Read nande Lũka 17 Bible Online

Lũka 17 - nande bible

Lũka 17

¹Yesu mwabwira abiga buwe ati, Emyatsi eyĩkakolesaya abandu bʼebibi ikandisyasa kwenene, nĩkwa obũlĩge oko yukaletayo!

²Kumbe ryowene busana nʼomundu oyo oluso lunene ilwaboherwa oko bĩkya biwe, iniaguswa omo ngetsi; kwilaba erireka omuguma gʼoko bana balere aba akakola ebibi.

³Mũyĩtegaye! Omugala wenyũ amakola ebibi, umukunge; amabindula omutima erireka ebibi iwamubuyira.

⁴Kandi amakukola nabi ngendo sirinda oko kiro kiguma, neryo akaswakũhĩkako ati, Namabindula omutima erireka ebibi, litolere iwamubuyira.

⁵Nĩkwa abakwenda mobabwira Omukama bati, Ũkanyaye erĩkĩrĩrya lyetu!

⁶Omukama mwasũbĩryabo ati, Kumbe muwite erĩkĩrĩrya ngʼembuto yʼeharadalĩ, mwangabwira omuti wʼomukuyu oyũ muti, Uyikule, uyayihere omo ngetsi, nago ĩnĩabowa.

⁷Nindi ũkwʼĩnywe oyuwite omugombe Oyukalima kutse akalĩsaya esyombũlĩ. Omugombe omugulu akalũa omwʼirima ukamubwira uti, Wase lino Wĩkale ulye kwehĩ?

⁸Iyihi, nĩkwa Wasyamubwira uti, Ũkokotaye ebyalya byage byʼerirya, Ubohe embindi, ũhũkũle, unyikolere erĩhĩka aho namabirira nʼerĩpũlya, neryo enyũma wasyalya nʼerĩpũlya.

⁹Akaha ewasĩngya oko mugombe oyo kusangwa akola ebyo ahanawa kwehĩ?

¹⁰Nenyũ nibya, omugulu mwamabikola ebyosĩ mwategekawa, mũbũge muti, Tuli bagombe abatatolere; twabirikola ebyo tutolere itwakola bisa.

¹¹Neryo Yesu abere akaya eYerũsalema, mwalaba omo katĩkatĩ kʼeSamarĩa nʼeGalĩlaya.

¹²Nĩkwa abere, akingira omo mũyĩ muguma, neryo abahaga ĩkũmĩ mobahĩndana naye. Mobahangana ehali nʼeribirikira bati,

¹³Yesu, Omukama, utuganyire!

¹⁴Neryo omugulu Yesu alangirabo, mwabwirabo ati, Mugende mũyĩkanganaye oko bahererĩ. Neryo babere banemugenda, mobalamĩbwa.

¹⁵Nĩkwa omuguma wa kubo abere abilangira kwʼamabĩlamĩbwa, mwasubula iniakapipa Nyamuhanga nʼomulenge munene.

¹⁶Neryo mwakũkama ahisi embere syʼebisando bya Yesu, nʼerimuha ewasĩngya. Omuhaga oyo abya Mũsamarĩa.

¹⁷Neryo Yesu mwabũlya ati, Abosĩ ĩkũmĩ mobatalamĩbwa kwehĩ? Nĩkwa abandi mwenda bali hahi kwehĩ?

¹⁸Sihetabanika abakasubula nʼeripipa Nyamuhanga yo nʼowʼehandi oyũ musa kwehĩ?

¹⁹Neryo Yesu mwamubwira ati, Uhangane, ugende; erĩkĩrĩrya lyawe lyamabĩkũlamya.

²⁰Abandi Bafarĩsayo mobabũlya Yesu Obwami bwa Nyamuhanga nga bwasyasa mugulu wahi. Yesu mwasũbĩryabo ati, Obwami bwa Nyamuhanga sibwendisyasa mo biminyikalo ebikalolawako.

²¹Kutse sihali mundu oyo wasyabũga ati, Ulangire, Obwami buli hano, kutse, Halya ho buli! Kusangwa lebaya, Obwami bwa Nyamuhanga buli omo katĩkatĩ kenyũ.

²²Neryo mwabwira abiga ati, Ebiro byasyasa omugulu mwasyanza erilangira ekiguma kyʼebiro byʼomugala wʼOmundu, simwendisyalola kukyo.

²³Basyababwira bati, Ulangire halya! kutse, Ulangire hano! Simuyeyo, simutibite eyo bali.

²⁴Kusangwa ngoko akarabyo kakapalaya erĩtsũka oko luhande lwʼekyanya nʼerĩhĩka oko lundi luhande, litya Omugala wʼOmundu asyabya atya oko kiro kiwe.

²⁵Nĩkwa litolere ĩnĩatsũka eriagalwa omo myatsi mingi nʼeriganwa nʼabandu ba sesene.

²⁶Ngoko byabya omo biro bya Noa, ko bikandisyabya bitya omo biro byʼomugala wʼOmundu.

²⁷Mobalya, mobapũlya, mobahĩkya, mobaherũkanĩa erĩhĩka oko kiro Noa ingira omo bwato, nʼerigunga lyʼamagetsi molyasa nʼerĩherya abosĩ.

²⁸Kandi ngoko byabya omo biro bya Lotĩ, mobalya, mobapũlya, mobagula, mobagũlya, mobabiba, mobahĩmba.

²⁹Nĩkwa oko kiro Lotĩ alũa eSodomo, moyawa omuliro nʼeripumuka lyʼomuliro bĩkalũa elubula, mobyaherya abandu bosĩ.

³⁰Ko bikandisyabya bitya oko kiro Mugala wʼOmundu asyabĩsũlwa.

³¹Oko kiro ekyo, omundu oyuli endata oko nyũmba yiwe, ĩsĩangasyakĩmĩra omuwe erienda ebindu biwe ebirimo eritwalabyo; kandi oyuli omwʼirima siasube enyũma eka wuwe.

³²Mwibuke omũkalĩ wa Lotĩ!

³³Oyukasonda erĩlamya engebe yiwe, asyatalyayo, nĩkwa Oyũkatalaya engebe yiwe asyabikayo ndeke.

³⁴Ngababwira nyiti, Oko kiro ekyo hasyabya abandu babiri ibagotsere oko ngyingo nguma, omuguma asyatwalwa, nʼogundi asyasĩganĩbwa.

³⁵Hasyabya abakalĩ babiri abakaswa eyĩsyano yo haguma, omuguma asyatwalwa, nʼogundi asyasĩganĩbwa. [

³⁶Abalume babiri basyabya omwʼirimai omuguma asyatwalwa, nʼogundi asyasĩganĩbwa.]

³⁷Neryo abiga mobamũbũlya bati, Mukama ni hahi kwehĩ? Yesu mwasũbĩryabo ati, Ahali ekĩnda, ho amahungu asyahĩndana.