Read nande Matayo 8 Bible Online

Matayo 8 - nande bible

Matayo 8

¹Neryo Yesu mwandagala akalũa oko kitwa, nʼesyondeko nene mosyamukwama.

²Neryo lebaya, omuhaga mwamũhĩkako, neryo mũnama embere siwe erĩmũramya ati, Mukama, wamabya ũnanzĩre, wangatoka erĩnyĩlamya.

³Yesu mwakakya ebyala biwe mwamũtũlako ati, Nyĩnanzĩre, ũlamĩbawe! Neryo-neryo ebihaga biwe mobyalamĩbwa.

⁴Neryo Yesu mwamubwira ati, Subwire mundu, nĩkwa ugende ũyĩkanganaye oko mũhererĩ, kandi uhere obuhere obo Musa ahamula, busana nʼerĩmĩnyĩsyabo ko wabirilama.

⁵Neryo omugulu ingira eKapernaũmũ, omukulu wʼabasĩrĩkanĩ wʼAbaroma mwahĩndana naye, mwamulemba-lemba ati,

⁶Mukama, omugombe wage ali eka alwere obũkonĩ bwʼeribasa, kandi akagalawa kutsibu.

⁷Yesu mwamubwira ati, Ngandiyayo nʼerĩyamũlamya.

⁸Nĩkwa omukulu wʼabasĩrĩkanĩ mwamũsũbĩrya ati, Mukama, sinyitolere ũkahĩka omwage, nĩkwa ũbũge ekĩnywa kisa, nʼomugombe wage akandĩlamĩbwa.

⁹Nage nibya indi mundu oyuwite abakanyihamula, kandi ngwite abasĩrĩkanĩ bage; ngabwira oyũ nyiti, Ugende, iniagenda; kandi ngabwira ogundi nyiti, Wase, iniasa; kandi ngabwira omugombe wage nyiti, Ukole ekĩ, iniakoiakyo!

¹⁰Neryo omugulu Yesu owa ekĩ, mwasweka, neryo mwabwira abandu abamukwama ati, Kwenene ngabũga nenyũ nyiti, Sinditabana erĩkĩrĩrya ĩnene ngʼerĩ omo Baĩsraelĩ.

¹¹Kandi ngababwira nyiti, abangi basyalũa eyo eryuba likahulukira nʼeyo eryuba likalengera, basyĩkala oko mesa haguma na Abrahamũ, na Ĩsaka, na Yakobo, omo Bwami bwʼelubula.

¹²Nĩkwa abana bʼobwami basyaguswa omo mwĩrĩmya wʼeyĩhya; eyo hasyabya eririra nʼerikeregeta ameno.

¹³Neryo Yesu mwabwira omukulu wʼabasĩrĩkanĩ oyo ati, Ugende, ukolerawe ngoko wabĩrĩkĩrĩrya. Nʼomugombe wuwe mwalamĩbwa oko ndambĩ eyo.

¹⁴Yesu abere ahĩka ewa Petero, neryo mwalangira nyĩnyĩ-byala wa Petero iniali omo ngingo inialwere erĩhũhana lyʼomubiri.

¹⁵Neryo Yesu mwatũla oko byala biwe, nʼerĩhũhana eryo molyamũlũako, neryo mwahangana mwatsũka erimukolera.

¹⁶Neryo bwabere bwabya ĩgolo-golo, abandu mobaletera Yesu yʼabandi abali kwʼesyombĩnga Nĩkwa Yesu mwahiga ebĩrĩmũ bibi ebyo omo kĩnywa kisa, mwalamya abosĩ ababya balwere.

¹⁷Mwakola ebĩ erĩberererya ebyabũgawa nʼomũmĩnyererĩ Ĩsaya, ati, Iye ĩyowene mwĩmya amagalĩ wetu, kandi mwaheka esyondwala syetu.

¹⁸Neryo omugulu Yesu alangira endeko iyabirimũtĩmbako, mwahamula erisokera eyisirya wʼengetsi.

¹⁹Neryo omũkangĩrĩrya muguma wʼEmigambo mwamũhĩkako, mwamubwira ati, Mũkangĩrĩrya, nasyakukwama ehosĩ eyo ukandisyagenda.

²⁰Nĩkwa Yesu mwamubwira ati, Esyoboha siwite ebyũna, nʼesyonyonyũ syʼomo kyanya siwite esyonyutu, nĩkwa Omugala wʼomundu siawite aho angagotserya omutwe wuwe.

²¹Nʼogundi mwiga mwamubwira ati, Mukama, uleke ngatsũka eriyata tata wage.

²²Nĩkwa Yesu mwamubwira ati, Unyikwame. Uleke abaholĩ bate abaholĩ babo.

²³Neryo Yesu abere ingira omo bwato, abiga buwe mobamukwama.

²⁴Neryo ekihunga kinene mokyahuluka omo ngetsi, kyaleka ebisunda ĩbyakũnĩnga obwato. Nĩkwa Yesu abya agotsere.

²⁵Neryo abiga mobahĩka uku Yesu, mobamũbũkya bati, Mukama, ũtũlamaye! Tukahwa!

²⁶Neryo Yesu mwabwirabo ati, Busana nakĩ mukubaha kwehĩ? ĩnywe bandu bʼerĩkĩrya ĩke! Neryo Yesu mwahangana, mwakunga ekihunga nʼengetsi, neryo mohahita esĩsyerere.

²⁷Neryo abandu mobasweka bati, Omundu oyũ ni wa mũsĩndokĩ kwehĩ? Ekihunga nʼengetsi bikamukenga!

²⁸Neryo Yesu mwahĩka eyisirya wʼengetsi omo kihugo kyʼAbagerase. Nĩkwa abandu babiri abali kwʼesyombĩnga mobahĩndana na Yesu ĩbakalũa eyiri amasinda. Babya kakalĩre kutsibu isihali mundu oyukatoka erilaba omo nzira eyo.

²⁹Neryo lebaya, abandu abo mobalaka bati, Tuli na mwatsi wahi nawe, uwe Mugala wa Nyamuhanga, kwehĩ? Ũkahĩka hano erĩtwagalya embere wʼomugulu kwehĩ?

³⁰Neryo hakũhĩ nʼaho habya ekihangulo kyʼesyongulube nyingi isikalya ebiti.

³¹Esyombĩnga esyo mosyalemba-lemba Yesu siti, Wamabya ukandituhigira eyĩhya, ututume omo kihangulo kyʼesyongulube.

³²Neryo Yesu mwabũga nasyo ati, Mugende! Nasyo mosyalũa kubo, mosyaya omo syongulube, neryo ekihangulo kyosĩ mokyatibita ahasenzere omo ngetsi mosyaholera omo magetsi.

³³Neryo abalĩsya mobatibita, mobaya oko mũyĩ, mobatũla omwatsi gosĩ, nʼomwatsi wʼabandu ababya kwʼesyombĩnga.

³⁴Neryo abandu bosĩ bʼoko mũyĩ oyo mobayahĩndana na Yesu; nʼomugulu bamulolako mobamulemba-lemba bati, alũe omo kihugo kyabo.