Read nande Lũka 7 Bible Online

Lũka 7 - nande bible

Lũka 7

¹Neryo Yesu abere abibuga eribwira abandu emyatsi yosĩ eyĩ, mwingira eKapernaũmũ.

²Neryo habya omukulu wʼabasĩrĩkanĩ bʼAbaroma oyuwite omugombe wuwe mwanze. Neryo omugombe oyo inialwere hakũhĩ nʼerihola.

³Omugulu omukulu oyo owa engulu ya Yesu, mwatuma abakulu bʼAbayũda uku Yesu erĩmũbũlya ati ase alamaye omugombe wuwe.

⁴Abakulu abo mobahĩka uku Yesu, mobamulemba-lemba kutsibu bati, Omundu oyũ atolere ĩwamũwatĩkya.

⁵Anzĩre ekihanda kyetu, kandi abĩrĩtũhĩmbĩra enyũmba yetu yʼerĩhĩndanamo.

⁶Neryo Yesu mwagenda nabo. Abere ahĩka hakũhĩ nʼenyũmba, omukulu wʼabasĩrĩkanĩ mwamutumira abĩra buwe ati. Mukama, Sũyĩlũhaye, kusangwa sinyitolere ukingira omo nyũmba yage;

⁷kandi nage sĩnyĩyĩganzĩre nga nyitolere erĩkũhĩkako. Nĩkwa ũbũge kĩnywa kiguma, nʼomugombe wage asyalamĩbwa.

⁸Kusangwa nage ngwite abakanyihamula, kandi nyiwite abasĩrĩkanĩ bage, ngabũga nʼoyũ nyiti, Ugende, iniagenda; nʼoko gundi nyiti, Wase, iniasa; kandi ngabwira omukobe wage nyiti, Kola ekĩ, iniakoiakyo.

⁹Neryo omugulu Yesu owa ebĩ mwaswekera omukulu oyũ, neryo mwakebera endeko eyamukwama ati, Ngababwira nyiti, Sinditabana erĩkĩrya ĩnene ngʼerĩ, kutse omo Baĩsraelĩ.

¹⁰Abakwenda abo mobasuba omo nyũmba yʼomukulu oyo, neryo mobeya omugombe oyo iniabirilama.

¹¹Neryo enyũma wʼaho akatambĩ kake Yesu mwaya oko mũyĩ owakahulawa mo Naĩna. Kandi abiga buwe nʼabandu bangi mobagenda haguma naye.

¹²Neryo abere ahĩka hakũhĩ nʼolũkyo lwʼomũyĩ oyo, mweya bakaheka ekĩnda kyʼomundu. Oyo abya abũtĩrwe ĩyowene na nyĩnya wuwe. Kandi nyĩnya abya mũkwakalĩ, nʼendeko nene yʼomũyĩ oyo yabya haguma naye.

¹³Neryo mugulu Omukama amulolako, mwamuganyira, mwamubwira ati, Sulire.

¹⁴Neryo Yesu mwahĩkaho mwatũla okwʼĩsandũkũ eriri mwʼekĩnda, nʼabandu abahekĩreryo mobimana. Nĩkwa Yesu mwabũga ati, Mũlwana, ngakubwira nyiti, Hangana!

¹⁵Nʼomũholĩ oyo mwĩkala, mwatsũka erĩbũga, neryo Yesu mwamũhererya nyĩnya wuwe.

¹⁶Neryo abosĩ mobubaha, mobatsũka eripipa Nyamuhanga, bati, Omũmĩnyererĩ mukulu abirihangana omo katĩkatĩ ketu! Kandi, Nyamuhanga abĩrĩhĩka erĩwatĩkya abandu buwe.

¹⁷Nĩkwa engulu eyĩ moyagenda-genda eYũdea hosĩ, nʼomo bihugo byosĩ ebĩhererenĩe naho.

¹⁸Nĩkwa abiga ba Yoane mobamubwira emyatsi yosĩ eyĩ.

¹⁹Neryo Yoane mwabirikira abiga buwe babiri, mwatumabo oko Mukama ati, Nina we oyukasa, kutse tulindirire gundi kwehĩ?

²⁰Nʼomugulu bahĩka uku Yesu, mobabũga bati, Yoane Mũbatĩsya amatutuma ukʼuwe ati, Nina we oyukasa, kutse tulindirire gundi kwehĩ?

