Read nande Lũka 2 Bible Online

Lũka 2 - nande bible

Lũka 2

¹Oko mugulu oyo, Omwami mukulu Kaĩsarĩ Augũsto mwahamula ati abandu bosĩ bʼobwami buwe bagende oko tsapa.

²Omugulu etsapa yʼerĩmbere eyĩ yabya, Kũrenĩo abya mũtabalĩ wʼeSũrĩa.

³Neryo abandu bosĩ mobaya oko tsapa eyo, obuli mundu oko wabo.

⁴Yosefũ naye mwalũa oko mũyĩ wʼeNazaretĩ, eGalĩlaya, mwaya eYũdea, oko mũyĩ ahulawa mo Betelehemũ, aho mwami Dawĩdĩ abutawa, kusangwa abya wʼekihanda nʼekĩtũnga kya Dawĩdĩ.

⁵Ayayo busana nʼeriyatsapa haguma na Marĩa, oyo asĩmolaya, inina mukule.

⁶Omugulu babya eBetelehemũ, endambĩ ya Marĩa yʼeributa moyahĩka.

⁷Neryo mwabuta omũlwana akambere kiwe, mwamuswika olukimba lwʼobumekeke, neryo mwamũhĩra omwʼĩtũba eryo esyonde sikaliramo, kusangwa sihabya mwanya busana nabo omo nyũmba yʼabalalĩrĩrĩ.

⁸Neryo omo kihugo ekyo habya abalĩsya ababya bakasiba omolĩ ĩbakategaya ebihangulo byabo omo kiro.

⁹Nʼomũlaĩka wʼomukama mwahuluka embere syabo, nʼerĩkangabasanĩa lyʼomukama molyatĩmba kubo, neryo mobubaha kutsibu.

¹⁰Nʼomũlaĩka mwabwirabo ati, Simubahe! Kusangwa ngabaletera Engulu Yowene yʼobutseme bunene obukasyabya busana nʼabandu bosĩ.

¹¹Kusangwa mũnabwĩre oko mũyĩ wa Dawĩdĩ, Omũlamya wenyũ abiributwa, Iye Omukama Kristo.

¹²Ekĩ kyasyabya kiminyikalo busana nenyũ; mwasyeya omwana ĩnĩanaswĩkĩre esyongimba syʼobumekeke iniagotsere omwʼĩtũba eryo esyonde sikaliramo.

¹³Neryo-neryo mohahuluka haguma nʼomũlaĩka oyo, omulondo munene wʼabamalaĩka bʼelubula, ibakapipa Nyamuhanga bati,

¹⁴Olukengerwa uku Nyamuhanga oyuli ahendata kutsibu! Nʼobuholo oko kihugo oko bandu bakamũtsemesaya!

¹⁵Neryo abamalaĩka babere babĩlũa kubo bakasuba elubula, abalĩsya mobabwirana bati, Lino tuye eBetelehemũ, tũyalebaye omwatsi owabereyo ogo Mukama abĩrĩtũmĩnyĩsya.

¹⁶Neryo mobanguha eriyayo, mobeya Marĩa na Yosefũ, kandi mobalangira olumekeke ilunagotsere omwʼĩtũba erikalira mwʼesyonde.

¹⁷Neryo abalĩsya babere babimulolako mobabwirabo ebĩnywa ebyo babwirawa busana nʼomwana oyũ.

¹⁸Nʼabandu bosĩ abowabyo mobaswekera emyatsi eyo babwirawa nʼabalĩsya.

¹⁹Nĩkwa Marĩa mwibuka emyatsi yosĩ eyĩ ĩnĩakaganĩrayayo omo mutima wuwe.

²⁰Neryo abalĩsya mobasubula, ibakapipa nʼerĩsĩkya Nyamuhanga busana nʼebyosĩ bowa nʼebyo bamalolako, ngoko babwirawa nʼomũlaĩka.

²¹Neryo enyũma wʼebiro munani, omugulu wʼerĩbanĩa omwana mwahĩka, neryo mwahulwa mo Yesu, erĩna omũlaĩka amuluka omugulu obukule bwabya bute bwahekwa.

²²Neryo omugulu mwahĩka owʼerikola ebyo Migambo ya Musa yahana busana nʼemitsye yʼeriera. Neryo Yosefũ na Marĩa mobatwala Yesu eYerũsalema busana nʼerimuha oko Mukama.

²³Ngoko bĩsakĩre omo Migambo yʼomukama biti, Obuli kambere kʼobulume kasyahigulwa mo kabũyĩrĩre busana nʼomukama.

²⁴Kandi mobayayo busana nʼerihera obuhere ngoko Migambo yʼomukama ĩkabũga iti, Ehitungula hibiri, kutse ehyana hyʼehĩrĩkũkũ hibiri.

²⁵Neryo habya omundu eYerũsalema oyukahulawa mo Sĩmeonĩ. Abya mundu utunganene iniakakenga Nyamuhanga. Abya akalinda erilama lyʼeĨsraelĩ; nʼOmũlĩmũ Abũyĩrĩre abya haguma naye.

²⁶Kandi, Omũlĩmũ Abũyĩrĩre mwamũkangya kwʼatendisyahola ate alola uku Kristo wʼomukama.

