Read nande Matayo 28 Bible Online

Matayo 28 - nande bible

Matayo 28

¹Neryo enyũma wʼekiro kyʼeSabato, ekiro kyʼerĩtsũka eyenga kyabere kyasonda erikya, Marĩa Magdalene nʼogundi Marĩa mobayalebya eyisinda.

²Neryo lebaya, mohabya omũsĩkĩ munene. Kusangwa omũlaĩka wʼomukama mwandagala akalũa elubula, mwahĩkaho mwakũmbagalya erĩbwe eryo mwĩkala kulyo.

³Erisosa liwe lyabya ngʼerĩpalya lyʼobũtũkũ, nʼesyongimba siwe syabya nyeru-nyeru ngʼenzururu.

⁴Abateya mobatitimana busana nʼerimubaha, neryo mobabya ngʼabandu baholĩre.

⁵Neryo omũlaĩka mwabũga nʼabakalĩ ati, Simubahe, kusangwa nyĩnasĩ ko mukasonda-sonda Yesu oyo wabambawa oko musalaba.

⁶Siali hano, abĩrĩlũbũka ngoko abũga! Mwase, mũlebaye aho Mukama alũe agotsere.

⁷Mugende lũba, mubwire abiga buwe kwʼabĩrĩlũbũka oko baholĩ, kandi lebaya, akabatanga eGalĩlaya. Eyo yo mwasyamulolerako. Lebaya, nabiribabwira.

⁸Neryo mobalũa okwʼisinda ko lũba nʼeriubaha nʼobutseme bunene, mobatibita eriyabwira abiga ba Yesu.

⁹Neryo lebaya, Yesu mwahĩndana nabo ati, Mwabũkĩre! Neryo mobamũhĩkako, mobahamba ebisando biwe, mobamũramya.

¹⁰Neryo Yesu mwabwirabo ati, Simubahe; mugende muyabwire abagala betu baye eGalĩlaya, eyo yo basyanyilolerako.

¹¹Neryo abakalĩ babere bakagenda, lebaya, abandi bʼoko bateya mobagenda oko mũyĩ, mobayabwira abahererĩ bakulu ebyosĩ ebyabere.

¹²Neryo babere babĩhĩndana nʼabakulu bʼAbayũda nʼerihanana haguma, mobaha abasĩrĩkanĩ bʼesyofranka nene,

¹³bati, Mũbũge muti, Abiga buwe mobakahĩka omo kiro nʼerĩmwĩba omugulu tũlweto.

¹⁴Kandi omũtabalĩ amowa omwatsi oyũ, twasyamwowĩsya, ĩtwababalya omwaga.

¹⁵Neryo abateya abo mobĩmya esyofranka esyo, mobakola ngoko babwirawa. Engulu eyĩ moyatsungana omo katĩkati kʼAbayũda erĩhĩka mũnabwĩre.

¹⁶Neryo abiga erĩkũmĩ nʼomuguma mobaya oko kitwa kyʼeGalĩlaya aho Yesu ahula.

¹⁷Neryo babere balola uku Yesu mobamũramya, nĩkwa abandi mobatikatika.

¹⁸Neryo Yesu mwasa mwabũga nabo ati, Ehamũlĩ yosĩ nabirihabwayo omo lubula nʼomo kihugo.

¹⁹Neryo mugende, muyire abiga oko bihanda byosĩ; mũbatĩsayebo omo lĩna lyʼĨse, nʼeryʼOmugala, nʼeryʼOmũlĩmũ Abũyĩrĩre.

²⁰Mũkangĩrĩrayebo bakole ebyosĩ ebyo nabiribahana. Kandi mwibuke! Ingye ko ndi haguma nenyũ ebiro byosĩ erĩhĩka okwʼihwererera lyʼemigulu.