Read nande Lũka 5 Bible Online

Lũka 5 - nande bible

Lũka 5

¹Neryo omugulu esyondeko syabya sikamũhatatanĩa bati bowe ekĩnywa kya Nyamuhanga, Yesu abya ahangene hakũhĩ nʼengetsi yʼeGenezaretĩ.

²Neryo Yesu mwalangira amato abiri iniane hakũhĩ nʼomũsĩke wʼengetsi; nĩkwa abasohĩ ĩbabĩrĩlũa omo mato ayo, nʼerĩerya ebĩsohĩ byabo.

³Neryo Yesu mwingira omo bwato buguma obwabya bwa Sĩmonĩ, neryo mwamũbũlya ati asegerayebo omo ngetsi mo hake. Neryo Yesu mwĩkala omo bwato obo mwatsũka erĩkangĩrĩrya esyondeko, iniane omo bwato obo.

⁴Neryo Yesu abere abibuga erĩbũga, mwabwira Petero ati, Muye ahali omutobero, mũtogerayeho ebĩsohĩ byenyũ, musohe.

⁵Neryo Sĩmonĩ mwamũsũbĩrya ati, Mukama, bukere tukayitsinga kutsibu, neryo sĩtwetabanakĩ! Nĩkwa busana nʼekĩnywa kyawe ngandĩtogerya mwʼebĩsohĩ.

⁶Neryo babere babikola batya mobahamba amahere mangi nʼebĩsohĩ mobyasonda erĩtwĩka.

⁷Mobakoherya abalĩkyabo omo bundi bwato bati base bawatĩkayebo. Neryo mobasa mobũsũlya amato abiri mwʼamahere, kyaleka amato iniasonda eritobera.

⁸Nĩkwa omugulu Sĩmonĩ Petero alangira ebyo, mwawa oko bisando bya Yesu ati, Mukama Ũlũe hakũhĩ nage, kusangwa indi mundu mubi.

⁹Kusangwa mwasweka haguma nʼabalĩkyabo bosĩ busana nʼerihamba amahere ayo.

¹⁰Na Yakobo na Yoane, abagala ba Zebedayo, abasangira haguma nabo mobasweka nibya. Neryo Yesu mwabwira Sĩmonĩ ati, Sigubahe, erĩtsũka lino mukandisyasoha abandu.

¹¹Neryo babere babireta amato wabo oko mũsĩke, mobasĩganĩa ebyosĩ, mobakwama Yesu.

¹²Neryo omugulu Yesu abya oko mũyĩ muguma, habya omundu oyũkwĩre ebihaga byo kutsibu; neryo abere alangira Yesu, mwalambama ahisi oko bũsũ buwe, mwamulemba-lemba ati, Mukama, wamabya, ũnanzĩre wangatoka erĩnyĩlamya.

¹³Neryo Yesu mwakakya ebyala biwe mwamũtũlako ati, Nyĩnanzĩre; ũlamĩbawe, neryo-neryo ebihaga biwe mobyamũlũako.

¹⁴Neryo Yesu mwamuhana ati, Sigubwire mundu, nĩkwa ugende ũyĩkanganaye oko mũhererĩ, kandi uhere obuhere bwʼerĩyerya ngoko Musa ategeka, busana nʼerĩmĩnyĩsyabo ko wabirilama.

¹⁵Nĩkwa engulu ya Yesu moyagenda-genda kutsibu, nʼesyondeko nene mosyahĩndana erĩmowa nʼerĩlamĩbwa oko syondwala syabo.

¹⁶Nĩkwa Yesu mwabya akagenda ahate bandu eriyasaba.

¹⁷Neryo ekiro kiguma Yesu abya akakangĩrĩrya, mohabya Abafarĩsayo nʼabakangĩrĩrya bʼEmigambo ĩbĩkereho, ĩbakalũa omo buli mũyĩ wʼeGalĩlaya nʼeYũdea nʼeYerũsalema. Kandi obũtokĩ bwʼomukama bwabya haguma na Yesu erĩlamyabo.

¹⁸Neryo abandu mobaheka omundu oko ngyingo iniabiribasa. Neryo mobasonda-sonda erimuleta nʼerĩmũhĩra emuliro wa Yesu.

¹⁹Neryo busana nʼendeko, mobabula enzira yʼerĩmwĩngĩryamo. Neryo mobasamba oko lutwe, mobahigula ebĩkayĩ, neryo mobamwandagalya omo katĩkatĩ embere sya Yesu iniane oko ngyingo yiwe.

