Read nande Lũka 12 Bible Online

Lũka 12 - nande bible

Lũka 12

¹Omugulu amaelfu wʼabandu babya ĩbabĩrĩhĩndana haguma; kyaleka ibalyatangirirana, Yesu mwatsũka eribwira abiga buwe ati, Mũyĩtegaye busana nʼekĩhamya kyʼAbafarĩsayo. Ekyo nĩ ʼyĩtendererya.

²Nĩkwa sihali ekĩkũnĩngĩrwe ekitendisyabĩsũlwa, nʼekĩbĩsamĩre ekitendisyamĩnyĩkalĩbwa.

³Neryo omwatsi wahi ogo mwabĩrĩkanĩrya omo mwirĩmya asyowĩrwa omwʼitungi, nʼebyo mwabĩrĩbũga omo bihwehwe omo bisenge byʼenyũmba byasyatũlwa oko lutwe lwʼenyũmba.

⁴Bĩra bage, ngababwira nyiti, simubahe abakĩta omubiri, nʼenyũma wʼaho isibawite ebyo bangaswakola.

⁵Nĩkwa ngandĩbakangya abo mwangubaha: Mubahe Nyamuhanga, oyo amabĩta, iniawite ehamũlĩ erigusa omo Kũlĩmũ. Ega, ngababwira nyiti, mumubahe!

⁶Ehĩnyonyũ hitanu sĩhyegũlĩbawa oko senge ĩbĩrĩ kwehĩ? Nĩkwa Nyamuhanga Sialibirirawa nʼakaguma ka kuhyo.

⁷Kandi esyonzwiri syʼoko mitwe yenyũ sĩnaganzĩrwe esyosĩ. Neryo simubahe, muli bʼobũgũlĩ bunene kwilaba obũgũlĩ bwʼehĩnyonyũ hingi.

⁸Ngababwira, nyiti, obuli mundu ũkanyĩkanganaya embere syʼabandu, Omugala wʼOmundu asyamũkanganĩa embere syʼabamalaĩka ba Nyamuhanga.

⁹Nĩkwa oyukanyigana embere syʼabandu, Omugala wʼOmundu asyamugana embere syʼabamalaĩka ba Nyamuhanga.

¹⁰Kandi obuli mundu oyo wasyanegulira Omugala wʼOmundu, asyabuyirwa; nĩkwa oyukatsuma Omũlĩmũ Abũyĩrĩre, siendisyabuyirwa.

¹¹Omugulu bakabaleta embere syʼamanyũmba wʼerĩhĩndanamo, nʼabatabalĩ, nʼabʼehamũlĩ, sĩmũhahũkaye emitima nga mwasyasũbĩrya bokĩ, kutse ebyo mwangabũga.

¹²Kusangwa Omũlĩmũ Abũyĩrĩre asyabakangĩrĩrya oko ndambĩ eyo ebyo mutolere erĩbũga.

¹³Neryo omundu gʼoko ndeko mwabwira Yesu ati, Mũkangĩrĩrya, ubwire mugala wetu uti, tugabe obũsokĩ obo tata wetu atũsĩgĩra.

¹⁴Nĩkwa Yesu mwamubwira ati, Uwe mulume, nindi wanyiyira mo mũtswerĩ wenyũ, kutse mo mũgabĩ wʼobũsokĩ bwenyũ kwehĩ?

¹⁵Neryo Yesu mwabwirabo ati, Mũlebaye, kandi mũyĩtegaye okwʼirumwa lyosĩ, kusangwa engebe yʼomundu si busana nʼobungi bwʼebindu biwe.

¹⁶Neryo Yesu mwabwirabo omũsyo oyũ ati, Ekitaka kyʼomundu wʼebindu mokyerya bingi.

¹⁷Neryo omundu oyo mwatsũka erĩganĩrya omo mutima wuwe ati, Nasyakolakĩ kwehĩ? Kusangwa singwite ahʼeribika ebyalya byage byosĩ.

¹⁸Neryo mwayibwira ati, Ngandikola ekĩ: ĩnahĩmbũla ebigona byage, ĩnahĩmbabyo mo binene kwʼebĩ, nʼeyo, nasyabika ebyalya byage nʼebindu byage.

¹⁹Neryo nasyabwira omutima wage nyiti, Mutima, uwite bindu binene bĩbĩkĩre busana nʼemyaka mingi. Uhumule, ulye, Ũpũlaye, ũyĩtsemesaye.

