Read nande Marĩko 6 Bible Online

Marĩko 6 - nande bible

Marĩko 6

¹Neryo Yesu mwalũayo mwasuba eka wabo eyo aklulira; nʼabiga buwe mobamukwama.

²Nʼoko kiro kyʼeSabato mwatsũka erĩkangĩrĩrya omo nyũmba yʼerĩhĩndanamo. Neryo habya abandu bangi, nʼomugulu bamuhulikirira mobasweka abosĩ, bati, Omundu oyũ abana emyatsi yosĩ eyĩ yo hahi kwehĩ? Kandi mwabana nʼamenge aya wo ati kwehĩ? Kandi akakola ebitiko-tiko ebĩ byo ati kwehĩ?

³Oyũ si yo mũbatsĩ wʼesyombago, mugala wa Marĩa, na mugala wabo Yakobo, na Yose, na Yũda, na Sĩmonĩ kwehĩ? Nʼabali babo sĩbĩkere haguma netu eno kwehĩ? Neryo mobamugana batya.

⁴Neryo Yesu mwabwirabo ati. Omũmĩnyererĩ sialibula erĩsĩkĩbwa imo nʼomo kihugo kiwe, nʼabʼekihanda kiwe, nʼabʼekĩtũnga kiwe.

⁵Neryo mwatatoka erikolerayo ebitiko-tiko. Nĩkwa Yesu mwahĩra ebyala biwe byʼoko bakonĩ bake mwalamyabo.

⁶Nĩkwa Yesu mwasweka kutsibu busana nʼerĩtendĩkĩrĩrya lyabo. Neryo Yesu mwalendera omo mĩyĩ yosĩ akakangĩrĩrya abandu.

⁷Neryo Yesu mwabirikira abiga ĩkũmĩ nʼababiri neryo mwatsũka eritumabo mo babiri-babiri. Kandi mwahabo ehamũlĩ oko bĩrĩmũ bibi.

⁸Neryo mwalayirabo ati, Simutwale kindu busana nʼolugendo olo, go nʼomũtso musa. Simutwale bundu, kutse ngunza, kutse franka omo matũsĩ wenyũ.

⁹Nĩkwa mwambale esyongendero; kandi simwambale esyokanzu ĩbĩrĩ.

¹⁰Kandi mwabwirabo ati, Aho basyabakokya omo nyũmba, mwĩkalemo erĩhĩka oko kiro mwasyalũĩra omo mũyĩ oyo.

¹¹Mwamahĩka aho bakagana erĩbakokya kutse bakagana eribahulikirira, omugulu mũkalũaho, imwakunguta olũtũtũ oluli omo bisando byenyũ. Ekĩ kyasyakangĩrĩryabo.

¹²Neryo mobayatũlaganĩa bati abandu babindule emitima yabo erireka ebibi byabo.

¹³Neryo mobahigira syʼeyĩhya esyombĩnga nyingi kandi mobahaka magũta gʼoko bakonĩ bangi nʼerĩlamyabo.

¹⁴Nĩkwa omwami Herode mowa omwatsi oyũ, kusangwa engulu ya Yesu iyabĩrĩhĩka ehosĩ. Abandi bandu mobabũga bati, Yoane Mũbatĩsya abĩrĩlũbũka oko baholĩ kikaleka obũtokĩ bwʼebitiko-tiko obũ ibwakoleka busana naye!

¹⁵Nĩkwa abandi bati nĩ Elĩa. Abandi bati nĩ mũmĩnyererĩ, omuguma gʼoko bamĩnyererĩ ba kera.

¹⁶Neryo omugulu Herode owago, mwabũga ati, Nĩ Yoane Mũbatĩsya oyo natwa kʼomutwe, nĩkwa abirisuba.

¹⁷Herode oyo iniabirihamula ati, Yoane abohawe nʼerĩhĩrwa omo mũlĩkĩ busana na Herodĩa, mũkalĩ wʼomugala wabo Herode, ye Fĩlĩpo, nĩkwa Herode abya ĩnĩabĩrĩhĩkya Herodĩa.

