Read nande Lũka 6 Bible Online

Lũka 6 - nande bible

Lũka 6

¹Yesu abere akalaba omo malima wʼengano omo kiro kyʼeSabato. Abiga buwe babya bakatwa amakũndĩ wʼengano ĩbakanyũgũsũlago omo byala byabo ibanemulyayo.

²Nĩkwa abandi bʼoko Bafarĩsayo mobabũga bati, Busana nakĩ mukakola ebyo Migambo ĩkaganaya erikola omo Sabato kwehĩ?

³Yesu mwasũbĩryabo ati, Simwetasoma ekyo Dawĩdĩ akola omugulu akwa enzala, iye nʼabandu buwe?

⁴Mwingira omo nyũmba ya Nyamuhanga, kandi mwĩmya amandu awahigulawa busana na Nyamuhanga. Neryo mwalya kugo, kandi mwahago oko bandu buwe. Nĩkwa Emigambo ĩkaganaya abandu erirya kugo, ba nʼabahererĩ basa.

⁵Neryo Yesu mwabwirabo ati, Omugala wʼomundu ni Mukama wʼeSabato.

⁶Oko yindi Sabato Yesu mwaya omo nyũmba yʼerĩhĩndanamo mwakangĩrĩrya. Nʼeyo habya omundu oyũlehemĩre kwʼebyala biwe byʼamali.

⁷Neryo abakangĩrĩrya bʼEmigambo nʼAbafarĩsayo mobalebya Yesu ngʼakandĩlamya omo kiro kyʼeSabato, ibatoka erimutsongera.

⁸Nĩkwa Yesu mwaminya obũlengekanĩa bwabo, neryo mwabwira omundu oyũlehemĩre kwʼebyala biwe ati, Uhangane, wimane embere eno. Neryo mwahangana, mwimanaho.

⁹Neryo Yesu mwabwirabo ati, Ngababũlaya nyiti, nga linatolere omo Migambo erikola ebibuya omo kiro kyʼeSabato, kutse erikola nabi, erĩlamya engebe yʼomundu, kutse erĩheryayo kwehĩ?

¹⁰Neryo Yesu mwatĩmbya ameso wuwe oko bosĩ, neryo mwabwira omundu oyo ati, Ulambule ebyala byawe, Neryo omundu oyo mwakola atya, nʼebyala biwe mobyalama.

¹¹Nĩkwa mobahitana kutsibu, mobakanĩa haguma ebyo bangakola uku Yesu.

¹²Oko mugulu oyo Yesu mwaya oko kitwa eriyasabirayo, neryo mwasiba omo kiro kyosĩ erisaba Nyamuhanga.

¹³Neryo bwabere bwakya, mwabirikira abiga buwe, neryo mwayisoga ĩkũmĩ nʼababiri kubo, mwahulabo mo bakwenda.

¹⁴Ye Sĩmonĩ, oyo ahula mo Petero, na Anderea mugala wabo; Yakobo na Yoane; Fĩlĩpo na Bartolomayo;

¹⁵Matayo; na Toma; na Yakobo mugala wa Alufayo, na Sĩmonĩ oyo wahulawa mo Zelote;

¹⁶na Yũda Ĩskarĩota, oyo wamuhotera.

¹⁷Neryo Yesu mwandagala akalũa oko kitwa, neryo mwahangana ahabondere haguma nʼendeko nene yʼabiga buwe. Kandi endeko nene yʼabandu yabyaho eyalũa eYũdea hosĩ, nʼeYerũsalema, nʼoko mũsĩke wʼeTĩro nʼeSĩdona, mobasa erimuhulikirira, nʼerĩlamĩbwa kwʼesyondwala syabo.

¹⁸Nʼabagalawa nʼebĩrĩmũ bibi, mobalamĩbwa.

¹⁹Nʼabandu bosĩ mobasonda-sonda erĩmũtũlako, kusangwa obũtokĩ bwabya bũkamũlũako nʼerĩlamya abosĩ.

²⁰Nʼerisamalira abiga buwe, Yesu mwatsũka erĩbũga ati, Obutseme buli nenyũ ĩnywe bera, Kusangwa obwami bwa Nyamuhanga nĩ bwenyũ!

²¹Obutseme buli nenyũ ĩnywe mũkakwa enzala yo lino, Mwasyũgũtĩbwa! Obutseme buli nenyũ ĩnywe mukalira lino, kusangwa mwasyaseka!

²²Obutseme buli nenyũ omugulu abandu bakabakwa obusu, nʼeribagana, nʼeribatsuma, nʼeribahula bati, Muli babi, busana nʼomugala wʼOmundu!

²³Mutseme ekiro ekyo, muyisumbe omo butseme, kusangwa, oluhembo lwenyũ ni lungi elubula; kusangwa aboso-kulu wabo mobakola abamĩnyererĩ bo batya.

²⁴Nĩkwa obũlĩge kwĩnywe abateke, kusangwa mwabĩrĩkala mbolere!

²⁵Obũlĩge kwĩnywe mwabĩrĩũgũta lino, kusangwa mwasyawira! Obũlĩge kwĩnywe mukaseka lino, kusangwa mwasyasũsũmana nʼeririra!

²⁶Obũlĩge kwĩnywe omugulu abandu bosĩ basyabahula ndeke, kusangwa aboso-kulu wabo mobakola abamĩnyererĩ bʼamabehĩ bo batya.

