Read nande Marĩko 5 Bible Online

Marĩko 5 - nande bible

Marĩko 5

¹Neryo mobahĩka eyisirya wʼengetsi yʼeGalĩlaya, omo kihugo kyʼAbagerase.

²Nĩkwa abere anabĩlũa omo bwato, neryo-neryo mwahĩndana nʼomundu oyo wabya kwʼekĩrĩmũ kibi akalũa eyiri amasinda.

³Omundu oyo abya ĩkere eyiri amasinda. Isihali mundu wangatoka erimuboha nomo angabya nʼamahulula.

⁴Kusangwa esyongendo nyingi iniakabohawa oko bisando nʼebyala omo misege nʼamahulula, nĩkwa ĩnĩakatwa mahulula nʼerĩtsũtsanga emisege eyabya oko bisando biwe. Abya nʼamaka manene, isihali mundu wangamutoka.

⁵Omo kiro nʼomo musibo iniakalendera oko sisinda nʼoko bitwa, iniakayibirikirako nʼerĩyĩhũtangalya omo mabwe.

⁶Nĩkwa mwalangira Yesu iniakine hali, neryo mwanguha mwasa mwamũkũkamira,

⁷mwalaka nʼomulenge munene ati, Indi na mwatsi wahi nawe, uwe Yesu, Mugala wa Nyamuhanga Wʼendata Kutsibu kwehĩ? Ngakulemba-lemba busana na Nyamuhanga sũnyagalaye!

⁸Abũga atya kusangwa Yesu iniakabwirakyo ati, Uwe kĩrĩmũ kibi, Ũlũe oko mundu oyũ.

⁹Neryo Yesu mwabũlyakyo ati, Erĩna lyawe uwendi kwehĩ? Naye mwamũsũbĩrya ati, Erĩna lyage ĩngye Milondo; kusangwa tuli bangi.

¹⁰Kandi mwalemba-lemba Yesu ati, siahigebyo erĩlũsyabyo omo kihugo ekyo.

¹¹Nĩkwa ekihangulo kinene kyʼesyongulube kyabya hakũhĩ, isikalira aho hʼoko kitwa.

¹²Nʼebĩrĩmũ bibi ebyo mobyalemba-lemba Yesu biti, Ututume omo syongulube twingire musyo.

¹³Neryo mwalĩgĩrabyo. Nʼebĩrĩmũ bibi ebyo mobyalũa omo mundu oyo, mobingira omo syongulube, nʼekihangulo kyosĩ mokyagaramukalira omo ngetsi, kandi syabya nga elfu ĩbĩrĩ, mosyasendera omo ngetsi.

¹⁴Neryo abalĩsya basyo mobatibita, mobayatũlago omo mũyĩ nʼomo kihugo ekyo. Neryo abandu mobahĩka erĩyalebya ekyabere.

¹⁵Mobahĩka uku Yesu mobalebya omundu oyo wabya kwʼesyombĩnga nyingi, ĩnĩanĩkere, inianambite, iniabiribya mundu wʼobũlengekanĩa, neryo abosĩ mobubaha.

¹⁶Neryo abandu abalangira ebyabya, mobabwirabo ebyahĩka oko mundu oyo wabya kwʼesyombĩnga, nʼomwatsi wʼesyongulube.

¹⁷Neryo mobatsũka eriremba-lemba Yesu bati alũe omo kihugo kyabo.

¹⁸Neryo omugulu Yesu abya akingira omo bwato, omundu oyo wabya kwʼesyombĩnga mwamulemba-lemba ati, Uleke nyigende haguma nawe!

¹⁹Nĩkwa Yesu mwatamũlĩgĩra, nĩkwa mwamubwira ati, Usube eka wawe nʼoko bʼewenyũ, ubwirebo emyatsi minene eyo Mukama abirikukolera, kandi ngoko abirikuganyira.

²⁰Neryo omundu oyo mwalũaho, mwalaba omo kihugo kyʼeMĩyĩ Ĩkũmĩ, akatũlago busana nʼemyatsi eyo Yesu amukolera; nʼabosĩ abowa mobasweka.

²¹Neryo Yesu mwasuba eyisirya wʼengetsi. Nʼeyo oko mũsĩke wʼengetsi endeko nene moyahĩndana hakũhĩ naye.

