Read nande Marĩko 15 Bible Online

Marĩko 15 - nande bible

Marĩko 15

¹Neryo omo ngyakya-ngyakya, abahererĩ bakulu, nʼabakulu, nʼabakangĩrĩrya bʼEmigambo, nʼabʼomwʼĩbũgĩro bosĩ mobahĩndana omo mbĩta. Neryo mobaboha Yesu yʼomo mahulula, mobamutwala eyiri Pilato.

²Neryo Pilato mwamũbũlya ati, Uli mwami wʼAbayũda kwehĩ? Yesu mwamũsũbĩrya ati, Wamabũgakyo,

³Neryo abahererĩ bakulu mobamũhandĩkĩrĩrya emyatsi mingi.

⁴Kandi Pilato mwaswamũbũlya ati, Sũlĩsũbĩraya kwehĩ? Lebaya ngoko bakakũhandĩkĩrĩraya emyatsi mingi.

⁵Nĩkwa Yesu mwataswasũbĩryabo kĩnywa, kyaleka Pilato iniasweka.

⁶Nĩkwa oko Kiro Kikulu ekyo Pilato abya akaboholera bandu omundu muguma wʼomũlĩkĩ oyo banzĩre.

⁷Neryo omundu oyo wabya akahulwa mo Baraba abya iniabiribohwa haguma nʼabandu abaleta Obwanĩse.

⁸Nʼendeko mobabũlya Pilato bati akole ekyo atula akakolerabo.

⁹Neryo Pilato mwasũbĩryabo ati, Mũnanzĩre inababoholera Omwami wʼAbayũda kwehĩ?

¹⁰Kusangwa abya asĩ ngoko abahererĩ bakulu bamuhotera busana nʼerimutsura.

¹¹Nĩkwa abahererĩ bakulu mobatsotsererya endeko bati babũlaye Pilato ababoholere ye Baraba, butsira Yesu.

¹²Neryo Pilato mwaswabwira endeko ati, Ngandikolakĩ nʼomundu oyo mukahula mo Mwami wʼAbayũda kwehĩ?

¹³Nabo mobaswabũga kutsibu bati, Abambawe oko musalaba!

¹⁴Nĩkwa Pilato mwabũlyabo ati, Amakola kibi kyahi kwehĩ? Nĩkwa mobalabĩrĩrya emirenge yabo bati, Abambawe oko musalaba!

¹⁵Neryo Pilato iniakasonda erĩtsemesya endeko mwaboholerabo ye Baraba. Neryo mwahamula ati, Yesu aswĩrĩbawe emikoba, nĩkwa mwahereryabo Yesu ati abambawe oko musalaba.

¹⁶Neryo abasĩrĩkanĩ mobatwala Yesu omo muhana wʼekikali kyʼomũtabalĩ mukulu, neryo mobabirikira omulondo gosĩ wʼabasĩrĩkanĩ.

¹⁷Mobambalya Yesu yʼolukimba lwʼomunyama, kandi mobaluka embĩta yʼamahwa, mobahĩrayo oko mutwe wuwe.

¹⁸Mobatsũka erĩmũbũkya bati, Ukote, uwe Mwami wʼAbayũda!

¹⁹Kandi mobamũswĩrya ngendo-ngendo oko mutwe omo luseke, mobamũtwĩra kwʼamatande, mobamũkũkamira nʼerĩũnama embere siwe.

²⁰Neryo babere babĩmũsekererya mobamwambula ekanzu yʼOmunyama, mobamwambalya esyongimba siwe. Neryo mobamusondola eriyamubamba oko musalaba.

²¹Nĩkwa omo nzira mobahamba Sĩmonĩ akalaba, ĩnĩakalũa omolĩ, mobamũhekya omusalaba wa Yesu, oyo abya Sĩmonĩ wʼeKũrene, ĩse wa Alesandũro na Rũfũ.

²²Neryo mobaleta Yesu yʼahakahulawa mo Golgota, kiti: Aherĩhanga.

²³Neryo mobalenga erimuha ebĩnyũ ĩbĩnatũlũngene nʼamane-mane, nĩkwa Yesu mwagana erĩpũlyabyo.

²⁴Nĩkwa mobabamba Yesu oko musalaba, kandi mobagaba esyongimba siwe omo katĩkatĩ kabo, ibakakanga obukanga esyongimba nga sibye syandi.

²⁵Nĩkwa omugulu babamba Yesu yabya saa ĩsatu.

²⁶Nʼerihandika lyʼerimuhandikirira lyabya lĩsakĩre endata oko musalaba liti, omwami wʼAbayũda.

