Read nande Matayo 24 Bible Online

Matayo 24 - nande bible

Matayo 24

¹Neryo Yesu mwalũa omo Hekalũ, nĩkwa abere anemugenda, abiga buwe mobahĩka erĩmũkangya emĩhĩmbĩre yʼeHekalũ.

²Yesu mwasũbĩryabo mwabwirabo ati, Simwetalangira ebindu byosĩ ebĩ kwehĩ? Kwenene ngabũga nenyũ, hano sihendisyasĩgala erĩbwe nʼeriguma endata oko lindi, eritendisyasambulirwa ahisi.

³Neryo Yesu abere anĩkere oko kitwa kyʼeMĩzeĩtũnĩ, abiga mobamũhĩkako ahate bandu bati, Utubwire emyatsi eyĩ nga yasyabya oko mugulu wahi, kandi ekiminyikalo kyʼerĩhĩka lyawe nga ni kyahi, nʼerihwererera lyʼemigulu eyĩ ni kiro kyahi kwehĩ?

⁴Neryo Yesu mwasũbĩryabo ati, Simuleke mundu akabatalya.

⁵Kusangwa abangi basyasa omo lĩna lyage bati, Ĩngye indi Kristo, kandi basyatalya bandu bangi.

⁶Mwasyowa engulu yʼamalwa nʼolombĩ lwʼamalwa; mũlebaye, simubahe. Emyatsi eyĩ itolere ĩyahĩka, nĩkwa endũlĩ isiriyaberwa.

⁷Kusangwa ekihanda kyasyalwa nʼekindi kihanda, nʼobwami bwasyalwa nʼobundi bwami, kandi hasyabya esyonzala ehandi nʼehandi, nʼemĩsĩkĩ ehandi nʼehandi.

⁸Nĩkwa emyatsi yosĩ eyĩ iri ngʼerĩtsũka lyʼerikunda lyʼomukule.

⁹Neryo basyabahotera, nʼerĩbahĩra omo malĩge, kandi basyabĩta. Ebihanda byosĩ byasyabakwa obusu busana nʼerĩna lyage.

¹⁰Oko mugulu oyo, abandu bangi basyaleka erĩkĩrĩrya lyabo, kandi basyahoterana nʼerĩkwana obusu.

¹¹Kandi abamĩnyererĩ bʼamabehĩ basyahangana nʼerĩtalya abangi.

¹²Kandi kusangwa ebibi byasyakanya, olwanzo lwʼabangi lwasyaholoka.

¹³Nĩkwa omundu oyo wasyayĩyĩnĩa erĩhĩka oko ndũlĩ yo wasyalamĩbwa.

¹⁴Kandi Engulu Yowene yʼobwami eyĩ yasyatsũka erĩtũlaganĩbwa omo kihugo kyosĩ busana nʼerĩmĩnyĩsya ebihanda byosĩ, neryo endũlĩ yasyahĩka.

¹⁵Neryo omugulu mwasyalangira ekĩkalĩre kyʼerĩherya ekyahulawa nʼomũmĩnyererĩ Danĩelĩ, ikihangene ahabũyĩrĩre; oyukasoma aminye ndeke!

¹⁶Neryo abali eYũdea basagire oko bitwa.

¹⁷Omundu oyuli endata oko nyũmba, syakime ati, akenda ebindu ebiri omo nyũmba yiwe.

¹⁸Nʼomundu oyuli omwʼirima syasubire olukimba luwe.

¹⁹Nĩkwa obũlĩge oko bakule, nʼoko bakalĩ abakaha abana babo bʼamabere oko biro ebyo!

²⁰Nĩkwa musabe Nyamuhanga muti erisaga lyenyũ siribye oko mugulu wʼeritsuku, kutse oko kiro kyʼeSabato.

²¹Kusangwa oko biro ebyo hasyabya obũlĩge bunene isibwebwatabya okwʼĩtsũka lyʼekihugo, erĩhĩka na lino, kutse sibwendisyaswabya butya na kera.

²²Nĩkwa kumbe Nyamuhanga atalĩkũhĩhaya ebiro ebyo, sihali mundu wangalamĩbwe. Nĩkwa abĩrĩkũhĩhyabyo busana nʼabayisogawa buwe.

²³Neryo omundu amababwira ati, Lebaya, hano ho Kristo ali! Kutse ati, Yolya halya, Sĩmũlĩge.

²⁴Kusangwa abakristo bʼamabehĩ nʼabamĩnyererĩ bʼamabehĩ basyahuluka basyakangya ebĩmĩnyĩsyo nʼebyʼeriswekera, busana nʼerĩtalya abayisogawa ba Nyamuhanga, kyamatokekana.

²⁵Mũlebaye, nabiribabwira emyatsi yosĩ erĩmbere.

²⁶Neryo bamababwira bati, Lebaya, ali omo mbwarara, simuyeyo. Kutse bati, Lebaya, ali omo bisenge, Sĩmũlĩge.

