Read nande Lũka 19 Bible Online

Lũka 19 - nande bible

Lũka 19

¹Neryo Yesu mwingira eYerĩko, nĩkwa mwalũa iniatwangana.

²Neryo habya omũsolesya mukulu eyo, oyo wahulawa mo Zakayo, kandi abya wʼebindu bingi.

³Naye abya akasonda-sonda erilola uku Yesu nga nindi, nĩkwa mwatatoka busana nʼendeko kusangwa abya mũkũhĩ.

⁴Neryo mwatibita embere mwasambira omo muti wʼomukuyu atoke erilangira Yesu, kusangwa abya iniakalaba omo nzira eyo.

⁵Neryo Yesu abere ahĩkaho, mwalalamira endata mwabwira Zakayo ati, Zakayo, Wanguhe, ũkĩme, kusangwa ngandĩkala omwawe mũnabwĩre.

⁶Neryo Zakayo mwanguha, mwakĩma nʼerĩmũkokya nʼobutseme.

⁷Nʼabandu bosĩ abamulolako mobatsũka eriyikuna bati, Amabya mũgenĩ wʼomundu mukola-nabi.

⁸Neryo Zakayo mwahangana mwabwira Omukama ati, Lebaya, Mukama, ngaha ekihande kyʼebindu byage oko bera; kandi namabya naliteba mundu kwʼekindu kiwe ngandĩsũbũlyakyo ngendo ĩnĩ.

⁹Neryo Yesu mwamubwira ati, Mũnabwĩre erilama lyamahĩka omo nyũmba eyĩ, kusangwa naye ni mwana wa Abrahamũ.

¹⁰Kusangwa Omugala wʼOmundu mwasa erisonda-sonda nʼerĩlamya ababya batere.

¹¹Omugulu babya bakahulikirira emyatsi eyĩ, Yesu mwatsũka erĩtwa omũsyo. Neryo kusangwa abya hakũhĩ nʼeYerũsalema, kandi abandu mobaganĩrya ambu Obwami bwa Nyamuhanga bũkahĩka neryo-neryo.

¹²Neryo Yesu mwabũga ati, Omukulu muguma wʼobwami mwaya omo kihugo kyʼehali eriyasingirayo obwami, nʼeriswasubula.

¹³Neryo mwabirikira ĩkũmĩ oko bagombe buwe, mwahabo ebibande ĩkũmĩ byʼesyamagetsi, mwabwirabo ati, Mũtũndaye ũmwʼebĩ erĩhĩka aho nasyaswasira.

¹⁴Nĩkwa abandu buwe mobamũkwa obusu, mobamutumira abakwenda bati, Sĩtwanzĩre omundu oyukatutabalako.

¹⁵Neryo omukulu oyo abere abisinga mwasubula, neryo mwategeka abagombe abo asĩgĩra ebibande ebyo ati babirikirawe atoke eriminya nga bamatunda byahi.

¹⁶Omugombe wʼerĩmbere mwahuluka ati, Mukama, ekibande kyawe kyʼesyamagetsi kyamatunda ebindi bibande byʼesyamagetsi ĩkũmĩ.

¹⁷Neryo omukulu oyo mwamubwira ati, Wamakola ndeke uwe mugombe mubuya kusangwa wabiribya butalegula oko kindu kike, ubye nʼehamũlĩ oko mĩyĩ ĩkũmĩ.

¹⁸Neryo omugombe wʼakabiri mwasa ati, Mukama, ekibande kyawe kyʼesyamagetsi kyamatunda ebindi bibande byʼesyamagetsi bitanu.

¹⁹Neryo mwamubwira ati, Nawe utabale oko mĩyi ĩtanu.

²⁰Nʼogundi mugombe mwasa ati, Mukama, lebaya ekibande kyawe kyʼesyamagetsi kyekĩ: ekyo nabika omo lukimba.

²¹Kandi monakubaha, kusangwa uli mundu oyũkalĩre. Ukaheka ebite byagu, kandi ukagesa ebyo utabiba.

²²Omukulu oyo mwamubwira ati, Uwe mugombe mubi! Ngandikutswera omo bĩnywa byawe. Wabya wasĩ ko ndi mundu oyũkalĩre, ngĩmaya ebite byage, nʼerigesa ebyo ndabiba kwehĩ?

²³Neryo busana nakĩ mũtahĩra ekibande kyage kyʼesyamagetsi omo bankĩ, neryo nangabere nahĩka, inahekakyo haguma nʼendũndĩ yakyo kwehĩ?

²⁴Neryo mwabwira ababya bimeneho ati, Mumusagule ekibande kyʼesyamagetsi ekyo, muhekyo oko yuwite ebibande byʼesyamagetsi ĩkũmĩ.