²⁰Neryo Yesu abere alangira erĩkĩrĩrya lyabo mwabũga ati, Mwĩra wage, ebibi byawe byamabibuyirwa.

²¹Neryo abakangĩrĩrya bʼEmigambo nʼAbafarĩsayo mobatsũka erĩganĩrya bati, Omundu oyukatsuma nindi kwehĩ? Sihali mundu oyukatoka eribuyira ebibi nina Nyamuhanga ĩyowene!

²²Nĩkwa Yesu mwaminya amalengekanĩa wabo, neryo mwabwirabo ati, Busana nakĩ mũkaganĩraya emyatsi eyĩ yʼomo mitima yenyũ kwehĩ?

²³Ekyolo ni kyahi, erĩbũga, nyiti, Ebibi byawe byamabuyirwa, kutse erĩbũga nyiti, Hangana ugende, kwehĩ?

²⁴Nĩkwa mutoke eriminya ngoko Mugala wʼomundu ali nʼehamũlĩ muna-kihugo kino busana nʼeribuyira ebibi, neryo mwabwira omundu oyũbasĩre ati, Ngakubwira nyiti, Hangana, wĩmaye engyingo yawe ugende eka wenyũ.

²⁵Neryo-neryo mwahangana embere syabo, mwaheka engyingo abya agotsereko, mwaya eka wabo, inianemupipa Nyamuhanga.

²⁶Neryo abosĩ mobasweka, mobatsũka eripipa Nyamuhanga; kandi mobubaha bati, Twamalangira emyatsi yʼeriswekera mũnabwĩre.

²⁷Enyũma wʼemyatsi eyĩ, Yesu mwahuluka mwalangira omũsolesya oyukahulawa mo Lawĩ ĩnĩanĩkere aho bakasoleseraya. Neryo mwamubwira ati, Unyikwame

²⁸Neryo Lawĩ mwahangana, mwasĩganĩa ebyosĩ, mwakwama Yesu.

²⁹Neryo Lawĩ mwakokotya erirya ĩnene omo nyũmba yiwe busana na Yesu. Neryo mohabya endeko nene yʼabasolesya nʼabandi bandu ababya bakalira haguma nabo.

³⁰Neryo Abafarĩsayo nʼabakangĩrĩrya bʼEmigambo babo mobayikuna oko biga buwe, bati, Busana nakĩ mukalya nʼerĩpũlya haguma nʼabasolesya nʼabakola-nabi kwehĩ?

³¹Yesu mwasũbĩryabo ati, Abakalĩre sibali nʼobwaga bwʼomunganga, nĩkwa abalwere.

³²Mondasa eribirikira abandu batunganene, nĩkwa eribirikira abakola-nabi, babindule emitima yabo erireka ebibi.

³³Neryo mobabwira Yesu bati, Abiga ba Yoane, bakatsira akalyo engendo nyingi, nʼerisaba; nʼabiga bʼAbafarĩsayo bakakola batya nibya; nĩkwa abiga bawe bakalya, bakapũlaya.

³⁴Neryo Yesu mwabwirabo ati, Mwanganatoka erĩtsĩrĩsya akalyo oko bĩra bʼĩba wʼomũherũkĩ omugulu akine nabo kwehĩ?

³⁵Nĩkwa ebiro byasyasa omugulu ĩba wʼomũherũkĩ asyalũsĩbwa kubo, neryo oko mugulu oyo basyatsira akalyo.

³⁶Kandi Yesu mwatwĩrabo omũsyo ati, Sihali mundu oyũkatwa ekitomeko kyʼolukimba luhya-luhya, nʼerĩhĩrakyo oko lukimba lwa kera. Amayira atya akandĩtsandya olukimba luhya-luhya. Kandi ekitomeko kyʼoluhya-luhya sĩkyendĩsyowana omo lukimba lwa kera.

³⁷Kandi sihali mundu oyũkũtũlĩra ebĩnyũ bihyabihya omo bihu bikulu-kulu byʼebĩnyũ. Amayira atya, ebĩnyũ bihya-bihya bikatula ebihu ĩbyũtĩka, nʼebihu ibyatsanda.

³⁸Nĩkwa ebĩnyũ bihya-bihya bitolere ĩbyahĩrwa omo bihu bihya-bihya byʼebĩnyũ.

³⁹Kandi sihali omundu amabĩpũlya ebĩnyũ bya kera oyukaswasonda ebihyabihya; ati, Ebya kera byo byowene.