Read nande Lũka 21 Bible Online

Lũka 21 - nande bible

Lũka 21

¹Neryo Yesu mwalangira abʼebindu bakahĩra olũsũnzo lʼomo kĩbo kyʼeHekalũ.

²Neryo mwalangira omũkwakalĩ muguma mwera akahĩramo esyosenge ĩbĩrĩ syʼomulinga omo kĩbo.

³Neryo Yesu mwabũga ati, Kwenene ngababwira nyiti omũkwakalĩ mwera oyũ amahĩra omo kĩbo mo bingi kwilaba abandi bosĩ.

⁴Kusangwa abandi bosĩ busana nʼebindu byabo bingi bamahĩra omo kĩbo; nĩkwa iye omo bwera buwe, amahĩramo ebyosĩ ebyo alwe awite ebyo angalĩre.

⁵Abandi bandu babya ĩbakakanaya omwatsi wʼeHekalũ, bati yabĩrĩsũgwa omo mabwe owenenga nʼolũsũnzo olwahabawa uku Nyamuhanga. Yesu ati,

⁶Emyatsi eyo mukalangira eyo, ebiro bikandisyasa nʼoko mugulu oyo, sihendĩsyasĩgala nʼerĩbwe nʼeriguma endata oko lindi eritendisyasambulirwa ahisi.

⁷Nabo mobamũbũlya bati, Mũkangĩrĩrya, emyatsi eyĩ yasyabya mugulu wahi kwehĩ? Nʼekiminyikalo ni kyahi ekikandisyabya omugulu emyatsi yosĩ eyĩ ĩkandĩsyahĩka kwehĩ?

⁸Yesu mwabũga ati, Mũtegaye, sĩbabatalaye! Kusangwa bandu bangi basyasa omo lĩna lyage bati, Ĩngye indi ye! Kandi omugulu oyo abĩrĩhĩka! Nĩkwa isimwasyakwamabo.

⁹Simubahe omugulu mũkowa engulu yʼamalwa nʼerĩtwa eyĩsesĩ, kusangwa emyatsi eyĩ itolere ĩyatsũka erĩhĩka, nĩkwa endũlĩ isiriyayaberwa.

¹⁰Neryo mwaswabũga nabo ati, Ekihanda kyasyalwa nʼekindi kihanda, nʼobwami bwasyalwa nʼobundi bwami.

¹¹Kandi hasyabya emĩsĩkĩ minene-minene, kandi hasyabya enzala, nʼesyondwala ehosĩ. Kandi hasyabya erĩũbahĩrĩrya, nʼebiminyikalo binene bĩkalũa omo kyanya.

¹²Nĩkwa emyatsi eyĩ ite yabya, basyabahamba nʼerĩbendererya, eribahotera omo manyũmba wʼerĩhĩndanamo nʼamanyũmba wʼomũlĩkĩ. Basyabatwala embere syʼabami nʼabatabalĩ bakulu busana nʼerĩna lyage.

¹³Ekĩ kyasyaleka imwatoka erĩtũla Engulu Yowene.

¹⁴Muminye omo mitima yenyũ, sĩmwangaganĩrya embere ngoko mwangayilwira.

¹⁵Kusangwa nasyabaha ebĩnywa nʼamenge ayo sihali enzĩgũ yenyũ yasyatoka erĩsĩnga kutse eriyigana.

¹⁶Mwasyahoterwa nʼababũtĩ benyũ nʼabagala benyũ, nʼabalĩkyenyũ, nʼabĩra benyũ, kandi basyĩta abandi bʼũkwʼĩnywe.

¹⁷Abandu bosĩ basyabakwa obusu busana nʼerĩna lyage.

¹⁸Nĩkwa sihendisyahera nʼoluywiri nʼoluguma oko mutwe wenyũ.

¹⁹Busana nʼerihatikana lyenyũ mwasyabana engebe yenyũ.

