Read nande Marĩko 8 Bible Online

Marĩko 8 - nande bible

Marĩko 8

¹Enyũma wʼebiro ebyo, eyindi ndeko nene moyahĩndana. Kandi isibawite ebyʼerirya. Neryo Yesu mwabirikira abiga buwe mwabwirabo ati,

²Namakwĩra endeko yʼobũlĩge, kusangwa bamasiba nage lino ebiro bisatu, isibawite ebyʼerirya.

³Bamasuba ewabo batalĩre ibakandiremberera omo nzira, kusangwa abandi ni ba hali.

⁴Abiga buwe mobamũsũbĩrya bati, Hano hʼomo mbwarara amandu angabanika hayi busana nʼerĩũgũtya abandu bangaha aba kwehĩ?

⁵Yesu mwabũlyabo ati, Muwite uku mandu angahi kwehĩ? Nabo bati, Alinda.

⁶Neryo mwabwira abandu abo ati bĩkale ahisi. Neryo Yesu mwĩmya amandu alinda ayo, mwaha ewasĩngya uku Nyamuhanga, neryo mwatsũtsangago, mwahago abiga buwe ati bagabirego oko bandu ababya omo ndeko; neryo abiga mobagabago batya.

⁷Kandi ibawite otuhere tuke. Nĩkwa Yesu mwaha ewasĩngya busana nato, neryo mwabwira abiga ati batwalehyo, bagabehyo.

⁸Neryo abosĩ mobalya mobũgũta. Babya nga bandu elfu ĩnĩ (4,000).

⁹Neryo abiga mobasongya ebitahangukira ebyasaka, mobyũsũlya ebitiri birinda. Neryo Yesu mwalagana nʼendeko ati bagende.

¹⁰Kandi Yesu mwingira omo bwato haguma nʼabiga buwe, mobaya omo kihugo kyʼeDalmanũta.

¹¹Nĩkwa Abafarĩsayo mobahuluka mobatsũka erĩkũbĩsanĩa Yesu yʼobuhaka, ibakasonda ekitiko-tiko kĩkalũa elubula, ibakamulengako.

¹²Neryo Yesu mwahumulikana mwasweka omo mutima wuwe ati, Olulengo olũ lukasonda-sonda ekitiko-tiko busana nakĩ kwehĩ? Kwenene ngabũga nenyũ nyiti, Olulengo olũ silwendisyahabwa ekitiko-tiko.

¹³Neryo mwasĩgabo, muwasuba Omo bwato, mwasokera eyisirya wʼengetsi.

¹⁴Neryo abiga mobibirirwa eriheka obundu ibawite uku mbiga nguma nyisa omo bwato.

¹⁵Yesu mwahanabo ati, Mũlebaye, mũyĩtegaye busana nʼekĩhamya kyʼAbafarĩsayo, nʼekĩhamya kya Herode.

¹⁶Nabo mobakanĩranĩa omo katĩkatĩ kabo omwatsi oyo bati, Kusangwa situwite obundu.

¹⁷Yesu mwaminya ebyo bakanayako kyaleka ĩnĩabũlyabo ati, Busana nakĩ mũkakanĩranaya muti simuwite obundu kwehĩ? Sĩmwasĩ kutse eriminya kwehĩ? Emitima yenyũ ĩkĩnakalakalĩre itya kwehĩ?

¹⁸Muwite ameso, simwelangira kwehĩ? Muwite amatwĩ, sĩmũlĩowa kwehĩ? Simulibuka,

¹⁹omugulu natsũtsanga amandu atanu busana nʼabandu elfu ĩtanu kwehĩ? (5,000). Momwasongya ebitiri bingahi byʼebitahangukira ebyasaka kwehĩ? Mobasũbĩrya bati, Erĩkũmĩ nʼebibiri.

²⁰Nʼomugulu natsũtsanga amandu alinda busana nʼabandu elfu ĩnĩ, momwasongya bitiri bingahi byʼebitahangukira ebyasaka kwehĩ? Mobasũbĩrya bati, Birinda.

