, kandi Akakangĩrĩraya enzira ya Nyamuhanga omo kwenene, sulitsomana mundu, sulitsomana amalengekanĩa wʼabandu, kandi sulisombola ebitaga nʼebite bitaga.

¹⁷Neryo utubwire ngʼukaganĩrayakĩ. Emigambo ĩkatũlĩgĩra erisolera Kaĩsarĩ, kutse iyihi kwehĩ?

¹⁸Nĩkwa Yesu mwaminya obubi bwabo neryo mwabũga ati, Ĩnywe batebya! Busana nakĩ mukanyirengako kwehĩ?

¹⁹Mũnyĩkangaye ekĩtsĩpa kyʼerisolera. Neryo mobamuletera edĩnarĩ.

²⁰Yesu mwabũlyabo ati, Ekĩsosekanĩo nʼamasako ni byandi kwehĩ?

²¹Nabo mobamũsũbĩrya bati, Ni bya Kaĩsarĩ. Neryo Yesu mwabwirabo ati, Mulihe Kaĩsarĩ ebindu bya Kaĩsarĩ, kandi mulihe Nyamuhanga ebindu bya Nyamuhanga.

²²Neryo omugulu bowa ebĩ mobasweka, mobamũsĩga, mobagenda.

²³Oko kiro ekyo Abasadũkayo mobahĩka uku Yesu. Aba ni bandu abakabũga bati, sihali erĩlũbũka.

²⁴Mobamũbũlya bati, Mũkangĩrĩrya, Musa mwabũga ati, Omundu amahola isiawite bana, mugala wabo asyĩmya omũkalĩ oyo iniabutira mugala wabo yʼabana.

²⁵Nĩkwa haguma netu habya bagala babo balinda, owʼerĩmbere mwahĩkya omũkalĩ, neryo mwahola, isialyabuta mwana, neryo mwasĩgĩra mugala wabo yʼomũkalĩ.

²⁶Litya mugala wabo wʼakabiri mwakola atya, nʼowʼakasatu mwakola atya erĩhĩka oko wʼakalinda.

²⁷Nʼenyũma wʼabosĩ omũkalĩ oyo naye mwahola.

²⁸Neryo oko kiro kyʼerĩlũbũka, omũkalĩ oyo asyabya wandi oko balinda abo kwehĩ? Kusangwa abosĩ ĩbabĩrĩmwĩmya.

²⁹Nĩkwa Yesu mwasũbĩryabo ati, Mukatala, sĩmwasĩ Amasako, kutse amaka wa Nyamuhanga.

³⁰Kusangwa oko mugulu wʼerĩlũbũka bali ngʼabamalaĩka omo lubula. Sĩbehĩkaya kutse erĩherũkanĩa.

³¹Nĩkwa busana nʼerĩlũbũka lyʼabaholĩ simwetasoma ebyo Nyamuhanga ababwira kwehĩ ati,

³²Ĩngye indi Nyamuhanga wa Abrahamũ, na Nyamuhanga wa Ĩsaka, na Nyamuhanga wa Yakobo. Nyamuhanga si Nyamuhanga wʼabaholĩ, nĩkwa ni Nyamuhanga wʼabaliho.

³³Omugulu esyondeko syowa ebĩ, mobaswekera erĩkangĩrĩrya liwe.

³⁴Nĩkwa omugulu Abafarĩsayo bowa ko Yesu abĩrĩtũlerya Abasadũkayo, mobahĩndana haguma.

³⁵Nʼomuguma wa kubo oyo wabya mũkangĩrĩrya wʼEmigambo mwabũlya Yesu ekĩnywa erimulengako, ati,

³⁶Mũkangĩrĩrya, ekihano kikulu omo Migambo ni kyahi kwehĩ?

³⁷Neryo Yesu mwamubwira ati, Wanze Omukama Nyamuhanga wawe nʼomutima wawe gosĩ, nʼekĩrĩmũ kyawe kyosĩ nʼobũlengekanĩa bwawe bosĩ.

³⁸Ekihano kikulu nʼekyʼerĩmbere kyekyo.

³⁹Omugambo wʼakabiri owali ngago, ati, Wanze mũlĩkyenyũ ngoko ũyanzĩre.

⁴⁰Oko bihano bibiri ebĩ, Emigambo yosĩ ya Musa nʼerĩkangĩrĩrya lyʼabamĩnyererĩ bihangene.

⁴¹Neryo omugulu Abafarĩsayo bahĩndana haguma, Yesu mwabũlyabo,

⁴²ati, Mũkaganĩrayakĩ busana na Kristo kwehĩ? Ni mugala wandi kwehĩ? Nabo mobamubwira bati, Ni mugala wa Dawĩdĩ.

⁴³Neryo Yesu mwabwirabo ati, Omũlĩmũ Abũyĩrĩre asondola Dawĩdĩ eriahula Kristo mo Mukama ati kwehĩ? ati,

⁴⁴Omukama mwabwira Omukama wage ati, Wĩkale oko byala byage byʼamali, Erĩhĩka aho nasyahĩrĩra esyonzĩgũ syawe omwisi wʼebisando byawe.

⁴⁵Neryo Dawĩdĩ amabya akamwahula mo Mukama, Kristo ni mwana wa Dawĩdĩ ati kwehĩ?

⁴⁶Neryo mohatabya mundu oyo watoka erĩsũbĩrya Yesu omwatsi, kutse erĩtsũka ekiro ekyo, sihabya mundu oyo walenga erĩswamũbũlya mwatsi.