Read nande Marĩko 11 Bible Online

Marĩko 11 - nande bible

Marĩko 11

¹Neryo babere bakasonda erĩhĩka eYerũsalema, oko mĩyĩ yʼeBetefage nʼeBetanĩa mobahĩka oko kitwa kyʼeMĩzeĩtũnĩ. Neryo Yesu mwatuma abiga buwe babiri embere,

²ati, Muye oko kayĩ akali embere kwĩnywe. Mwamabĩhĩkayo mũkandĩeya ekyana kyʼepunda ĩkĩnahangĩre ekitekyataheka mundu okwʼĩtsũka na kera. Mukihangule, mukirete eno.

³Omundu amabũga nenyũ ati, Mukakola mutya busana nakĩ, mumubwire muti, Omukama yuli nʼobwaga bwakyo, nʼomwenyekyo asyakituma eno yo lũba.

⁴Neryo mobagenda mobeya ekyana kyʼepunda omo nzira ĩkĩhangĩre oko lũkyo lwʼenyũmba. Neryo mobahangulakyo.

⁵Neryo ababya bimene hakũhĩ mobabũlya abiga abo bati, Mukahangulira ekyana kyʼepunda ekyo kyokĩ?

⁶Abiga abo mobasũbĩryabo ngoko Yesu anabwirabo, neryo abandu abo mobahamulabo bati bagende.

⁷Neryo mobaleta ekyana kyʼepunda uku Yesu, neryo mobĩkĩrya kukyo kwʼesyongimba syabo, na Yesu mwĩkala kukyo.

⁸Neryo abandu bangi mobasanza esyongimba syabo omo nzira, nʼabandi mobatwa ebisanza omolĩ neryo mobasanzabyo omo nzira.

⁹Neryo abandu ababya embere nʼabakwamĩrebo enyũma, mobatsũka eribirikira bati, Nyamuhanga apipawe! Nyamuhanga atsumule oyukasa omo lĩna lyʼomukama!

¹⁰Nyamuhanga atsumule obwami bwa tata wetu Dawĩdĩ obukasa! Nyamuhanga Wʼendata Kutsibu apipawe.

¹¹Neryo Yesu mwingira omo mũyĩ wʼeYerũsalema, mwingira nʼomo Hekalũ mwatungerera ebyosĩ byabyamo. Nĩkwa bwabere bwasonda erihumbera, mwaya eBetanĩa haguma nʼabiga ĩkũmĩ nʼababiri.

¹²Nʼengyakya, omugulu balũa eBetanĩa, Yesu mwakwa enzala.

¹³Neryo mwalangira omuti wʼomũtĩnĩ iniane hali, omuti oyo abya ahũtĩre kutsibu. Neryo mwayasonda-sonda ebĩgũma byo kugo; nĩkwa abere ahĩka kugo, mwabana ebikoma bisa, kusangwa sikyabya kirimo kyʼemĩtĩnĩ.

¹⁴Yesu mwabwira omuti wʼomũtĩnĩ oyo ati, Sihabye omundu wasyalya ebĩgũma ukʼuwe na kera. Nʼabiga buwe mobowa.

¹⁵Omugulu bahĩka eYerũsalema, Yesu mwingira omo Hekalũ neryo mwatsũka erihigira eyĩhya abosĩ ababya bakagula nʼerĩgũlĩrya omo Hekalũ. Mwaku bula ehimesa hyʼabakahĩnganaya esyofranka nʼebĩtũmbi byʼabagũlaya ehĩrĩkũkũ,

¹⁶kandi mwatalĩga omundu akaheka kindu akalaba omo Hekalũ.

¹⁷Neryo mwakangĩrĩrya bandu ati, Sĩkĩsakĩre kiti, Enyũmba yage yasyahulwa mo nyũmba yʼerisabiramo busana nʼebihanda byosĩ kwehĩ? Nĩkwa ĩnywe mwabiriyirayo mo bwĩkalo bwʼabanyeyĩ.

¹⁸Abahererĩ bakulu nʼabakangĩrĩrya bʼEmigambo mobowa ebyo, neryo mobatsũka erisonda-sonda enzira yʼerĩĩta Yesu. Nĩkwa mobamubaha kusangwa endeko yosĩ mobasweka busana nʼerĩkangĩrĩrya liwe.

¹⁹Neryo bwabere bwasonda erihumbera, Yesu nʼabiga buwe mobalũa omo mũyĩ.

²⁰Nʼomo ngyakya-ngyakya omugulu babya bakalaba omo nzira, mobalangira omuti wʼomũtĩnĩ. Omuti oyo iniabiriuma erĩtsũka oko mĩrĩhĩ.

²¹Neryo Petero mwibuka omwatsi wʼomũtĩnĩ, neryo mwabwira Yesu ati, Mũkangĩrĩrya, lebaya, omuti wʼomũtĩnĩ ogo watakira, abiriuma!

²²Yesu mwasũbĩryabo ati, Mubye nʼerĩkĩrĩrya uku Nyamuhanga.

²³Kwenene ngabũga nenyũ nyiti, Oyũkabũga nʼekitwa ekĩ ati, Ukulike, ugusawe omo ngetsi, isialitika-tika omo mutima wuwe, nĩkwa akĩkĩrĩraya ekyo akabũga ko kikandisyabererera, kyasyakoleka busana naye.

²⁴Kikaleka inababwira nyiti, Ebyosĩ ebyo mukasaba nʼerĩbũlya, mwĩkĩrĩraye ko mwabiribanabyo, nenyũ mwasyahabowabyo.

²⁵Nʼomugulu mukahangana mukasaba, mwamabya nʼomwatsi oko mundu mumubuyire. Tata wenyũ oyuli elubula, atoke eribabuyira amalolo wenyũ. [

²⁶Nĩkwa mwamatindabuyira abandi. Tata wenyũ oyuli elubula, siendisyababuyira amalolo wenyũ.]

²⁷Neryo mobaswahĩka eYerũsalema. Omugulu Yesu abya akalendera omo Hekalũ, abahererĩ bakulu nʼabakangĩrĩrya bʼEmigambo, nʼabakulu mobamũhĩkako,

²⁸mobamũbũlya bati, Ukakola emyatsi eyĩ omo hamũlĩ yahi kwehĩ? Kutse nindi yo wakuha ehamũlĩ erikola emyatsi eyĩ kwehĩ?

²⁹Yesu mwasũbĩryabo ati, Ngandĩbabũlya omwatsi muguma, nenyũ mũnyĩsũbĩraye, nage ngandibabwira nga nĩ hamũlĩ yahi ikaleka inakola emyatsi eyĩ.

³⁰Erĩbatĩsya lya Yoane lyalũa ewa Nyamuhanga kutse oko bandu kwehĩ? Mũnyĩsũbĩraye.

³¹Nabo mobatsũka erĩkanĩrya omo katĩkatĩ kabo bati, Twamabũga tuti, Lyalũa elubula, asyabũga ati, Busana nakĩ momũtĩkĩrĩrya Yoane kwehĩ?

³²Nĩkwa twamabũga tuti, Lyalũa oko bandu, mobubaha endeko, kusangwa abosĩ mobaganza Yoane bati nĩ mũmĩnyererĩ.

³³Neryo mobasũbĩrya Yesu bati, Sĩtwasĩ. Neryo Yesu mwabũga nabo ati, Nage sindiendibabwira nga ni hamũlĩ yahi ikaleka inakola emyatsi eyĩ.