¹⁸Neryo Yoane Mũbatĩsya abya iniakabwira Herode ati, Emigambo ĩkakũganaya erĩĩmya omũkalĩ wa mugala wenyũ ye Fĩlĩpo.

¹⁹Herodĩa kwʼakwa Yoane yʼatya obusu nʼerisonda erĩmwĩta, nĩkwa mwatatoka.

²⁰Kusangwa Herode abya akubaha Yoane, ĩnĩanasĩ ngoko Yoane abya mundu mutunganene nʼoyũbũyĩrĩre, neryo mwamũteya ndeke. Nĩkwa Herode mwanza erimuhulikirira nĩkwa mwaganga-ganga busana nʼebĩnywa biwe.

²¹Neryo Herodĩa mwabana embanga. Herode mwayira erirya ĩnene ryʼekiro kyʼeributwa liwe. Neryo mwabirikira abakama buwe nʼabakulu bʼemilondo yʼabasĩrĩkanĩ buwe, nʼabandu bakulu bʼeGalĩlaya okwʼirya eryo.

²²Neryo mwali wa Herodĩa mwingira, mwasatirabo, mwatsemesya Herode nʼabagenĩ buwe. Neryo omwami mwabũlya omwanamuto oyo ati, Wanganzakĩ kwehĩ? Ngandikuha ekyo wanzĩre.

²³Kandi mwamũlahĩrĩrya ati, Ngalahĩraya nyiti nasyakuha ekĩndũkĩ wanzĩre, nomo kyangabya oluhande lwʼobwami bwage.

²⁴Neryo omwanamuto oyo mwayabũlya nyĩnya ati, Nyĩbũlayekĩ kwehĩ? Naye mwamũsũbĩrya ati, Omutwe wa Yoane Mũbatĩsya.

²⁵Neryo-neryo omwana-muto oyo mwaswahĩkamo lũba mwabũlya omwami ati, Nyanzĩre iwamba lino omutwe wa Yoane Mũbatĩsya gʼoko kibindi.

²⁶Neryo omwami mwakwa engitsi, nĩkwa busana nʼerĩlahĩrya liwe kandi busana nʼabagenĩ buwe, mwatasonda erĩmũganĩa.

²⁷Neryo mwahamula omũsĩrĩkanĩ wuwe muguma alete omutwe wa Yoane. Neryo omũsĩrĩkanĩ oyo mwaya omo nyũmba yʼomũlĩkĩ, mwatwa omutwe wa Yoane.

²⁸Neryo mwaletago oko kibindi, mwahago omwana-muto oyo, naye mwahago nyĩnya wuwe.

²⁹Neryo omugulu abiga ba Yoane bowa omwatsi oyo, mobasa mobaheka ekĩnda kiwe, mobahĩrakyo omwʼisinda.

³⁰Neryo abakwenda mobasubula mobahĩndana ahali Yesu, mobamubwira ebyosĩ ebyo bakola nʼemyatsi eyo bakangĩrĩraya.

³¹Neryo Yesu mwabũga nabo ati, Mwase ĩnywebene ahate bandu, muluhuke hake. Kusangwa habya bandu bangi bakalaba-laba, neryo Yesu nʼabiga buwe isibawite ndambĩ yʼerirya.

³²Neryo mobagenda omo bwato, eriya ahate bandu ĩbobene.

³³Abandu bangi mobalangirabo bakagenda mobaminyererabo, neryo abandu abo mobalũa omo mĩyĩ yosĩ, mobatĩmba omo bisando nʼeritanga Yesu nʼabiga buwe.

³⁴Nĩkwa omugulu Yesu alũa omo bwato mwalola oko ndeko nene eyo. Neryo mwakwĩrabo bũlĩge kusangwa babya ngʼesyombũlĩ esitawite mũlĩsya. Neryo mwatsũka erĩkangĩrĩryabo emyatsi mingi.

³⁵Nʼomugulu bwasonda erihumbera, abiga buwe mobamũhĩkako bati, Eno ni mbwarara, kandi bwamahumbera.