²⁰Nĩkwa Nyamuhanga mwamubwira ati, Uwe mũkĩrũ, omo kiro ekĩ engebe yawe ikandibirikirwa, nʼebindu ebyo wabiribika byasyabya byandi kwehĩ?

²¹Neryo, omundu oyukayibikira ebindu, kwʼali atya, nĩkwa siawite bindu busana na Nyamuhanga.

²²Neryo Yesu mwabwira abiga buwe ati, Busana nʼomwatsi oyũ ngababwira nyiti, Simubye nʼerĩyĩlũhya nʼamaganĩryo busana nʼengebe yenyũ, muti mwasyalyakĩ, kutse busana nʼomubiri, nga mwasyambalakĩ.

²³Kusangwa engebe ĩrengĩre ebyalya, nʼomubiri alengĩre esyongimba.

²⁴Mũlebaye ebikororo, kusangwa sibyebiba kutse sibyegesa; wite embĩso kutse ekigona; nĩkwa Nyamuhanga akalĩsayabyo; nenyũ muli bʼobũgũlĩ bungi kwilaba esyonyonyũ esyo!

²⁵Nindi kwĩnywe amayĩlũhya busana nʼamaganĩryo anganatoka eritomekera emyaka yiwe kwehĩ?

²⁶Neryo mwamataluka oko mwatsi muke, busana nakĩ mũkayĩlũhaya nʼamaganĩryo busana nʼeyindi myatsi kwehĩ?

²⁷Mũlebaye ebiranga-ranga, ngoko bikalasa; Sibyenuba, kutse eriluka esyongimba; nikwa ngababwira nyiti, Solomono nʼolukengerwa luwe losĩ mwatambala ndeke ngʼomusanga muguma oyũ.

²⁸Nĩkwa Nyamuhanga oyũkambalaya ebiti byʼomolĩ, ebikabyaho mũnabwĩre nʼomo ngyakya bikagusawa omo lĩko. Siendisyabambalya kwilaba aho kwehĩ? Ĩnywe bandu bʼerĩkĩrĩrya ĩke.

²⁹Kandi simusonde ebyo mwasyalya, nʼebyo mwasyapũlya, kandi simuhanga-hangaye emitima.

³⁰Kusangwa ebihanda byʼekihugo bikasonda-sondaya ebindu byosĩ ebyo, nĩkwa Tata wenyũ anasĩ ebibali bwaga.

³¹Nĩkwa mũtsũke erisonda obwami bwa Nyamuhanga, naye asyabaha ebindu ebĩ.

³²Ekĩhyo kike, simubahe kusangwa kikatsemesaya Tata wenyũ yo ndeke, eribaha Obwami.

³³Mũgũlaye ebindu byenyũ, muhe esyofranka syʼoko bera. Muyibanire amatũsĩ awatekula, muyibikire ebindu elubula ebitekeha, ahatehĩka mũrahĩ, nʼehinyurugunzu sihyeherayabyo.

³⁴Kusangwa ahali ebindu byenyũ, hʼemitima yenyũ yasyabya nibya.

³⁵Mubye imunambite, ĩmũnasĩkĩre, mwakaye esyotala syenyũ.

³⁶Mubye ngʼabagombe abakalinda omukama wabo aho asyasubulira okwʼirya lyʼerĩherũkya. Omugulu asyasa nʼerikongota oko lũyĩ, basyamukingulira lũba.

³⁷Obutseme buli oko bagombe abo omugulu omukama wabo akegayabo ibabiribuka ĩbanasĩkĩre! Kwenene ngabũga nenyũ, asyaboha embindi yiwe, ĩnĩkalyabo okwʼirya, neryo ĩnĩahĩkaho, nʼerikolerabo.

³⁸Obutseme buli nʼabagombe abo mukama wabo ameyabo ĩbanasĩkĩre kutse amasa omo kĩsĩsĩmũko kyʼakabiri, kutse ekyʼakasatu.

³⁹Kandi muminye ndeke kumbe Omwenye nyũmba alibya asĩ endambĩ yahi omũrahĩ akandĩhĩka, kumbe Sĩangalekĩre enyũmba yiwe ikatulwa.

⁴⁰Nenyũ nibya, mubye ĩmũnasĩkĩre; kusangwa Omugala wʼOmundu asyasa oko ndambĩ mũtalengekenĩe.