²⁷Neryo Omũlĩmũ mwatwala Sĩmeonĩ yʼomo Hekalũ. Kandi omugulu Yosefũ na Marĩa baleta Yesu omo Hekalũ, erimukolera ebyo Migambo ĩkabũga.

²⁸Sĩmeonĩ mwawata oko mwana oyo omo byala biwe, mwapipa Nyamuhanga ati,

²⁹Lino Omukama, ũhongokaye omugombe wawe, Agende omo buholo ngoko wabĩrĩbũga.

³⁰Kusangwa namalangira omulamo wawe omo meso wage,

³¹Ogo wabĩrĩkokotya embere syʼabandu bosĩ,

³²Ekyakakala kyʼerĩkangya enzira yawe oko Bihanda, Nʼeriha olukengerwa oko bandu bawe Ĩsraelĩ.

³³Neryo Yosefũ na nyĩnya wa Yesu ye Marĩa mobaswekera emyatsi eyo Sĩmeonĩ abũga busana naye.

³⁴Neryo Sĩmeonĩ mwatsumulabo iniakabwira Marĩa nyĩnya wuwe ati, Lebaya, omwana oyũ abiriyisogwa na Nyamuhanga busana nʼeriwa nʼerilama lyʼabandu bangi omo Ĩsraelĩ. Kandi asyabya kiminyikalo ekikandisyaponwa.

³⁵Kandi obũlĩge ngʼomũyalĩ bwasyatsimita omutima wawe, amalengekanĩa wʼemitima mingi atoke erĩbĩsũlwa.

³⁶Mohabya omũmĩnyererĩ wʼobũkalĩ, ye Ana, mwali wa Fanuelĩ, wʼekihanda kya Aserĩ. Abya mukekulu wa kera, ĩnĩabĩrĩkala nʼĩba wuwe emyaka irinda.

³⁷Kandi iniabiribya mũkwakalĩ emyaka makũmĩ munani nʼĩnĩ. Ĩsĩalĩlũa omo Hekalũ, ĩnĩakaramaya Nyamuhanga omo kiro nʼomo musibo, haguma nʼeritsira ebyalya nʼerisaba.

³⁸Oko katambĩ ako Ana mwahĩka nʼeriha wasĩngya uku Nyamuhanga, kandi mwatũla omwatsi wa Yesu oko bandu bosĩ ababya bakalinda bati Nyamuhanga akandĩsyalamya eYerũsalema.

³⁹Neryo babere babibuyirira ebyosĩ ebyo Migambo yʼomukama ĩkabũga, mobasuba eGalĩlaya, oko Nazaretĩ eka wabo.

⁴⁰Nʼomwana oyo mwakula mwabya nʼamaka; kandi, mwabya nʼamenge manene, kandi omũyĩsa wa Nyamuhanga abya haguma naye.

⁴¹Neryo ababũtĩ ba Yesu babya bakaya eYerũsalema obuli mwaka busana nʼEbiro Bikulu byʼErikiruka.

⁴²Neryo omugulu Yesu abya wʼemyaka ĩkũmĩ nʼĩbĩrĩ, mobaya oko biro bikulu ebyo ngoko banabya bakakola,

⁴³Omugulu ebiro bikulu ebyo byahwa, mobatsũka erisuba eka wabo. Nĩkwa omũlwana Yesu mwasĩgala eYerũsalema, ababũtĩ buwe ĩsĩbasĩ.

⁴⁴Mobaganĩrya bati ane omo ndeko, neryo mobagenda olugendo lwʼekiro kiguma, neryo mobamusonda-sonda omo katĩkatĩ kʼabalĩkyabo nʼabʼewabo.

⁴⁵Neryo babere babimubula mobasuba eYerũsalema bakayamusonda-sonda.

⁴⁶Neryo enyũma wʼebiro bisatu mobamweya omo Hekalũ, ĩnĩanĩkere omo katĩkatĩ kʼabakangĩrĩrya erihulikirira nʼerĩbũlyabo emyatsi.

⁴⁷Abosĩ abamowa mobasweka busana nʼamenge wuwe nʼerĩsũbĩrya liwe.

⁴⁸Ababũtĩ buwe mobasweka omugulu bamulolako, neryo nyĩnya wuwe mwamubwira ati, Uwe mwana, wamatuyira utya busana nakĩ kwehĩ? Talebaya, tata wawe nage twabirikusonda-sonda nʼengitsi nene.

⁴⁹Naye mwasũbĩryabo ati, Ko busana nakĩ mwabya mukanyisonda-sondya kwehĩ? Simwabya mwasĩ ngoko lyabya litolere inabya omo nyũmba ya Tata wage kwehĩ?

⁵⁰Nabo mobataminya ebyo abũga nabo.

⁵¹Neryo Yesu mwasuba eNazaretĩ haguma nabo, neryo mwabya akowa ebyo bamubwira. Neryo nyĩnya wuwe mwabika emyatsi yosĩ eyĩ omo mutima wuwe.

⁵²Neryo Yesu musuka, oko mubiri nʼomo menge, ĩnĩakasĩmawa na Nyamuhanga nʼabandu.