Read nande Matayo 6 Bible Online

Matayo 6 - nande bible

Matayo 6

¹Mũyĩtegaye Simukole ebibuya byenyũ embere syʼabandu erilolwako nabo. Mwamakola ebibuya byenyũ embere syʼabandu, simwendisyabana oluhembo lwa Tata wenyũ oyuli elubula.

²Neryo omugulu ũkahĩtaya, sigubuhe ngubi emuliro wawe, ngʼabakayĩtendereraya ko bakakola omo manyũmba wʼerĩhĩndanamo nʼomo syombalu, bati bapipawe nʼabandu. Kwenene ngababwira nyiti, bawite oluhembo lwabo losĩ.

³Nĩkwa omugulu ũkahĩtaya, Suleke ebyala byawe byʼamalembe bikaminya ebyo byala byʼamali bikakola.

⁴Neryo erĩhĩtya lyawe libye omo bũbĩso-bĩso. Na Tata wawe oyukalangira bũbĩso-bĩso asyakuhemba.

⁵Omugulu mukasaba, isimwabya ngʼabatebya! Kusangwa banzĩre erihangana nʼerisaba omo manyũmba wʼerĩhĩndanamo nʼomo syongonde syʼesyombalu, balolaweko nʼabandu. Kwenene ngababwira nyiti, Bawite oluhembo lwabo losĩ.

⁶Nĩkwa uwe, omugulu ukasaba, wingire omo kisenge kyawe, neryo wabikinga Olũyĩ, iwasaba Tata wawe oyuli mo bũbĩso-bĩso. Na Tata wawe oyukalangira mo bũbĩso-bĩso, asyakuhemba.

⁷Kandi omugulu mukasaba, Simubye mukasubirira omo bĩnywa bitya-bitya, ngoko Ebihanda bikakola, kusangwa bakaganĩraya bati basyogũbwa busana nʼebĩnywa byabo bingi.

⁸Neryo Simubye ngabo; kusangwa Tata wenyũ anasĩ ebibali bwaga, isimwemwamusaba.

⁹Neryo ko musabe mutya, muti, Tata wetu oyuli elubula, Erĩna lyawe ribye rĩbũyĩrĩre.

¹⁰Obwami bwawe bwase. Erisonda lyawe liyirawe, Omo kihugo ngoko liri omo lubula.

¹¹Utuhe mũnabwĩre akalyo ketu akatutolere.

¹²Utubuyire amalolo ago twabirikola; Ngoko tukabuyira abandi bʼamalolo ago bakatukolera.

¹³Sĩgũtwĩngĩraye omwʼirengwako, nĩkwa ũtũlamaye oko mubi. Kusangwa obwami ni bwawe, Nʼobũtokĩ, nʼolukengerwa, kera na kera. Amina.

¹⁴Kusangwa mwamabuyira abandu kwʼamalolo ago babiribakola, Tata wenyũ wʼelubula, asyababuyira nibya.

¹⁵Nĩkwa mwamatindabuyira abandi bʼamalolo bakabakolera, Tata wenyũ siendisyababuyira amalolo ago mwabirikola.

¹⁶Omugulu mukatsira akalyo, Simubye nʼobũsũ bũtsandĩre ngʼabatebya ko bakakola. Kusangwa bakatsandaya amũsũ wabo bati balolaweko nʼabandu ngʼabandu bakatsira akalyo. Kwenene ngabũga nenyũ nyiti, Banawite oluhembo lwabo losĩ.

¹⁷Nĩkwa uwe omugulu ukatsira akalyo, ũhakabaye omutwe wawe wʼamagũta, kandi ũnabaye obũsũ bwawe.

¹⁸Eritsira lyawe lyʼakalyo sirilolaweko nʼabandu, nĩkwa Tata wawe oyuli bũbĩso-bĩso asyaminya. Kandi Tata wawe Oyũkalebaya bũbĩso-bĩso, asyakuhemba.

¹⁹Simuyibikire bindu muna-kihugo, aho ehinyurugunzu nʼamakenge bĩkaheraya, kandi aho abarahĩ bakatula nʼerĩĩba.

²⁰Nĩkwa muyibikire ebindu elubula, aho ehinyurugunzu nʼamakenge bĩteheraya, kandi aho abarahĩ sibetula nʼerĩĩba.

²¹Kusangwa ahali ebindu byawe, ho mutima wawe asyabya nibya.

²²Etala yʼomubiri lye rĩso; omugulu erĩso lyawe lĩkakoleraya, omubiri wawe gosĩ asyũsũla nʼekyakakala.

²³Nĩkwa erĩso lyawe lyamabya libi, omubiri wawe gosĩ asyũsũla mʼomwĩrĩmya. Neryo ekyakakala ekiri omwisi wawe kyamabya mwĩrĩmya, omwĩrĩmya oyo ni munene kutsibu! Nyamuhanga nʼebindu.

²⁴Sihali mundu oyo wangatoka erikolera abakama babiri; kusangwa asyakwa omuguma yʼobusu, nʼerianza ogundi. Kutse asyabegera oko muguma, iniapona ogundi. Simwangatoka erikolera Nyamuhanga nʼebindu.

²⁵Busana nʼomwatsi oyũ, ngababwira nyiti, Sĩmũyĩlũhaye nʼamaganĩryo busana nʼengebe yenyũ, muti, mwasyalyakĩ, kutse busana nʼomubiri, nga mwasyambalakĩ. Kusangwa engebe sĩyĩrengĩre byalya, nʼomubiri sĩalengĩre esyongimba kwehĩ?

²⁶Musamalire esyonyonyũ syʼomo kyanya; kusangwa sisyebiba, kutse sisyegesa, kutse erĩhĩrabyo omo bigona; nĩkwa Tata wenyũ wʼelubula akalĩsayasyo. Nenyũ Simuli bʼobũgũlĩ bunene kwilabasyo kwehĩ?

²⁷Kandi nindi kwĩnywe amayĩlũhya busana nʼamaganĩryo angatoka eriyitomekera oko myaka yiwe kwehĩ?

²⁸Kandi busana nakĩ mũkayĩlũhaya omo maganĩryo busana nʼesyongimba kwehĩ? Mũlebaye ebiranga-ranga byʼomolĩ ngoko bikalasa. Sibyenuba, kutse eriluka esyongimba.

²⁹Nĩkwa ngababwira nyiti, Solomono omo lukengerwa luwe losĩ mwatambala ndeke ngʼomusanga muguma oyũ.

³⁰Nĩkwa Nyamuhanga oyũkambalaya ebiti byʼomolĩ, ebikabyaho mũnabwĩre nʼomo ngyakya bikagusawa omo lĩko, siendĩsyabambalya kwilaba aho ĩnywe bandu bʼerĩkĩrĩrya ĩke kwehĩ?

³¹Neryo sĩmũyĩlũhaye nʼamaganĩryo muti, Twasyalyakĩ, kutse Twasyapũlyakĩ, kutse twasyambalakĩ kwehĩ?

³²Kusangwa ebihanda bikasonda-sondaya ebindu byosĩ ebĩ byo kutsibu. Tata wenyũ wʼelubula anasĩ ebyosĩ ebibali bwaga.

³³Nĩkwa mũtsũke erisonda Obwami bwa Nyamuhanga nʼeritunganene riwe, naye asyabaha ebindu byosĩ ebĩ.

³⁴Neryo sĩmũyĩlũhaye nʼamaganĩryo busana nʼomo ngyakya; kusangwa engyakya yasyabya nʼamaganĩryo wayo. Obuli kiro kiwite obũlĩge bungaho.