Read nande Lũka 3 Bible Online

Lũka 3 - nande bible

Lũka 3

¹Neryo omo mwaka wʼerĩkũmĩ nʼeyĩtanu wʼeritabala lyʼomukulu ye Tĩberĩo Kaĩsarĩ, Pontĩo Pilato abya mũtabalĩ wʼeYũdea, na Herode abya mwami wʼeGalĩlaya, na mugala wabo ye Fĩlĩpo abya mwami wʼekihugo kyʼeĨtũrĩa nʼeTerakonĩtĩ, na Lĩsanĩa abya mwami wʼeAbĩlene,

²na Ana na Kayafa babya bahererĩ bakulu oko bahererĩ bosĩ. Oko mugulu oyũ ekĩnywa kya Nyamuhanga mokyahĩka uku Yoane mugala wa Zakarĩa, omo mbwarara.

³Neryo Yoane mwaya omo kihugo kyosĩ kyʼolũsĩ lwʼeYorodanĩ ĩnĩakatũlaganaya omwatsi, ati, Mubindule emitima yenyũ erireka ebibi, mũbatĩsĩbawe, na Nyamuhanga ababuyire ebibi byenyũ.

⁴Ngoko kĩsakĩre omo kitabu kyʼomũmĩnyererĩ Ĩsaya kiti, Omulenge wʼoyukabirikirira omo mbwarara, ati, Mowanaye enzira yʼomukama, Mũtũngananaye esyombalu siwe.

⁵Obuli musya asyosũlĩbwa, Obuli kitwa nʼobuli katwa byasyabondererĩbwa; Nʼebĩhengemĩre byasyatũngananĩbwa; Nʼesyonzira sĩtahalĩre syasyalĩngĩrĩranĩbwa;

⁶Nʼabandu bosĩ basyalangira omulamo wa Nyamuhanga.

⁷Abandu bangi mobaya uku Yoane busana nʼerĩbatĩsĩbwa. Nĩkwa mwabwirabo, ati, Ĩnywe bana bʼesyonzoka! Nindi yo wababwira ati musage erihitana lya Nyamuhanga erikandisyasa kwehĩ?

⁸Neryo mukole emĩbĩrĩ eyikaleka abandu ibaminya ko mwabiribindula emitima yenyũ erireka ebibi. Sĩmũtsũke eriyibwira muti, Tuwite Abrahamũ mo tata wetu. Ngababwira nyiti, Nyamuhanga angatoka erĩhanganĩa amabwe aya mo bana busana na Abrahamũ.

⁹Na lino embasa ĩnĩkĩrye oko mĩrĩhĩ yʼomuti, obuli muti owatehetaya ebĩgũma byowene akakondawa nʼeriguswa omo muliro.

¹⁰Neryo abandu mobamũbũlya bati, Netu tũkolekĩ kwehĩ?

¹¹Naye mwasũbĩryabo ati, Oyuwite ehisomeko hibiri, ahe akaguma oko yutawiteko, nʼoyuwite akalyo ahe kuko kwʼabandi.

¹²Abandi basolesya mobahĩka erĩbatĩsĩbwa, mobamũbũlya bati, Mũkangĩrĩrya, netu tũkolekĩ kwehĩ?

¹³Neryo mwabwirabo ati, Sĩmwĩmaye ebĩlabĩre ebikahamulawa.

¹⁴Kandi abasĩrĩkanĩ mobamũbũlya bati, Netu, tũkolekĩ kwehĩ? Neryo mwabwirabo ati, Sĩmũhũnge esyofranka, kutse sĩmũsĩngĩsĩraye omundu nʼerimulega, kandi mũsĩme ebihembo byenyũ.

¹⁵Neryo omugulu abandu babya bakaganĩrya omo mitima yabo ĩbakahĩra amaha uku Yoane ngʼanganabya ini Kristo,

¹⁶Yoane mwabwirabo ati, Ngababatĩsaya omo magetsi, nĩkwa oyukasa anyĩrengĩrye amaka, nage sinyitolere erĩkũndũla emikoba yʼoko ngendero siwe. Iye asyababatĩsya omo Mũlĩmũ Abũyĩrĩre nʼomo muliro.