²⁰Omugulu mukalangira eYerũsalema ĩnĩnatĩmbĩrweko nʼemilondo yʼamalwa, neryo imwaminya erihera lyago ko lyamabĩhĩka hakũbĩ.

²¹Oko mugulu oyo abali eYũdea basagĩre oko bitwa; nʼabali omo mũyĩ balũe mugo, kandi abali omo biharo sibasyekũlũkĩra oko mũyĩ.

²²Kusangwa ebiro ebĩ ni biro byʼerĩkĩsya, erĩberererya ebyosĩ byasakawa.

²³Nĩkwa obũlĩge oko bakule nʼoko bakalĩ abakaha abana babo bʼamabere oko biro ebyo! Kusangwa obũlĩge bunene bwasyabya oko kihugo kino, nʼerihitana lya Nyamuhanga lyasyabya oko bandu abo.

²⁴Basyahwa busana nʼobukali bwʼomũyalĩ, kandi basyatwalwa mo banyegwa omo bihanda byosĩ. Kandi abʼEbihanda basyalyatangirira eYerũsalema erĩhĩka aho emigulu yʼEbihanda yasyabererera.

²⁵Hasyabya ebiminyikalo omo lyuba, nʼomo mukera, nʼomo syongũnũnũ. Omo kihugo hasyabya amalĩge omo bihanda, ibakubaha erihuha lyʼengetsi nʼebisunda byayo.

²⁶Abandu basyalembera busana nʼeriubaha omugulu bakalinda, ebĩkandĩsyahĩka oko kihugo kyosĩ. Kusangwa ebyʼamaka byʼekyanya byasyatenga-tenganĩbwa.

²⁷Neryo basyalangira Omugala wʼOmundu akahuluka omo kĩtũ, nʼobũtokĩ, nʼolukengerwa lunene.

²⁸Nĩkwa omugulu emyatsi eyĩ ĩkatsũka erĩhĩka, muhangane, musumbe emitwe yenyũ, kusangwa erĩtongolĩbwa lyenyũ lĩkahĩka hakũhĩ.

²⁹Neryo Yesu mwatwĩrabo mũsyo ati, Mũlebaye omuti wʼomũtĩnĩ, nʼemiti yosĩ.

³⁰Omugulu ĩkatohaya ebĩkoma byayo, ukalangirayo nʼeriminyerera kʼomugulu wʼomwisi ali hakũhĩ.

³¹Litya nenyũ, omugulu mukalangira emyatsi eyĩ ĩkahĩka muminye kʼobwami bwa Nyamuhanga buli hakũhĩ nʼerĩhĩka.

³²Kwenene ngabũga nenyũ, olulengo olũ silwendisyahwaho, emyatsi eyĩ ite yabererera.

³³Ekyanya nʼekihugo byasyahwaho, nĩkwa ebĩnywa byage sibyendisyahwaho.

³⁴Mũyĩtegaye, emitima yenyũ sĩyĩrĩtoherawe nʼeritamira, nʼerĩkũnda, nʼamalengekanĩa wʼengebe yʼeno, neryo ekiro ekyo kĩkabahĩkako lũba-lũba!

³⁵Kusangwa kyasyahĩka oko bandu bosĩ abĩkere omo kihugo kyosĩ.

³⁶Nĩkwa mũtegaye emigulu yosĩ, nʼerisaba, mutoke eribana akagala kʼeribala emyatsi yosĩ eyĩ eyikasonda erĩhĩka, nʼerihangana embere syʼOmugala wʼOmundu.

³⁷Nĩkwa Yesu mwasiba ebiro ebyo ĩnĩakakangĩrĩraya omo Hekalũ. Nĩkwa bwanabya bwasonda erihumbera, ĩnĩalũamo nʼeriya oko Kitwa kyʼeMĩzeĩtũnĩ.

³⁸Kandi abandu bosĩ babya bakatsinduka eriyamuhulikirira omo Hekalũ.