²¹Neryo Yesu mwabũlyabo ati, Simuli mwanaminya kwehĩ?

²²Neryo mobahĩka eBetesaĩda, nʼeyo mobaleta endĩmatĩme uku Yesu ibakamusaba bati amũtũleko.

²³Neryo Yesu mwawata oko byala byʼendĩmatĩme, mwamutwala ekyaswa kyʼomũyĩ. Abere abĩtwĩra amatande gʼoko meso wuwe, Yesu mwamũhĩra kwʼebyala neryo mwamũbũlya ati, Wanamalangira kindu kwehĩ?

²⁴Nʼomundu oyo mwasumba ameso mwabũga ati, Namalangira abandu, nĩkwa bali ngʼemiti eyikagenda.

²⁵Kandi Yesu mwaswahĩra ebyala biwe oko meso wʼomundu oyo. Neryo omundu oyo mwasamalira ndeke-ndeke, nʼameso wuwe mwalangira ebindu byosĩ byo ndeke,

²⁶Nĩkwa Yesu mwamutuma ewabo ati, Susube omo mũyĩ oyo.

²⁷Neryo Yesu nʼabiga buwe mobaya oko mĩyĩ yʼeKaĩsarĩ-Fĩlĩpĩ. Omo nzira Yesu mwabũlya abiga buwe ati, Abandu bati nyirindi kwehĩ?

²⁸Mobamũsũbĩrya bati, Abandi bati, Uli Yoane Mũbatĩsya; abandi bati, Uli Elĩa; kandi abandi bati, Uli muguma gʼoko bamĩnyererĩ.

²⁹Kandi Yesu mwabũlyabo ati, Nenyũ mũtĩkĩ kwehĩ? ĩnywe muti nyirindi kwehĩ? Petero mwasũbĩrya ati, Uli Kristo.

³⁰Neryo Yesu mwaganĩabo ati, Simubwire mundu busana nage.

³¹Neryo Yesu mwatsũka erĩkangĩrĩrya abiga buwe ati, Omugala wʼomundu atolere iniagalwa kutsibu, nʼeriganwa nʼabakulu, nʼabahererĩ bakulu, nʼabakangĩrĩrya bʼEmigambo. Kandi asyĩtwa, nʼenyũma wʼebiro bisatu ĩnĩalũbũkĩbwa.

³²Yesu mwabwirabo omwatsi oyo ndeke-ndeke. Neryo Petero mwatwala Yesu aho lutambi, mwatsũka erimukunga.

³³Nĩkwa Yesu mwabinduka mwasamalira abiga buwe, neryo mwakunga Petero ati, Uwe Satanĩ, ubye enyũma kwĩngye. Amalengekanĩa wawe si wa Nyamuhanga nĩkwa ni wʼabandu.

³⁴Neryo Yesu mwabirikira endeko haguma nʼabiga buwe, neryo mwabwirabo ati, Omundu amanza erinyikwama ayigane, aheke omusalaba wuwe, anyikwame.

³⁵Kusangwa omundu Oyukasonda erĩlamya engebe yiwe asyatalyayo; nʼomundu Oyũkatalaya engebe yiwe busana nage na busana nʼEngulu Yowene asyalamyayo.

³⁶Ko mundu akabana ndũndĩ yahi amatunda ekihugo kyosĩ, nĩkwa akatalya engebe yiwe kwehĩ?

³⁷Omundu asyahĩnganĩakĩ busana nʼengebe yiwe kwehĩ?

³⁸Kusangwa omundu amakwa esĩsonĩ busana nage, kandi busana nʼebĩnywa byage omo lulengo lubi olũ lʼoluteto olutekenga Nyamuhanga, Omugala wʼomundu asyamũkwa esĩsonĩ omugulu asyasa omo lukengerwa lwa Tata wuwe haguma nʼabamalaĩka buwe babũyĩrĩre.