Read nande Marĩko 4 Bible Online

Marĩko 4 - nande bible

Marĩko 4

¹Kandi Yesu mwatsũka erĩswakangĩrĩrya oko mũsĩke wʼengetsi. Neryo endeko eyahĩndana hakũhĩ naye yabya nene kutsibu, kyaleka inĩngira omo bwato nʼerĩĩkala mubo. Obwato obo bwabya omo ngetsi nĩkwa endeko yabya yimene oko mũsĩke wʼengetsi.

²Yesu mwakangĩrĩryabo emyatsi mingi omo mĩsyo, neryo omwʼĩkangĩrĩrya liwe mwabwirabo ati,

³Muhulikirire! Omũbĩbĩ mwayabiba embuto.

⁴Nʼomugulu abiba, esindi mbuto mosyatogera oko mũsĩke wʼenzira, nʼesyonyonyũ mosyasa nʼeritomengerasyo.

⁵Esindi mosyatogera oko kitaka kyʼamabwe, ahate mukungu mungi. Esyombuto esyo mosyalasa lũba, kusangwa omutaka si mungi.

⁶Neryo eryuba lyabere lyakola, molyahĩsyasyo, neryo kusangwa emĩrĩhĩ yabya mike-mike, mosyuma.

⁷Esindi mbuto mosyatogera omo mahwa, nʼamahwa ayo mwalasa mwakũsyasyo, mositasohola.

⁸Nĩkwa esindi mbuto mosyatogera omo kitaka kyowene mosyalasa, mosyaboga-boga mosyasohola. Esindi mosyabuta embuto ngendo makũmĩ asatu, nʼesindi amakũmĩ ndatu, nʼesindi ngendo ĩgana.

⁹Nĩkwa Yesu mwabũga ati, Oyuwite amatwĩ wʼerĩowa, owe.

¹⁰Kandi omugulu Yesu abya ĩyowene, abamukwama haguma nʼabiga buwe ĩkũmĩ nʼababiri mobamũhĩkako bakamũbũlya busana nʼemĩsyo eyo.

¹¹Yesu mwasũbĩryabo ati, ĩnywe mwabirihabwa eriminya erĩkũmbo lyʼobwami bwa Nyamuhanga, nĩkwa abandi, abate netu, bakowa emyatsi yosĩ mo mĩsyo.

¹²Litya, Ibatoka erilangira, nĩkwa sĩbalangĩre, Ibatoka erĩowa kandi, nʼerĩowa sibaminye, Bakayabindukira Nyamuhanga, Naye iniabuyirabo.

¹³Neryo Yesu mwabũlyabo ati, Simwetaminya omũsyo oyũ kwehĩ? Neryo mwasyaminya emĩsyo yosĩ yo muti kwehĩ?

¹⁴Omũbĩbĩ akabiba ekĩnywa kya Nyamuhanga.

¹⁵Abandi bandu bali ngʼekĩnywa kikabibawa oko na nzira; nʼomugulu bakowakyo, Satanĩ ĩkahĩka nʼerĩlũsya ekĩnywa ekyabiribibwa omwisi wabo.

¹⁶Abandi bandu bali ngʼesyombuto esyatogera oko kitaka kyʼamabwe. Omugulu bakowa ekĩnywa bakalĩgakyo nʼobutseme.

¹⁷Nĩkwa sikiribya omwisi wabo mo hali ngʼomũlĩhĩ, neryo kikabya mo katambĩ kake. Neryo omugulu obũlĩge kutse erĩendererya bĩkahĩka busana nʼekĩnywa ekyo, bakakireka lũba!

¹⁸Abandi bandu bali ngʼesyombuto esyabibawa omo mahwa. Abo bakowa ekĩnywa ekyo,

¹⁹nĩkwa amagalĩ wʼekihugo nʼamatebo wʼebindu, nʼesyongumbu syʼebindi bindu bikingira ĩbyakũsya ekĩnywa, neryo ikitasohola.

²⁰Nĩkwa abandi bandu bali ngʼembuto eyabibawa oko kitaka kyowene. Bakowa ekĩnywa ekyo nʼerĩrĩgakyo ĩberya esyombuto; eyindi mbuto ngendo makũmĩ asatu, eyindi ngendo makũmĩ ndatu, eyindi engendo erĩgana.

