Read nande Marĩko 7 Bible Online

Marĩko 7 - nande bible

Marĩko 7

¹Neryo Abafarĩsayo nʼabandi bʼoko bakangĩrĩrya bʼEmigambo abalũa eYerũsalema, mobahĩndana hakũhĩ na Yesu.

²Mobalangira abiga buwe bakalya akalyo omo byala bĩtowene, ebĩtanabĩre.

³Kusangwa Abafarĩsayo nʼAbayũda bosĩ siberya bate banabya ebyala byo kutsibu ibakakwama emitsye yʼabakulu.

⁴Kandi omugulu bakalũa ekatale, isiberya bate banaba. Kandi hali eyindi mitsye mingi bakakwama eyo bakahabawa, ngʼomwatsi wʼerĩerya esyondehĩ, nʼamalega, nʼesyonyungu syʼemiringa, nʼesyongyingo.

⁵Neryo Abafarĩsayo nʼabakangĩrĩrya bʼEmigambo mobamũbũlyae bati, Busana nakĩ abiga bawe sibekwama emitsye yʼabakulu nĩkwa bakalya omo byala bĩtowene kwehĩ?

⁶Yesu mwasũbĩryabo ati, Ĩsaya mwaminyerera ndeke busana nenyũ ĩnywe batebya, ngoko kĩsakĩre kiti, Abandu aba bakanyĩsĩkaya omo mĩnywa yabo, Nĩkwa emitima yabo yiri hali kwĩngye.

⁷Nĩkwa bakanyĩramaya buyira, Ĩbakakangĩrĩraya ebihano byʼabandu ngʼerĩkangĩrĩrya lya Nyamuhanga.

⁸Yesu mwabũga ati, Mũkasĩga ebihano bya Nyamuhanga, imwakwama emitsye yʼabandu.

⁹Neryo Yesu mwaswabũga ati, Kwenene mukapona ndeke ekihano kya Nyamuhanga muti mũkategaya emitsye yenyũ!

¹⁰Kusangwa Musa mwabũga ati, Ũsĩkaye tata wawe na koyo wawe; kandi oyũkabũga nabi busana nʼĩse kutse koyo wuwe, ĩtawe.

¹¹Nĩkwa inywe mũkabũga muti, Omundu amabwira ĩse kutse koyo ati, Endũndĩ eyo ngakuha erĩkũwatĩkya ni Korbanĩ, (eribindula liti, byabirihabwa uku Nyamuhanga);

¹²mukaleka ĩnĩatawatĩkya ise kutse nyĩnya.

¹³Mutya mukayira ekĩnywa kya Nyamuhanga mo buyira busana nʼemitsye yenyũ eyo mukaha abandi. Nʼeyindi myatsi mingi eyiri ngʼeyĩ mukakolayo.

¹⁴Neryo Yesu mwaswabirikira endeko, mwabwirabo ati, Mowe, ĩnywe bosĩ, muminye.

¹⁵Sihali kindu ekikaya omo mundu ekĩkalũa eyĩhya ekikatoka erĩtsandya omundu. Nĩkwa emyatsi eyĩkalũa omwisi wʼomundu yo yĩkamũtsandaya. [

¹⁶Omundu amabya awite amatwĩ, owe!]

¹⁷Omugulu Yesu asĩga endeko akingira omo nyũmba, abiga mobamũbũlya omwatsi wʼomũsyo oyũ.

¹⁸Neryo Yesu mwabwirabo ati, Nenyũ nibya simuliminya kwehĩ? Sĩmwasĩ ko hate kindu ekikaya omwisi wʼomundu ekĩkalũa eyĩhya ekyangatoka erĩmũtsandya.

¹⁹Kusangwa sikiriya omo mutima wuwe nĩkwa omo nda yiwe, neryo kikalaba nʼeritwangana. (Erĩbũga litya Yesu mwabũga ati ebyalya byosĩ binatolere eriribwa.)

²⁰Kandi Yesu mwabũga ati, Ekĩkalũa omo mundu kyo kĩkamũtsandaya.

²¹Kusangwa omo mutima wʼomundu mo mukahuluka amalengekanĩa mabi, erĩsĩngĩra, erĩĩba, erĩĩta, amaragane,

²²erirumwa, ebibi byosĩ, eriteba, esyongumbu nyibi, erĩso libi, eritsuma, emiyiheko, obũkĩrũ.

²³Emyatsi mibi yosĩ eyĩ ĩkalũa omwisi wʼomundu nʼerĩmũtsandya.

²⁴Neryo Yesu mwalũaho mwaya oko bihugo byʼemĩyĩ yʼeTĩro nʼeSĩdona. Neryo mwingira omo nyũmba, ĩsĩanzĩre omundu akaminya kwʼaliho, nĩkwa mwatatoka erĩbĩsama.

²⁵Nĩkwa omũkalĩ muguma oyuwite mwali mulere oyuli kwʼekĩrĩmũ kibi, mwowa engulu ya Yesu, neryo mwasa lũba nʼeriwa oko bisando biwe.

²⁶Omũkalĩ oyo abya Mũgĩrĩkĩ wʼekihanda kyʼeSĩrĩfoĩnĩke. Neryo mwasaba Yesu ati ahiyire embĩnga eyo yʼeyĩhya uku mwali wuwe.

²⁷Nĩkwa Yesu mwamũsũbĩrya ati, Abana batsũke erĩũgũta, kusangwa Sĩryowene erĩĩmya kalyo kʼabana nʼerigusako oko syombwa.

²⁸Nĩkwa mwasũbĩrya ati, Ega Mukama, nĩkwa esyombwa esiri omwisi wʼemesa sikanalya ebitahangukira byʼabana.

²⁹Neryo Yesu mwamubwira ati, Kusangwa wamasũbya utya, ugende ewenyũ, embĩnga yabĩrĩlũa uku mwali wawe.

³⁰Neryo omũkalĩ oyo mwasuba ewabo mweya omwana wuwe inianagotsere oko ngyingo; nʼembĩnga iyabĩrĩmũlũako.

³¹Neryo kandi mwalũa omo kihugo kyʼeTĩro, neryo mwatwangana eSĩdona mwahĩka oko ngetsi yʼeGalĩlaya, iniakalaba omo nzira yʼekihugo kyʼeMĩyĩ Ĩkũmĩ.

³²Neryo abandu mobamuletera omutsiha kandi isialitoka erĩbũga ndeke. Nʼabandu abo mobasaba Yesu bati ahĩre ebyala biwe byʼoko mundu oyo.

³³Neryo Yesu mwatwala omundu oyo ahate bandu ahayĩhengekĩre, neryo mwahĩra eminwe yʼomo matwĩ wuwe, neryo mwatwa amatande, mwatũla oko lulimi lʼomundu oyo.

³⁴Neryo Yesu mwalalamira elubula, mwahumulikana, neryo mwabwira omundu oyo ati, Efafata, eribindula liti, Lĩbũkala.

³⁵Nʼamatwĩ wuwe mwalĩbũkala, nʼolulimi luwe molwagobokala, neryo mwatsũka erĩbũga ndeke.

³⁶Neryo Yesu mwaganĩabo ati, Sibabwire mundu nʼomuguma yʼomwatsi oyũ. Nĩkwa nomo anaganayabo atya, mobatũlago kutsibu.

³⁷Nʼabandu bosĩ abowa omwatsi oyo mobasweka kutsibu. Mobabũga bati, Akakola emyatsi yosĩ yo ndeke kutsibu. Akowĩsaya abatsiha, kandi akaleka esyomũmũ ĩsyabũga.