²²Yaĩro, omukulu muguma wʼenyũmba yʼerĩhĩndanamo, mwahĩkaho. Nʼomugulu alangira Yesu, mwatũlama ahisi oko bisando biwe,

²³neryo mwamulemba-lemba kutsibu ati, Mwali wage mulere alwere kutsibu-tsibu, kumbe Wamasa nʼerĩhĩra ebyala byawe ukwʼiye, atoke erilama nʼeribyaho!

²⁴Neryo Yesu mwagenda haguma naye. Nĩkwa endeko nene moyamukwama nʼerĩmũhatatanĩa.

²⁵Kandi habya omũkalĩ oyo wabya akwĩre obũkonĩ bwʼerĩlũsya omusasi emyaka ĩkũmĩ nʼeyĩbĩrĩ,

²⁶iniabiriagalwa oko basaki bangi. Kandi iniabiribuga ebindu biwe byosĩ, isialitalama, nĩkwa iniakatoha.

²⁷Nĩkwa mowa engulu ya Yesu, neryo mwasa omo ndeko eyabya enyũma kwiye.

²⁸Kusangwa abũga ati, Namatũ la oko lukimba luwe lusa ngandĩlamĩbwa.

²⁹Neryo mwatũla oko lukimba luwe, neryo-neryo erisenda lyʼomusasi wuwe molyuma; neryo mwaminya omo mubiri wuwe kwʼabĩrĩlamĩbwa oko ndwala yiwe.

³⁰Nĩkwa Yesu mwaminya lũba kʼobũtokĩ bwabirimuhulukako, neryo mwabinduka omo ndeko mwabũga ati, Nindi wamatũla oko ngimba syage kwehĩ?

³¹Nĩkwa abiga buwe mobamũsũbĩrya bati, Unemulangira kwʼendeko ĩkakũhatatanaya, kandi ũkabũga uti, Nindi wamanyĩtũlako kwehĩ?

³²Nĩkwa Yesu mwatĩmbya ameso wuwe erĩsondya oyo wakola atya.

³³Nĩkwa omũkalĩ oyo iniabiriminya ekyabĩrĩmũhĩkako, mwasa iniakatitimana nʼeriubaha, mwawa embere siwe, neryo mwamubwira ebyosĩ byo kwenene.

³⁴Yesu mwamubwira ati, Mwali wage, erĩkĩrĩrya lyawe lyamakũlamya. Ugende buholo, ũlamĩbawe kwʼendwala yawe.

³⁵Omugulu Yesu abya akĩnabũga ebĩ abakwenda bʼenyũmba ya Yaĩro, omukulu wʼenyũmba yʼerĩhĩndanamo, mobahĩka erimubwira bati, Mwali wawe abirihola. Ukĩnaswalũhaya Omũkangĩrĩrya yo busana nakĩ kwehĩ?

³⁶Nĩkwa Yesu mowa ebyabũgawa, mwabwira omũtabalĩ wʼenyũmba yʼerĩhĩndanamo ati, Sigubahe, nĩkwa Wĩkĩrĩraye lisa.

³⁷Neryo Yesu mwatalĩga mundu akagenda naye nina Petero na Yakobo, na Yoane mugala wabo Yakobo.

³⁸Neryo babere bahĩka oko nyũmba yʼomũtabalĩ wʼenyũmba yʼerĩhĩndanamo, Yesu mwalangira ko hali olukanda, kandi mowa eririra, nʼerĩsũsũmana kutsibu.

³⁹Neryo mwingira omo nyũmba mwabwirabo ati, Busana nakĩ mũkabũgaya olukanda nʼeririra kwehĩ? Omwana sĩaholĩre, nĩkwa alito!

⁴⁰Nabo mobamuseka. Nĩkwa Yesu mwahigira abosĩ bʼeyĩhya, neryo mwĩmya ĩse wʼomwana na nyĩnya wʼomwana, nʼabiga buwe basatu, neryo mwingira omo nyũmba aho mwana abya agotsere.

⁴¹Neryo Yesu mwahamba oko byala byʼomwana, mwamubwira ati, Talĩta kũmĩ, kiti, Mwana-muto, ngakubwira nyiti, Hangana.

⁴²Neryo-neryo omwana-muto mwahangana, mwatsũka erigenda. Kusangwa abya wʼemyaka ĩkũmĩ nʼeyĩbĩrĩ. Neryo mobasweka nʼerisweka ĩnene.

⁴³Nĩkwa Yesu mwaganĩabo kutsibu ati, Sibabwire mundu; neryo mwabũga ati, Mumuhe ebyʼerirya.