¹⁷Olugale luwe luli omo byala biwe, erĩgũlũkya engano omo kibuga kiwe, nʼerĩhĩra engano omo kigona kiwe; nĩkwa asyahĩsya omusunga omo muliro owatehumbera.

¹⁸Neryo Yoane mwakanĩrya abandu bʼEngulu Yowene omo mĩsĩndo mingi yʼerihana.

¹⁹Nĩkwa Yoane mwakunga Herode omũtabalĩ wʼeGalĩlaya, kusangwa abya ĩnĩabĩrĩherũkya Herodĩa, muka mugala wabo, kandi mwamukunga busana nʼebibi byosĩ akola.

²⁰Neryo Herode mwakola ekitsibu kwʼaho, mwahĩra Yoane yʼomo mũlĩkĩ.

²¹Neryo abandu bosĩ babere babĩbatĩsĩbwa, Yesu naye nibya mwabatĩsĩbwa. Neryo omugulu abya akasaba olubula molwakingukala,

²²nʼOmũlĩmũ Abũyĩrĩre mwamwandagalirako omwʼisosa lyʼomubiri wʼakalĩkũkũ. Neryo omulenge mwalũa elubula ati, Uli Mugala wage mwanze, namakutsemera ndeke.

²³Omugulu Yesu atsũka omũbĩrĩ wuwe, abya wʼemyaka makũmĩ asatu; abandu mobaganĩrya, ambu ni mugala wa Yosefũ, oyo wabya mugala wa Helĩ,

²⁴omugala wa Matatĩ, omugala wa Lawĩ, omugala wa Melkĩ, omugala wa Yanaĩ, omugala wa Yosefũ,

²⁵omugala wa Matatĩa, omugala wa Amosĩ, omugala wa Nahũmũ, omugala wa Eslĩ, omugala wa Nage,

²⁶omugala wa Matĩ, omugala wa Matatĩa, omugala wa Sĩmeĩ, omugala wa Yoseke, omugala wa Joda,

²⁷omugala wa Yohana, omugala wa Resa, omugala wa Zerũbabelĩ, omugala wa Salatĩelĩ, omugala wa Nerĩ,

²⁸omugala wa Melkĩ, omugala wa Adĩ, omugala wa Kosamũ omugala wa Elmadamu, omugala wa Erĩ,

²⁹omugala wa Yose, omugala wa Elĩezerĩ, omugala wa Yorĩmũ, omugala wa Matatĩ, omugala wa Lawĩ,

³⁰omugala wa Sĩmeonĩ, omugala wa Yũda, omugala wa Yosefũ, omugala wa Yonamũ, omugala wa Elĩakĩmũ,

³¹omugala wa Mela, omugala wa Menana, omugala wa Matata, omugala wa Natanĩ, omugala wa Dawĩdĩ,

³²omugala wa Yese, omugala wa Obedĩ, omugala wa Boazĩ, omugala wa Salmonĩ, omugala wa Nasonĩ,

³³omugala wa Amĩnadabu, omugala wa Ramũ, omugala wa Hesĩronĩ, omugala wa Peresĩ, omugala wa Yũda,

³⁴omugala wa Yakobo, omugala wa Ĩsaka, omugala wa Abrahamũ, omugala wa Tera, omugala wa Nahorĩ,

³⁵omugala wa Serũgũ, omugala wa Reũ, omugala wa Pelegĩ, omugala wa Ĩberĩ, omugala wa Sela,

³⁶omugala wa Kaĩnana, omugala wa Arpakĩsadĩ, omugala wa Semũ, omugala wa Noa, omugala wa Lameke,

³⁷omugala wa Metũsela, omugala wa Enoka, omugala wa Yeredĩ, omugala wa Mahalalelĩ, omugala wa Kaĩnana,

³⁸omugala wa Enosĩ, omugala wa Setĩ, omugala wa Adamu, omugala wa Nyamuhanga.