Read nande Lũka 18 Bible Online

Lũka 18 - nande bible

Lũka 18

¹Neryo Yesu mwatwĩrabo omũsyo oyũ, erĩkangĩrĩryabo ati, Basabe emigulu yosĩ butsira eriluha,

²ati, Habya omũtswerĩ oko mũyĩ muguma oyutyubaha Nyamuhanga, kutse erikenga omundu.

³Kandi habya omũkwakalĩ oko mũyĩ oyo, oyo wabya akamũhĩkako, ati, Ũnyĩrekaye kwʼenzĩgũ yage.

⁴Oko mugulu muli, omũtswerĩ oyo mwatalĩga, nĩkwa mwasala ayibwira ati, Nomo ndeniubaha Nyamuhanga kutse erikenga mundu,

⁵nĩkwa kusangwa omũkwakalĩ oyũ akanyĩlũhaya ngandĩmũlekerya, bite bitya, akasyandũhya akahĩka ebiro byosĩ.

⁶Neryo Omukama mwabũga ati, Mowe ebyo mũtswerĩ oyutatunganene abũga.

⁷Neryo Nyamuhanga naye siendisyaha abayisogawa buwe erĩbanza kwehĩ? Abakamulakira oko musibo nʼomo kiro kwehi? Kandi asyamala erĩwatĩkyabo kwehĩ?

⁸Ngababwira nyiti, Asyahabo erĩbanza lũba. Nĩkwa Omugala wʼOmundu omugulu asyasa, asyabana erĩkĩrĩrya omo kihugo kwehĩ?

⁹Kandi Yesu mwatwa omũsyo busana nʼabandu abayihalamba bati batunganene, ibakapona abandi.

¹⁰Ati, Abandu babiri mobahetukira omo Hekalũ bakayasaba; omuguma abya Mũfarĩsayo nʼogundi abya mũsolesya.

¹¹Omũfarĩsayo mwahangana nʼerisaba omo mutima wuwe ati, Nyamuhanga, ngakuha ewasĩngya kusangwa sinyiri ngʼabandi bandu, abanyeyĩ, nʼabatatunganene, nʼabasĩngĩrĩ, kutse ngʼomũsolesya oyũ.

¹²Ngatsira akalyo ko ngendo ĩbĩrĩ obuli yenga; kandi ngaha ekiguma kyʼerĩkũmĩ omo byosĩ ngatunda.

¹³Nĩkwa omũsolesya mwimana hali, mwatalolya obũsũ buwe bwʼelubula, nĩkwa mwahumanga oko kĩkũba kiwe ati, Nyamuhanga, unyiganyire, ĩngye mukola-nabi!

¹⁴Neryo Yesu mwabũga ati, Ngababwira nyiti, omundu oyo mwakĩmĩra ewuwe iniamabitunganana kwilaba ogundi oyo, Kusangwa obuli mundu oyũkayĩhamaya, asyakehĩbwa. Nĩkwa oyũkayĩkehaya, asyahamĩbwa.

¹⁵Abandi bandu babya bakaletera Yesu abana babo balere, bati ahĩre ebyala biwe byo kubo. Nĩkwa abiga babere balangirabo, mobatsũka erikungabo.

¹⁶Nĩkwa Yesu mwabirikira abana abo ati, Muleke abana balere banyĩhĩkeko, Sĩmũkakĩrayebo; kusangwa Obwami bwa Nyamuhanga ni bwʼabali ngʼaba.

¹⁷Kwenene ngababwira, oyutyangirira obwami bwa Nyamuhanga ngʼomwana mulere, siendisyingira mubo nʼahake.

¹⁸Neryo omũtabalĩ muguma mwamũbũlya ati, Mũkangĩrĩrya mubuya, nasyakolakĩ nyibane engebe yʼerikota kwehĩ?

¹⁹Neryo Yesu mwamubwira ati, Busana nakĩ ukanyahula mo mubuya kwehĩ? Sihali mubuya nina Nyamuhanga ĩyowene.

²⁰Ũnasĩ ebihano biti, Isiwasĩngĩra; Ĩsĩwĩta; Ĩsĩwĩba; isiwabihira abandi; Ũsĩkaye tata wawe na koyo wawe.