⁴¹Neryo Petero mwabũga ati, Mukama, ũkatwa omũsyo oyũ busana netu, kutse busana nʼabandu bosĩ kwehĩ?

⁴²Neryo Omukama mwasũbĩrya ati, Omwĩmanĩrĩ oyuteregula owʼamenge nindi kwehĩ? Ni mundu oyo mukama wuwe asyamũhĩra erĩrebya abagombe buwe, erihabo erĩgabo lyabo lyʼakalyo oko mugulu atolere.

⁴³Obutseme buli oko mugombe oyo mukama wuwe amamweya akakola atya omugulu akahĩka eka!

⁴⁴Kwenene ngababwira nyiti, Omukama oyo asyamuyira mo mũteya wʼebindu biwe byosĩ.

⁴⁵Nĩkwa omugombe oyo amayibwira omo mutima wuwe ati, Omukama wage sialitasa lũba, ĩnĩatsũka erĩswĩrya abagombe bʼobulume nʼabʼobũkalĩ, nʼerirya, nʼerĩpũlya nʼerĩkũnda,

⁴⁶omukama wʼomugombe oyo asyasa ekiro atemulindirira, nʼoko ndambĩ atasĩ; omukama oyo asyamũtsũtsanga mo bitswe-bitswe, nʼerimuha omwanya haguma nʼabatĩkĩrĩrye.

⁴⁷Nĩkwa omugombe oyo wabya wasĩ erisonda lyʼomukama wuwe mwatayĩtegekanĩa, kutse erikola ebyo mukama wuwe anzĩre, asyaswĩrĩbwa esyonyambĩ nyingi.

⁴⁸Nĩkwa omugombe oyũtasĩ ebyo mukama wuwe anzĩre, neryo akakola emĩbĩrĩ eyitolere akaswĩrĩbwa, asyaswĩrĩbwa nyike. Omundu oyukahabawa bingi, asyabũlĩbwa bingiĩ nʼomundu oyo wabĩkĩbawa bingi, asyabũlĩbwa bingi.

⁴⁹Nabĩrĩhĩka erĩtwana omuliro oko kihugo; nyanzĩre kumbe abiriaka!

⁵⁰Nĩkwa ngwite erĩbatĩsya eryo nangabatĩsĩbwamo, kandi ngakwa engitsi eririnda ekiro lyasyabererera.

⁵¹Mũkaganĩraya muti nasa erireta Obuholo omo kihugo kwehĩ? Nyiti iyihi, nĩkwa erigabana.

⁵²Erĩtsũka lino omo nyũmba nguma hasyabya bandu batanu abagabene. Abasatu basyalwa nʼababiri, nʼababiri basyalwa nʼabasatu.

⁵³Basyagabana, tata asyalwa nʼomwana; nʼomwana asyalwa nʼĩse wuwe; nyĩnya asyalwa na mwali, na mwali asyalwa na nyĩnya; nyĩnyĩ-byala asyalwa na mwalĩana, na mwalĩana asyalwa na nyĩnyĩ-byala.

⁵⁴Kandi Yesu abya akabwira endeko ati, Omugulu mukalangira ekĩtũ kikahangana ebwanga bwʼeyĩkwa, mũkabũga muti, embũla ikandiwa, ko biri bitya.

⁵⁵Nʼomugulu mũkowa erihunga lyʼeLutambi lwʼeYĩkwa likabuhirira, muti, Bukandikya mũnabwĩre; neryo ko biri bitya.

⁵⁶Ĩnywe batebya! Mũnasĩ eriminyerera erisosa lyʼekihugo nʼeryʼekyanya; nĩkwa busana nakĩ sĩmwasĩ eriminyerera omugulu wa sesene kwehĩ?

⁵⁷Busana nakĩ simwetswera ĩnywebene ekitunganene kwehĩ?

⁵⁸Omundu amakutsongera akakutwala oko kilondero, ulenge erisangana naye omo nzira, sĩakũkolaye oko mũtswerĩ, nʼomũtswerĩ erĩkũhererya omũpolĩsĩ, nʼomũpolĩsĩ iniakugusa omo mũlĩkĩ.

⁵⁹Ngakubwira nyiti, Sĩwendĩsyalũaho ute waliha esenge yʼenyũma-nyũma eyikabugirira olubanza olo.