²⁷Kusangwa Omugala wʼomundu asyasa ngʼakarabyo akakakoleraya kakalũa eyo eryuba likahuluka nʼerĩkangabasanĩa, nʼerĩhĩka eyo eryuba likalengera.

²⁸Ahali ekĩnda, ho amahungu asyahĩndana.

²⁹Nĩkwa neryo-neryo enyũma wʼobũlĩge bwʼebiro ebyo, eryuba lyasyabya mwĩrĩmya, nʼomukera siendisyaswakola, nʼesyongũnũnũ syasyatogonga erĩlũa omo kyanya, nʼebyʼamaka byʼomo kyanya byasyatenga-tenganĩbwa.

³⁰Neryo ekiminyikalo kyʼomugala wʼomundu kyasyahuluka omo kyanya; neryo ebihanda byosĩ byʼomo kihugo byasyasũsũmana, kandi byasyalangira Omugala wʼomundu akasa oko bĩtũ byʼekyanya nʼobũtokĩ bunene nʼolukengerwa lunene.

³¹Neryo Yesu asyatuma abamalaĩka buwe nʼomulenge munene wʼengubi, nabo basyahĩndanĩa abayisogawa ba Nyamuhanga erĩlũa oko bihande bini byʼekihugo, erĩtsũka oko ndũlĩ nguma yʼekyanya erĩhĩka oko yindi ndũlĩ yʼekyanya.

³²Lino mwige omũsyo wʼomuti wʼomũtĩnĩ. Omugulu akatohaya emitahi yago, ikabya myolo-myolo, neryo akalasaya ebikoma byago, Ukaminya ngoko mugulu wʼomwisi ali hakũhĩ.

³³Litya nenyũ nibya, omugulu mukalangira emyatsi eyĩ ĩkahĩka, muminye omugulu kwʼali hakũhĩ, oko lũkyo.

³⁴Kwenene ngabũga nenyũ, olulengo olũ sĩlwendĩsyalũaho emyatsi eyĩ ite yabererera.

³⁵Ekyanya nʼekihugo byasyahwaho, nĩkwa ebĩnywa byage sibyendisyahwaho.

³⁶Nĩkwa sihali mundu oyo wasĩ erĩhĩka lyʼekiro ekyo, kutse esaa eyo, nomo bangabya bamalaĩka bʼelubula, kutse Omugala, nĩkwa Tata yũnasĩ, ĩyowene.

³⁷Kusangwa erĩhĩka lyʼomugala wʼomundu lyasyabya ngʼomwatsi wʼebiro bya Noa.

³⁸Kusangwa ngʼomo biro ebyo embere wʼerigunga lyʼamagetsi, mobabya bakalya nʼerĩpũlya, mobabya bakahĩkya nʼerĩherũkanĩa, erĩhĩka oko kiro ekyo Noa ingira omo bwato.

³⁹Mobataminya ekyabya erĩhĩka aho erigunga lyʼamagetsi lyasira nʼeritwala bosĩ. Erĩhĩka lyʼomugala wʼomundu ko likandisyabya litya.

⁴⁰Oko mugulu oyo, abalume babiri basyabya omwʼirima; omuguma asyatwalwa, nʼomuguma asyasĩganĩbwa.

⁴¹Abakalĩ babiri basyabya bakaswa oko luso, omuguma asyatwalwa, nʼomuguma asyasĩganĩbwa.

⁴²Neryo mũtegaye! Kusangwa sĩmwasĩ ekiro kyahi Omukama wenyũ asyasa.

⁴³Nĩkwa muminye ekĩ kyo ndeke, Omwenye nyũmba alibya asĩ esaa omũrahĩ asonda erĩhĩka, nga mwateya ĩsĩangalekĩre enyũmba yiwe ikatulwa.

⁴⁴Busana nʼomwatsi oyũ mubye ĩmũnasĩkĩre, kusangwa Omugala wʼomundu asyasa oko ndambĩ mũtalengekenĩe.

⁴⁵Omugombe oyuteregula nʼowʼamenge nindi kwehĩ? Yo nʼoyo mukama wuwe asĩgĩra bagombe bʼenyũmba yiwe erĩteya nʼerihabo akalyo kabo oko mugulu atolere.

⁴⁶Obutseme buli oko mugombe oyo mukama wuwe akamwegaya akakola atya omugulu omukama oyo akahĩka eka.

⁴⁷Kwenene ngababwira nyiti omukama oyo asyamuyira mo mũteya wʼebindu biwe byosĩ.

⁴⁸Nĩkwa omugombe mubi oyo amayibwira omo mutima wuwe ati, Mukama wage siendisyasa lũba,

⁴⁹ĩnĩatsũka erĩswĩrya abagombe balĩkyabo, nʼerirya, nʼerĩpũlya haguma nʼabakũndĩrya.

⁵⁰Neryo omukama wʼomugombe oyo asyasa ekiro atemulindirira, nʼoko ndambĩ atasĩ.

⁵¹Omukama oyo asyamũtsũtsanga mo bitswe-bitswe, nʼerimuha omwanya haguma nʼabatebya. Hasyabya eririra eyo nʼerikeregeta ameno.