²¹Omundu oyo mwamũsũbĩrya ati, Ebyosĩ ebĩ nabirikolabyo erĩtsũka omo bwana bwage.

²²Neryo omugulu Yesu owa ekĩ, mwamubwira ati, Ũkĩsĩya erikola mwatsi muguma. Ũgũlaye ebyosĩ ebyo uwite ugabirebyo oko bera, nawe wasyabya nʼebindu elubula; neryo wase Unyikwame.

²³Nĩkwa omundu oyo abere owa ekĩ, mwakwa obũlĩge bunene, kusangwa abya awite bindu binene.

²⁴Neryo Yesu mwamulangira ngoko abya nʼobũlĩge neryo mwabũga ati, Monzo lĩkalĩre busana nʼabandu bʼebindu eriingira omo Bwami bwa Nyamuhanga!

²⁵Kusangwa ni ryolo busana nʼengamia erilaba omo kyũna kyʼesĩndanĩ kwilaba omundu wʼebindu eriingira omo Bwami bwa Nyamuhanga.

²⁶Neryo abandu abowabyo mobabũlya bati, Ko nindi angatoka erĩlamĩbwa kwehĩ?

²⁷Yesu mwasũbĩrya ati, Emyatsi eyitetokekana oko bandu, ikatokekana uku Nyamuhanga.

²⁸Neryo Petero mwabũga ati, Lebaya, twabĩrĩsĩga amanyũmba wetu, twabirikukwama.

²⁹Yesu mwabwirabo ati, Kwenene ngabũga nenyũ nyiti, omundu Oyũkasĩga enyũmba, kutse omũkalĩwe, kutse bagala babo, kutse ababũtĩ buwe, kutse abana, busana nʼobwami bwa Nyamuhanga,

³⁰asyangirira ebĩlabĩre aho engendo nyingi oko mugulu ono, nʼoko mugulu owakandisyasa, asyangirira engebe yʼerikota.

³¹Neryo Yesu mwatwala abiga ĩkũmĩ nʼababiri aho lutambi, mwabwirabo ati, Lebaya, tukahetukira eYerũsalema. Eyo ebyosĩ ebyasakawa nʼabamĩnyererĩ busana nʼomugala wʼOmundu byasyabererera.

³²Kusangwa asyahoterwa oko Bihanda, kandi asyasekererĩbwa, nʼerihemulwa, nʼerĩtwĩrwako amatande.

³³Kandi basyamũswĩrya emikoba nʼerĩmwĩta. Nĩkwa enyũma wʼebiro bisatu asyalũbũka.

³⁴Nĩkwa abiga buwe mobataminya emyatsi eyĩ nʼahake, nʼenzumwa yʼemyatsi eyĩ moyabĩswa kubo, kandi mobatayiminyira ebyabũgawa.

³⁵Neryo Yesu abere ahĩka hakũhĩ nʼeYerĩko, omundu muguma endĩmatĩme abya ĩnĩanĩkere oko mũsĩke wʼenzira akasabĩrĩrya ebyʼerĩmũwatĩkya.

³⁶Neryo omugulu owa endeko ikalaba, mwabũlya ati, Kuti kwehĩ?

³⁷Neryo mobamubwira bati, Yesu wʼeNazaretĩ yukalaba.

³⁸Neryo mwabirikira ati, Yesu, mugala wa Dawĩdĩ, unyiganyire!

³⁹Neryo ababya embere omo nzira mobamukunga, bati abye bũkũtũ, nĩkwa endĩmatĩme eyo moyabirikira kutsibu kwʼaho iti, Mugala wa Dawĩdĩ, unyiganyire!

⁴⁰Neryo Yesu mwimana, mwategeka ati bamuletereye; neryo abere abĩhĩka hakũhĩ Yesu mwamũbũlya ati,

⁴¹Wanzĩre inakukolerakĩ kwehĩ? Naye mwabũga ati, Mukama, nyanzĩre eriswalangira.

⁴²Neryo Yesu mwamubwira ati, Ubane erilangira lyawe, erĩkĩrĩrya lyawe lyamabĩkũlamya.

⁴³Neryo-neryo mwabana erilangira, neryo mwakwama Yesu, nʼeripipa Nyamuhanga. Nĩkwa abandu bosĩ babere balangira ekyo, mobapipa Nyamuhanga.