²⁷Nĩkwa ngabũga nenyũ ĩnywe mũkanyowa nyiti, Mwanze esyonzĩgũ syenyũ, abakabakwa obusu mukolerebo ndeke.

²⁸Mutsumule abakabatakira, musabire abakabakola nabi nʼepono.

²⁹Oyũkakũswĩraya okwʼĩtema, ũmũbĩndũkĩraye nʼerindi; nʼoyũkakũhũnga kwʼerĩkotĩ ryawe, uleke aheke nʼekanzu yawe nibya.

³⁰Uhe obuli mundu oyũkakũbũlaya ekindu, nʼoyũkakũhũnga kwʼebyawe, sũmũbũlayebyo kandi.

³¹Ngoko mwanzĩre abandu ibabakolera, nenyũ ko munakolerebo mutya.

³²Kandi mwamanza ababanzĩre, ĩmwamowanĩa kyahĩ kwehĩ? Kusangwa abakola-nabi nabo bakakola batya.

³³Kandi mwamakola ndeke abakabayira ndeke, ĩmwamowanĩa kyahi kwehĩ? Kusangwa abakola nabi nabo bakakola batya.

³⁴Kandi mwamabweka abandu imune nʼamaha wʼerĩswatũhwa, ĩmwamowanĩa kyahi kwehĩ? Abakola-nabi nabo bakabweka oko bakola-nabi ĩbaswatũhwa ebiringene nabyo.

³⁵Nĩkwa mwanze esyonzĩgũ syenyũ, mokolerebo ebibuya, mubweke, simusonde eribwekulwa. Nʼoluhembo lwenyũ lwasyabya lungi, kandi nenyũ mwasyabya bagala bʼOwendata Kutsibu; kusangwa ni mwenge oko batesĩma nʼabandu babi.

³⁶Mubye nʼeriganyira ngoko Tata wenyũ ali nʼeriganyira.

³⁷Simutswere abandi, na Nyamuhanga siendisyabatswera; sĩmũhĩre abandu bʼomo musango, neryo Nyamuhanga siendisyabahĩra omo musango; mubuyire, neryo Nyamuhanga asyababuyira.

³⁸Mũhĩtaye, na Nyamuhanga asyabaha, mwasyabagalira olulengo lowene, olũsokĩre, olũtsĩngĩre, oluli kwʼomutswago. Kusangwa olulengo olo mukalengamo, mwasyalengerwalo.

³⁹Neryo Yesu mwatwĩrabo omũsyo ati, Endĩmatĩme yanganatoka erisondola eyindi ndĩmatĩme kwehĩ? Ababiri sibendisyatogera omo kyũna kwehĩ?

⁴⁰Omwiga sĩalengĩre omũkangĩrĩrga wuwe; nĩkwa obuli mundu ukiga amabibuga erĩĩgĩsĩbwa asyabya ngʼomũkangĩrĩrya wuwe.

⁴¹Kandi busana nakĩ ukasamalira akati akali omo lĩso lya mũlĩkyenyũ, nĩkwa sulilangira ekĩtĩka ekiri omo lĩso lyawe kwehĩ?

⁴²Kutse wangatoka eribwira mũlĩkyenyũ uti kwehĩ? Uti, Mũlĩkyetu, uleke nyilole akati akali omo lĩso lyawe, nawe isulilangira ekĩtĩka ekiri omo lĩso lyawe. Uwe mũtebya, Ũtsũke erilola ekĩtĩka ekiri omo lĩso lyawe, neryo wasyalangira ndeke erilola akati akali omo lĩso lya mũlĩkyenyũ.

⁴³Kusangwa sihali omuti owene owakaheta kwʼebĩgũma bibi, kandi omuti mubi owakaheta kwʼebĩgũma byowene.

⁴⁴Obuli muti akaminyikala busana nʼebĩgũma byago. Kusangwa abandu sibalioha ebĩgũma byʼemĩtĩnĩ oko muti wʼemisakisaki, kandi sibalioha ebĩgũma byʼebĩnyũ oko kisaka kyʼamahwa.

⁴⁵Omundu mubuya akahũlũkaya ebibuya byʼomo kigona kyʼemyatsi mibuya vʼomutima wuwe; nʼomundu mubi akahũlũkaya emyatsi mibi omo kigona kyʼemyatsi mibi yʼomutima wuwe. Kusangwa obuno bũkabũga ebyoswĩre omo mutima.

⁴⁶Busana nakĩ mukanyahula mo Mukama, Mukama, isimulikola ebyo ngababwira kwehĩ?

⁴⁷Obuli mundu oyukasa kwĩngye, kandi akowa ebĩnywa byage nʼerikolabyo ngandĩbakangya kwʼasosĩre.

⁴⁸Asosĩre ngʼomundu wahĩmba enyũmba: mwatakula omwisi mo hali neryo mwahĩra ekibanza okwʼĩbwe. Neryo omugulu erigunga lyʼamagetsi lyasa, olũsĩ molwayĩswĩrya oko nyũmba eyo neryo molutatoka erĩsũka-sũkanĩayo, kusangwa yabya yĩhĩmbĩre ndeke-ndeke.

⁴⁹Nĩkwa omundu oyũkowa ebĩnywa byage atekolabyo, asosĩre omundu oyo wahĩmba enyũmba yʼoko kitaka ahate kibanza; nʼolũsĩ molwayĩswĩrya kuyo, neryo-neryo moyatera, nʼerihera lyʼenyũmba eyo molyabya ĩnene.