²⁷Kandi mobabamba abanyeyĩ babiri oko misalaba kuguma na Yesu, omuguma oko luhande lwʼamali, nʼogundi oko luhande lwʼamalembe. [

²⁸NʼAmasako mwabererera awakabuga ati, Mwaganzwa haguma nʼabakola-nabi.]

²⁹Kandi abandu ababya bakalaba mobamutsuma, mobatsinga-tsĩngya emitwe yabo bati, Si haho! Wamabya ũkandĩsyahĩmbũla eHekalũ nʼerĩswahĩmbayo omo biro bisatu.

³⁰Ũyĩlamaye, ũkĩme oko musalaba!

³¹Nibya abahererĩ bakulu haguma nʼabakangĩrĩrya bʼEmigambo mobasekererya Yesu batya omo katĩkatĩ kabo bati, mwalamya abandi, nĩkwa sialitoka erĩyĩlamya.

³²Muleke Kristo, Omwami wa Ĩsraelĩ, akĩme lino alũe oko musalaba, tulangire kandi twĩkĩrĩraye! Kandi ababambawa kuguma naye mobamutsuma.

³³Neryo esaa ndatu yabere yahĩka, omwĩrĩmya mwabya oko kihugo kyosĩ erĩhĩka oko saa mwenda.

³⁴Neryo oko saa mwenda Yesu mwayilakira nʼomulenge munene ati, Eloĩ, Eloĩ. Lama Sabaktanĩ? kiti, Nyamuhanga wage, Nyamuhanga wage, busana nakĩ ũkanyĩsĩganaya kwehĩ?

³⁵Abandi bandu ababya bimeneho bakahulikirira, mobabũga bati, Lebaya, akabirikira Elĩa!

³⁶Neryo omundu muguma mwatibita mũsũlya embũhũma omo pada, neryo mwahĩrayo oko luseke; Neryo mwahayo Yesu erĩpũlyayo ati, Tulinde! Tũlebaye Elĩa ngʼakandiasa nʼerimuhanula!

³⁷Neryo Yesu mwabirikira nʼomulenge munene, neryo mwalekula.

³⁸Neryo olukimba olũkasũkũlĩraya olʼomo Hekalũ molwasatĩbwa mo bihande bibiri erĩtsũka endata erĩhĩka ahisi.

³⁹Neryo omugulu omukulu wʼabasĩrĩkanĩ oyo wabya ahangene hakũhĩ na Yesu, alangira ngoko Yesu abirikira nʼerihola, mwabũga ati, Kwenene, omundu oyũ alwe Mugala wa Nyamuhanga!

⁴⁰Abakalĩ babyaho nibya, ĩbakalebaya ibali hali. Marĩa Magdalene abya nabo, na Marĩa nyĩnya wa Yakobo mulere, na Yose, na Salome.

⁴¹Babya bakakwama Yesu nʼerimukolera omugulu abya eGalĩlaya; kandi habya abandi bakalĩ bangi abahetukira eYerũsalema haguma na Yesu.

⁴²Neryo bwabya ĩgolo-golo omugulu Yosefũ wʼeArĩmatea ahĩka.

⁴³Yosefũ abya mundu ũkengenĩe omwʼĩbũgĩro iniakalinda Obwami bwa Nyamuhanga. Ekiro ekyo kyabya kiro Kyʼerĩkokotya busana nʼeSabato. Neryo Yosefũ mwahanda omutima mwaya eyiri Pilato erĩbũlya omubiri wa Yesu.

⁴⁴Neryo Pilato mwasweka erĩowa ko Yesu abirihola. Neryo mwabirikira omukulu wʼabasĩrĩkanĩ mwabũlya ati Yesu ngʼabirihola.

⁴⁵Neryo Pilato abere abĩowa ebĩnywa byʼomukulu wʼabasĩrĩkanĩ oyo, mwaha Yosefũ yʼomubiri wa Yesu.

⁴⁶Neryo Yosefũ mwayagula olukimba lwʼekĩtanĩ, neryo mwalũsya Yesu yʼoko musalaba, mwamũlĩngĩra omo lukimba lwʼekĩtanĩ olo, neryo mwamũhĩra omo yisinda eyabatsawa omwʼĩbwe. Neryo mwakũmbagalĩrya erĩbwe rĩnene oko lũkyo lwʼeyisinda.

⁴⁷Ye Marĩa Magdalene na Marĩa nyĩnya wa Yose, babya bakalebya aho Yesu ahĩrawa.