²¹Kandi Yesu mwabwirabo ati, Etala ikaletawa busana nʼerihĩrayo omwisi wʼekitiri kutse eyĩkwa oko ngyingo kwehĩ? Omundu sialĩhĩrayo oko mbaniko kwehĩ?

²²Kusangwa sihali ekĩbĩsamĩre ekitendisyamĩnyĩkalĩbwa, kutse sihali erĩkũmbo eritendisyakũmbũlwa.

²³Omundu amabya awite amatwĩ wʼerĩowa, owe.

²⁴Kandi mwabũga nabo ati, Muyirenge busana nʼebyo mũkowa. Olulengo olo mukalengamo, lo Nyamuhanga asyabalengeramo. Kandi asyakola kwilaba aho.

²⁵Omundu oyuwite ekindu asyahabwa ebindi; nʼomundu oyutawitekĩ, asyasagulwa nʼekyo alwe awite.

²⁶Yesu mwabũga ati, Obwami bwa Nyamuhanga bulingene nʼomundu oyukabiba embuto yʼomwʼirima liwe.

²⁷Akagotsera omo kiro, kandi iniabuka engyakya, nĩkwa esyombuto esyo sikalasa nʼerikula. Nĩkwa sĩasĩ nga sikakula siti.

²⁸Ekitaka kikaleka emyaka eyo iyalasa nʼeriera. Erĩmbere emigera ikahuluka, enyũma wʼaho ikasohola, nʼenyũma wʼaho amakũndĩ awerĩre.

²⁹Omugulu engano ikera omundu akatsũka erigesa, kusangwa obugese bwamahĩka.

³⁰Neryo Yesu mwabũlya ati, Twangalĩngĩrĩranĩa Obwami bwa Nyamuhanga bo nakĩ kwehĩ? Kutse tũswetwa mũsyo wahi busana nʼerĩkũmbũlabo kwehĩ?

³¹Bulingene nʼembuto yʼeharadalĩ eyo mundu abiba omo kitaka kandi ni inge kwilaba esyombuto syosĩ sya muna-kihugo.

³²Neryo ikalasa iyabya nene kwilaba emyaka yosĩ. Ĩkalasaya emitahi minene-minene nʼesyonyonyũ syʼomo kyanya sikatoka erĩhĩmba esyonyutu syasyo syʼomo kĩtsũtsũ kyayo.

³³Yesu mwakangĩrĩrya bandu bʼekĩnywa ekyo, iniakagusa emĩsyo mingi eyiri ngʼeyĩ. Mwatũlĩrabo ekĩnywa ekyo ngoko batoka erĩowakyo.

³⁴Kandi mwatabũga nabo atetwĩrabo mũsyo; nĩkwa omugulu abya nʼabiga buwe, mwakũmbũlĩrabo emyatsi yosĩ.

³⁵Oko kiro ekyo omwʼĩgolo-golo Yesu mwabwira abiga buwe ati, Tusokere eyisirya wʼengetsi.

³⁶Neryo mobasĩga endeko, nʼabiga mobingira omo bwato obo Yesu abyamo, mobamutwala haguma nabo. Nʼawandi mato abyaho nibya.

³⁷Neryo erigunga ĩnene lyʼekihunga molyahĩka nʼebisunda mobyayikuba omo bwato, nʼobwato mobwasonda erĩũsũla.

³⁸Nĩkwa Yesu abya enyũma omo bwato ĩnĩayĩreto oko kisegemero. Abiga mobamũbũkya bati, Mũkangĩrĩrya, sigututsomene ko tukahwa kwehĩ?

³⁹Neryo Yesu mwahangana mwakunga ekihunga, kandi mwabwira engetsi ati, Huna, ubye bũkũtũ! Nʼekihunga mokyũmbya, mohahita esĩsyerere.

⁴⁰Neryo Yesu mwabwirabo ati, Mukubaha busana nakĩ kwehĩ? Busana nakĩ simuwite erĩkĩrĩrya kwehĩ?

⁴¹Nĩkwa mobubaha kutsibu ibakabwirana bati, Omundu oyũ nindi kwehĩ? Eki hunga nʼengetsi bikamukenga!