³⁶Ulagane nʼabandu bayayigulire ebyʼerirya omo malima nʼomo mĩyĩ eyĩhererenĩe.

³⁷Yesu mwasũbĩryabo ati, Nenyũ muhebo ebyʼerirya. Nabo mobabũlya Yesu bati, Wanzĩre itwayagula amandu wʼesyofranka magana abiri nʼerihabo ebyʼerirya kwehĩ?

³⁸Neryo Yesu mwabũlyabo ati, Muwite uku mandu angahi kwehĩ? Mugende mũlebaye. Nabo babere babĩrebya mobamubwira bati, Ni mandu atanu nʼamahere abiri.

³⁹Neryo Yesu mwahana abiga buwe ati bĩkalaye abandu mo ndeko-ndeko oko biti kwʼahisi.

⁴⁰Neryo abandu mobĩkala mo milondo-milondo, omo ndeko, abandu ĩgana, nʼomo yindi ndeko abandu makũmĩ atanu.

⁴¹Neryo Yesu mwĩmya amandu atanu ayo nʼamahere abiri, neryo mwalalamira endata elubula, neryo mwaha ewasĩngya uku Nyamuhanga. Neryo mwatsũtsangago, mwahago abiga buwe ati bahĩrego embere syʼabandu. Kandi mwagaba amahere abiri ayo nʼerĩtsũnganĩago oko bosĩ.

⁴²Abosĩ mobalya, mobũgũta.

⁴³Neryo abiga mobasongasongya ebihande-bihande ebyatahanguka mobyũsũlya ebitiri ĩkũmĩ nʼebibiri, nʼebyʼamahere nibya.

⁴⁴Abalume abalya amandu ayo babya elfu ĩtanu (5,000).

⁴⁵Neryo-neryo Yesu mwahatikana abiga buwe ati bingire omo bwato babye bakabya embere erĩlolya eBetesaĩda, eyisirya wʼengetsi, omugulu akalagana nʼendeko.

⁴⁶Neryo Yesu abere abituma endeko yo mbolere, mwaya oko kitwa akayasaba.

⁴⁷Kandi bwabere bwabya ĩgolo-golo, obwato obo bwabya omo ngetsi mo hali, na Yesu iniane ĩyowene oko kitaka.

⁴⁸Neryo mwalangira abiga bakataluka erigoya obwato kusangwa erihunga lyabya likabuhirira embere syabo. Nʼoko kĩsĩsĩmũko kyʼakani kyʼekiro, Yesu mwahĩka kubo iniakatandayira oko ngetsi kʼomo bisando. Neryo mwasonda eritwangana kubo.

⁴⁹Nĩkwa mobamulolako akatandayira oko magetsi. Mobaganĩrya bati nĩ kĩrĩmũ, mobalaka.

⁵⁰Kusangwa abosĩ mobamulolako, mobubaha. Yesu mwabwirabo lũba ati, Mũsĩkaye emitima! Nĩna ngye! Simubahe!

⁵¹Neryo mwingira omo bwato babyamo, nʼerihunga molyũmbya. Nʼabiga nabo mobasweka kutsibu.

⁵²Kusangwa mobataminya enzumwa yʼesyombiga syʼamandu, nĩkwa emitima yabo iyabirikala.

⁵³Neryo mobasoka engetsi nʼerĩhĩka oko kihugo kyʼeGenesaretĩ, mobakoma obwato oko mũsĩke wʼengetsi.

⁵⁴Nĩkwa babere banabĩlũa omo bwato, abandu mobaminya Yesu yo lũba.

⁵⁵Neryo mobatibita omo kihugo kyosĩ, bakayaheka abakonĩ oko syongyingo syabo, bakatwalabo uku Yesu.

⁵⁶Nʼehosĩ eyo Yesu aya oko hĩyĩ, kutse oko mĩyĩ kutse omo malima, abandu mobatwala abakonĩ babo omo hitale, ibanemulemba-lemba Yesu bati aleke abakonĩ batũle oko mũsĩke musa wʼolukimba luwe. Nʼabosĩ abatũla kulo mobalamĩbwa.