²⁵Nabo mobamubwira bati, Mukama, awite ebibande byʼesyamagetsi ĩkũmĩ!

²⁶Nĩkwa ngababwira nyiti, Oyuwite asyahabwa ebindi, nĩkwa oyutawite, asyalũsĩbwako nʼekyo awite.

²⁷Nĩkwa, esyonzĩgũ syage esyo, abatabya banzĩre ngatabala kubo, muletebo hano, mwĩtĩrebo hano omo meso wage.

²⁸Neryo Yesu abere abĩbũga emyatsi eyĩ, mwahetukira eYerũsalema embere syʼabandi.

²⁹Neryo abere ahĩka hakũhĩ nʼeBetefage nʼeBetanĩa, hakũhĩ nʼekitwa ekikahulawa mo Mĩzeĩtũnĩ, mwatuma abiga buwe babiri,

³⁰ati, Mugende oko kayĩ akali embere syenyũ; neryo mukandibya mwabĩhĩkako mukandĩeya ekyana kyʼepunda ĩkĩnahangĩre ekitekyataheka mundu. Muhangulekyo, mundeterekyo hano.

³¹Omundu amababũlya ati, Mukahangulakyo busana nakĩ, imwamubwira muti, Omukama ali nʼobwaga bwakyo.

³²Neryo abatuma wa mobagenda mobeyakyo ngoko Yesu anabwirabo.

³³Neryo babere bakahangula ekyana kyʼepunda ekyo, abenyekyo mobabũlyabo bati, Busana nakĩ mukahangula ekyana kyʼepunda kwehĩ?

³⁴Neryo mobabwirabo bati, Omukama ali nʼobwaga bwakyo.

³⁵Neryo mobatwala ekyana kyʼepunda ekyo uku Yesu. Kandi mobĩkĩrya kukyo kwʼesyongimba syabo, mobahĩra Yesu yo kukyo.

³⁶Neryo abere akagenda kukyo mobasanza esyongimba syabo syʼomo nzira.

³⁷Neryo Yesu abere ahĩka hakũhĩ nʼobwandagala bwʼekitwa kyʼeMĩzeĩtũnĩ, endeko yosĩ yʼabiga mobatsũka eripipa Nyamuhanga ibakatsema nʼeripipa Nyamuhanga nʼomulenge munene busana nʼebitiko-tiko byosĩ ebyo balolako,

³⁸bati, Nyamuhanga atsumule omwami, oyukasa omo lĩna lyʼomukama! Obuholo omo lubula nʼolukengerwa lubye uku Nyamuhanga!

³⁹Neryo abandi bʼoko Bafarĩsayo mobabwira Yesu bati, Mũkangĩrĩrya, Ukunge abiga bawe.

⁴⁰Yesu mwasũbĩryabo ati, Ngababwira nyiti, aba bamahuna, amabwe nago asyabirikira nʼomulenge munene.

⁴¹Neryo abere ahĩka hakũhĩ nʼomũyĩ, mwalangirago nʼeriririra kugo,

⁴²ati, Kumbe mũnabwĩre nawe ũlwe wasĩ emyatsi eyikaleta Obuholo! Nĩkwa lino ĩbĩsamĩre oko meso wawe.

⁴³Kusangwa ebiro byasyasa kwĩnywe, oko mugulu oyo esyonzĩgũ syawe syasyahanganĩa olũhĩmbo embere syenyũ nʼerĩbatĩmbako, nʼerĩbakakĩrya oko mbande syosĩ.

⁴⁴Basyabagusa ahisi haguma nʼabandu abali omwisi wawe; isibendĩsyasĩga erĩbwe nʼeriguma endata oko lindi, kusangwa Sulitaminya omugulu Nyamuhanga ahĩka erĩkũlamya.

⁴⁵Neryo Yesu mwingira omo Hekalũ, mwatsũka erihigira abakagũlaya bʼeyĩhya.

⁴⁶Iniakabwirabo ati, Kĩsakĩre kiti, Enyũmba yage yasyabya enyũmba yʼerisabiramo. Nĩkwa ĩnywe mwabiriyirayo mo bwĩkalo bwʼabanyeyĩ.

⁴⁷Kandi Yesu mwabya akakangĩrĩrya omo Hekalũ ebiro byosĩ. Neryo abahererĩ bakulu nʼabakangĩrĩrya bʼEmigambo nʼabandu bakulu omo katĩkatĩ kʼabandu mobalenga erĩmwĩta.

⁴⁸Nĩkwa mobatabana ekyo bangakola, kusangwa abandu bosĩ babya bakahĩra amatwĩ wabo oko bĩnywa biwe.