Read nande Marĩko 12 Bible Online

Marĩko 12 - nande bible

Marĩko 12

¹Neryo Yesu mwatsũka erĩbũga nabo omo mĩsyo ati, Habya omundu oyo wahera eririma lyʼebĩnyũ, mwatĩmbya kulyo kwʼekĩyĩte, neryo mwatakula endindo eyʼerikamiramo ebĩnyũ, kandi mwahĩmbaho enyũmba eyĩsũngũlĩkĩre. Neryo mwasĩgĩralyo abalĩmĩ, neryo mwaya omo kindi kihugo.

²Omugulu wʼeriera lyʼebĩnyũ abere ahĩka, mwatuma omugombe oko balĩmĩ abo erienda oko bĩgũma byʼeririma lyʼebĩnyũ.

³Nĩkwa abalĩmĩ abo mobahamba omugombe oyo mobamũswĩrya nʼerĩmũsũbũlya byala bisa.

⁴Neryo Omwenye eririma mwaswatuma ogundi mugombe; abalĩmĩ abo mobamũhũtalya oko mutwe, nʼerimuhemula.

⁵Kandi omwenyeryo mwaswatuma ogundi mugombe, neryo mobamwĩta; kandi mobakola bandi bagombe bo batya, erĩswĩrya abandi nʼerĩĩta abandi.

⁶Omwenye eririma oyo abya isiakiri nʼogundi mundu wʼeriswatuma, yo nʼomugala mwanze. Neryo mwasala atuma omugala wuwe oyo oko balĩmĩ abo. Mwabũga ati, Basyasĩkya mugala wage.

⁷Nĩkwa abalĩmĩ abo mobabwirana bati, Oyũ ni mugala wʼomwenye eririma. Mwase, tũmwĩte, nʼeririma lyasyabya lyetu!

⁸Neryo mobahamba mugala mobamwĩta, nʼerimukurira eyĩhya wʼeririma lyʼebĩnyũ.

⁹Yesu mwabũlya ati, Omwenye eririma lyʼebĩnyũ asyayira ati kwehĩ? Asyasa nʼerĩherya abalĩmĩ abo, asyaha eririma eryo lyʼebĩnyũ lyʼoko bandi balĩmĩ.

¹⁰Simwetasoma Amasako aya ati, Erĩbwe eryo abahĩmbĩ bagana, Erĩ molyabya ĩbwe lyʼesondo;

¹¹Omwatsi oyũ Omukama mwakolago, Ni wʼeriswekera omo meso wetu.

¹²Abasondolĩ bʼAbayũda mobasonda-sonda erihamba Yesu, kusangwa mobaminya kwʼakatwa omũsyo oyo busana nabo. Nĩkwa mobubaha endeko, neryo mobamũsĩgaho mobagenda.

¹³Abandi bʼoko Bafarĩsayo nʼAbanyaherode mobatumwa eritega Yesu omo bĩnywa.

¹⁴Neryo mobasa eyiri Yesu mobamũbũlya bati, Mũkangĩrĩrya, tũnasĩ kʼuli wʼekwenene, sulitsomana amalengekanĩa wʼabandu, kandi sulisombola ebitaga nʼebite bitaga, nĩkwa ũkakangĩrĩraya enzira ya Nyamuhanga omo kwenene. Emigambo ĩkatũlĩgĩra erisolera Kaĩsarĩ kutse iyihi kwehĩ? Tumulihe kutse iyihi kwehĩ?

¹⁵Nĩkwa Yesu mwaminya amatebo wabo, neryo mwabwirabo ati, Busana nakĩ mukanyirengako kwehĩ? Munyiretere edĩnarĩ nyĩrebayeyo.

¹⁶Neryo mobamuleterayo, naye mwabũlyabo ati, Ekĩsosekanĩo nʼamasako aya ni byandi kwehĩ? Nabo mobamũsũbĩrya bati, Ni bya Kaĩsarĩ.

¹⁷Neryo Yesu mwabwirabo ati, Mulihe Kaĩsarĩ ebindu bya Kaĩsarĩ, mulihe na Nyamuhanga ebindu bya Nyamuhanga. Nabo mobamuswekera kutsibu.

¹⁸Neryo Abasadũkayo mobahĩka uku Yesu. Aba bakabũga bati, Sihali erĩlũbũka oko baholĩ.

¹⁹Mobamũbũlya bati, Mũkangĩrĩrya, Musa mwatusakira ati, Omugala wabo mundu amahola akasiga omũkalĩ, atawite mwana, omugala wabo mundu oyo ĩnĩasĩgalya omũkalĩ oyo iniabutira mugala wabo yʼabana.

²⁰Mohabya bagala babo balinda; owʼerĩmbere mwahĩkya, neryo mwahola isialitabuta mwana.

²¹Neryo omugala wabo mundu oyo mwasĩgalya omũkalĩ oyo. Neryo mugala wabo wʼakasatu mwakola atya.

²²Neryo abagala babo bosĩ balinda mobahola batya isibalitabuta mwana. Neryo enyũma wʼabosĩ omũkalĩ oyo mwahola.

²³Neryo, oko kiro kyʼerĩlũbũka omugulu abaholĩ basyalũbũka, omũkalĩ oyo asyabya wandi kwehĩ? Kusangwa abalinda bosĩ babya ĩbabĩrĩmwĩmya.

