Read nande Marĩko 2 Bible Online

Marĩko 2 - nande bible

Marĩko 2

¹Enyũma wʼebindi biro Yesu mwaswahĩka eKapernaũmũ, neryo abandu mobowa engulu yiwe kwʼali omo nyũmba mwʼeka.

²Neryo abandu bangi mobahĩndanaho isihakiri mwanya, kutse nʼahakũhĩ nʼolũyĩ. Neryo Yesu mwakangĩrĩryabo.

³Neryo abandu bani mobamuletera omundu oyũbasĩre.

⁴Nʼomugulu bataluka erĩkolya omundu oyo yʼuku Yesu busana nʼendeko, mobatobola olutwe lwʼendata aho Yesu abya. Neryo babere babitula hʼomwanya, mobandagalya hʼomundu oyũbasĩre iniane oko ngyingo.

⁵Neryo Yesu, omugulu alangira erĩkĩrĩrya lyabo, mwabwira omundu oyũbasĩre ati, Mwana wage, ebibi byawe byamabibuyirwa.

⁶Nĩkwa abandi bʼoko bakangĩrĩrya bʼEmigambo ababya bĩkereho mobaganĩrya omo mitima yabo bati,

⁷Ko mundu oyũ akabũga atya busana nakĩ? Akatsuma? nindi wangatoka eribuyira ebibi ate Nyamuhanga ĩyowene kwehĩ?

⁸Neryo-neryo Yesu ĩnĩanasĩ omo mutima wuwe amalengekanĩa wabo mwabũlyabo ati, Ko busana nakĩ mũkaganĩraya emyatsi eyĩ yʼomo mitima yenyũ kwehĩ?

⁹Kwe kyolo ni kyahi, eribwira omundu oyũbasĩre nyiti, Ebibi byawe byamabibuyirwa, kutse erĩbũga nyiti, Hangana, wĩmaye engyingo yawe, ugende?

¹⁰Nĩkwa mutoke eriminya ngoko Mugala wʼomundu awite ehamũlĩ munakihugo eribuyira ebibi, neryo mwabwira omundu oyũbasĩre ati,

¹¹Ngakubwira nyiti, Hangana, wĩmaye engyingo yawe ugende eka wenyũ!

¹²Neryo-neryo omundu oyo mwahangana, mwĩmya engyingo yiwe, mwahuluka omo meso wabo abosĩ. Neryo abosĩ mobasweka kutsibu, mobapipa Nyamuhanga bati, Sitwetwatalangira ekiri ngʼekĩ na kera.

¹³Neryo Yesu mwasuba oko mũsĩke wʼengetsi yʼeGalĩlaya. Nĩkwa endeko moyamũhĩkako, naye mwatsũka erĩkangĩrĩryabo.

¹⁴Neryo Yesu abere akalaba, mwalangira omũsolesya, ye Lawĩ, mugala wa Alufayo, ĩnĩanĩkere aho bakasoleseraya. Neryo Yesu mwamubwira ati, Unyikwame. Neryo Lawĩ mwahangana, mwamukwama.

¹⁵Nʼenyũma wʼaho Yesu mwabya akalira omo nyũmba ya Lawĩ. Nʼabasolesya bangi nʼabakola-nabi babya bakalya haguma na Yesu nʼabiga buwe, kusangwa abakamukwama babya bangi.

¹⁶Nʼomugulu abakangĩrĩrya bʼEmigambo bʼAbafarĩsayo balangira ko Yesu akalya haguma nʼabasolesya nʼabakola-nabi, mobabũlya abiga buwe bati, Busana nakĩ akalya haguma nʼabasolesya nʼabakolanabi kwehĩ?

¹⁷Neryo Yesu abere owa, mwasũbĩryabo ati, Abakalĩre sibali nʼobwaga bwʼomunganga, nĩkwa abalwere basa. Sinasa eribirikira abatunganene, nĩkwa abakola-nabi.

¹⁸Neryo abiga ba Yoane Mũbatĩsya nʼAbafarĩsayo babya bakatsira akalyo. Neryo abandu mobahĩka uku Yesu, mobamũbũlya bati, Abiga ba Yoane Mũbatĩsya, nʼabiga bʼAbafarĩsayo bakatsira akalyo, nĩkwa abiga bawe sibetsira kalyo busana nakĩ kwehĩ?

¹⁹Neryo Yesu mwasũbĩryabo ati, Kwʼabĩra bʼĩba wʼomũherũkĩ banganatoka eritsira akalyo omugulu ali nabo kwehĩ? Iyihi. Nĩkwa omugulu ĩba wʼomũherũkĩ akine nabo sibetoka eritsira akalyo.

²⁰Nĩkwa ebiro byasyahĩka omugulu ĩba gʼomũherũkĩ asyalũsĩbwa kubo; neryo oko mugulu oyo basyatsira akalyo.

²¹Sihali mundu oyukalandira ekitomeko kihya-kihya oko lukimba lwa kera; amayira atya, ekitomeko kikatahuka oko lukimba lwa kera, ilwatulika kwilaba erĩmbere.

²²Kutse sihali mundu oyũkũtũlĩra ebĩnyũ bihya-bihya byʼomo bihu bikulu-kulu byʼebĩnyũ. Amayira atya, ebĩnyũ bikatula ebihu, nʼebĩnyũ haguma nʼebihu ibyatsanda. Nĩkwa ebĩnyũ bihya-bihya bĩkahĩrawa omo bihu bihya-bihya byʼebĩnyũ.

²³Yesu abere akalaba omo malima wʼengano oko kiro kyʼeSabato. Abiga buwe babya haguma naye, neryo mobatsũka erĩtwa amakũndĩ wʼengano.

²⁴Neryo Abafarĩsayo mobabwira Yesu bati, Lebaya, abiga bawe bakakola ebyo Migambo ĩkaganaya erikola omo Sabato.

²⁵Yesu mwasũbĩryabo ati, Simwetasoma ekyo Dawĩdĩ nʼabandu buwe bakola omugulu abya nʼobwaga nʼerĩkwa enzala kwehĩ?

²⁶Ngoko ingira omo nyũmba ya Nyamuhanga nʼerirya oko mandu awahigulawa busana na Nyamuhanga. Emigambo ĩkaganaya abandu erirya kugo, ba nʼabahererĩ basa. Nĩkwa Dawĩdĩ mwalyago, kandi mwahago oko bandu buwe nibya. Dawĩdĩ akola atya oko mugulu wa Abĩatarĩ omũhererĩ mukulu oko bahererĩ bosĩ.

²⁷Neryo Yesu mwabũga ati, eSabato yahĩrawa busana nʼerĩwatĩkya abandu. Abandu mobatayirwa busana nʼeSabato.

²⁸Litya Omugala wʼomundu ni Mukama wʼeSabato.