²⁴Yesu mwasũbĩryabo ati, Simukatala kusangwa sĩmwasĩ Amasako kutse obũtokĩ bwa Nyamuhanga.

²⁵Kusangwa omugulu bakalũbũka oko baholĩ, sĩbehĩkaya kutse sĩbehĩkĩbawa, nĩkwa bali ngʼabamalaĩka omo lubula.

²⁶Nĩkwa oko mwatsi wʼerĩlũbũka lyʼabaholĩ, simwetasoma omo kitabu kya Musa oko mulondo owakahula ekisaka ekyaka kwehĩ? Ngoko Nyamuhanga abũga na Musa, ati, Ĩngye indi Nyamuhanga wa Abrahamũ, na Nyamuhanga wa Ĩsaka, na Nyamuhanga wa Yakobo.

²⁷Nyamuhanga si Nyamuhanga wʼabaholĩre, nĩkwa ni Nyamuhanga wʼabaliho. Mwabiritala kutsibu!

²⁸Omũkangĩrĩrya muguma wʼEmigambo abyaho iniakahulikirira erĩkanĩa lyabo. Neryo omũkangĩrĩrya wʼEmigambo oyo mwaminya ngoko Yesu abĩrĩsũbĩryabo ndeke, neryo mwabũlya Yesu ati, Ekihano ekĩlabĩre ebindi bihano ni kyahi kwehĩ?

²⁹Yesu mwamũsũbĩrya ati, Ekihano kikulu kyekĩ: Uwe Ĩsraelĩ, hulikirira; Omukama Nyamuhanga wetu ni Mukama ĩyowene.

³⁰Wanze Omukama Nyamuhanga wawe nʼomutima wawe gosĩ, nʼekĩrĩmũ kyawe kyosĩ, nʼobũlengekanĩa bwawe bosĩ, nʼamaka wawe gosĩ.

³¹Ekihano kyʼakabiri kiti, Wanze mũlĩkyenyũ ngoko ũyanzĩre. Sihali kindi kihano kikulu ũkwʼebĩ.

³²Neryo omũkangĩrĩrya wʼEmigambo oyo mwabwira Yesu ati, Mũkangĩrĩrya, utya! Wamabũga kwenene uti, Omukama ni Nyamuhanga ĩyowene kandi ko hate gundi nyamuhanga nina ye.

³³Nʼerianza Nyamuhanga nʼomutima gosĩ, nʼobũlengekanĩa bosĩ, nʼamaka gosĩ, nʼerianza mũlĩkyabo ngoko ayanzĩre, bĩlabĩre amahere gosĩ wʼerĩokererya, nʼesyohongo syosĩ.

³⁴Neryo omugulu Yesu aminya kwʼasũbĩraya ndeke mwamubwira ati, Suli hali oko Bwami bwa Nyamuhanga. Enyũma wʼaho mohatasyabya mundu oyo wangalenga erĩswabũlya Yesu eyindi myatsi.

³⁵Omugulu abya akakangĩrĩrya omo Hekalũ, Yesu mwabũlya ati, Abakangĩrĩrya bʼEmigambo bakabũga bati, Kristo ni mugala wa Dawĩdĩ ati kwehĩ?

³⁶Omũlĩmũ Abũyĩrĩre asondola Dawĩdĩ abũge ati, Omukama mwabwira Omukama wage ati, Wĩkale oko byala byage byʼamali, Erĩhĩka aho nasyahĩrĩra esyonzĩgũ syawe eyĩkwa oko bisando byawe.

³⁷Dawĩdĩ mwamwahula mo Mukama: neryo Kristo angatoka eribya mugala wa Dawĩdĩ ati kwehĩ? Endeko nene eyo moyatsema erĩowa Yesu.

³⁸Neryo omugulu abya akakangĩrĩryabo mwabũga ati, Mũyĩtegaye busana nʼabakangĩrĩrya bʼEmigambo abakanza erirendera ibanambite esyokanzu syabo nyiri-nyiri, ĩbanzĩre erĩkerĩbwa omo hitale;

³⁹ibakayisoga ebĩtũmbĩ byʼembere omo manyũmba wʼerĩhĩndanamo, nʼahʼerĩsĩkĩbwa okwʼirya.

⁴⁰Bo bakanũbaya abakwakalĩ nʼerinyega amanyũmba wabo, neryo busana nʼerilolwako nʼabandu bakasaba erisaba liri-liri. Aba basyasũyĩrwa kutsibu kwʼaho.

⁴¹Yesu mwĩkala hakũhĩ nʼekĩbo kyʼeribika esyofranka omo Hekalũ, neryo mwabya akalebya ngoko endeko yabya ĩkahĩra esyofranka syabo omo kĩbo ekyo. Kandi abandu bʼebindu bingi mobahĩramo esyofranka nyingi.

⁴²Neryo omũkwakalĩ mwera mwahĩka kukyo mwahĩra esyosentĩ ĩbĩrĩ, ini sengĩ nguma.

⁴³Neryo Yesu mwabirikira abiga buwe haguma, mwabwirabo ati, Kwenene ngababwira nyiti, Omũkwakalĩ oyũ amahĩra omo kĩbo mo bingi kwilaba abandi bosĩ.

⁴⁴Kusangwa abandi bosĩ mobakahĩramo busana nʼebindu byabo bingi, nĩkwa iye omo bwera buwe mwakahĩramo ebyosĩ awite, mwakaha ebyosĩ alwe awite ebyo angalĩre.