²¹Nʼoko ndambĩ eyo nyisa-nyisa Yesu mwalamya bandu bangi kwʼamakonĩ wabo, nʼesyondwala, nʼebĩrĩmũ bibi; kandi mwaha esyondĩmatĩme nyingi erilangira.

²²Neryo Yesu mwasũbĩrya abakwenda abo ati, Mugende, mubwire Yoane, ebyo mwabirilangira nʼebyo mwabĩrĩowa, muti, esyondĩmatĩme sirimulangira, nʼebirema birimugenda, abahaga bakalamĩbawa, abatsiha balĩmowa, abaholĩ balĩmũlũbũkĩbwa, nʼEngulu Yowene ĩkatũlawa oko bera.

²³Nʼobutseme buli oko yutehũkahũkaya omutima busana nage.

²⁴Neryo abakwenda ba Yoane babere babigenda, Yesu mwatsũka erĩbũga nʼesyondeko busana na Yoane ati, Mwaya omo mbwarara eriyalola mʼũkũkĩ kwehĩ? Mwayalangira ekibingu ekikatengatenganĩbawa nʼerihunga kwehĩ?

²⁵Nĩkwa mwayayo erilangirakĩ kwehĩ? Muti, Omundu oyo wambite esyongimba nyolo-nyolo kwehĩ? Mũlebaye, abambite esyongimba sĩkangabasenĩe nʼabakalya ebisi-bisi bali omo manyũmba wʼabami.

²⁶Nĩkwa momwayayo eriyalola kũkĩ kwehĩ? Muti, Omũmĩnyererĩ kwehĩ? Ega, ngababwira nyiti, Mwabirilangira oyũlengĩre omũmĩnyererĩ.

²⁷Yoyo Masako akahula ati, Lebaya, ngatuma omukwenda wage embere syenyũ, Oyo wasyowanĩa enzira yawe embere syawe.

²⁸Kandi Yesu mwabũga ati, Ngababwira nyiti, Yoane ni mukulu kwilaba abandu bosĩ abakabutawa; nĩkwa Omuke kutsibu omo bwami bwa Nyamuhanga amũlengĩre.

²⁹Neryo omugulu abandu bosĩ nʼabasolesya bowa ebĩnywa ebĩ, mobaganza Nyamuhanga kwʼali wʼerĩbanza, kusangwa mobabatĩsĩbwa na Yoane.

³⁰Nĩkwa Abafarĩsayo nʼabakangĩrĩrya bʼEmigambo mobagana erisonda lya Nyamuhanga busana nabo, isibetabatĩsĩbwa na Yoane.

³¹Neryo Yesu ati, Nasyalĩngĩrĩranĩa abandu ba sesene bo nakĩ kwehĩ? Kandi basosĩre ngakĩ kwehĩ?

³²Bali ngʼabana abĩkere omo katale ibakabirikirana bati, Twabiribabuhira amalenga, neryo momutetasata; motwimba Olwimbo lwʼerita omundu, nenyũ momutetalira.

³³Kusangwa Yoane Mũbatĩsya mwasa iniakatsira akalyo, nʼerĩtendĩpũlya ebĩnyũ; nenyũ muti, Ali ko mbĩnga.

³⁴Omugala wʼOmundu abĩrĩhĩka, iniakalya nʼerĩpũlya; nenyũ muti, Lebaya, owʼomururu, nʼomũkũndĩrya, omwĩra wʼabasolesya nʼabakola-nabi.

³⁵Abandu bosĩ abakalĩga amenge wa Nyamuhanga bakakangaya kwʼamenge ayo ni wʼekwenene.

³⁶Neryo Omũfarĩsayo muguma mwabirikira Yesu erirya haguma naye. Neryo mwaya omo nyũmba yʼOmũfarĩsayo oyo, neryo mwĩkala okwʼirya.

³⁷Neryo oko mũyĩ oyo habya omũkalĩ mukola-nabi. Neryo abere aminya ko Yesu abya akalira omo nyũmba yʼOmũfarĩsayo oyo, neryo mwaleta erĩtambya lyʼerĩbwe lyowenenga lyʼamagũta awakakumba ndeke kutsibu.

³⁸Neryo mwimana enyũma wa Yesu hakũhĩ nʼebisando biwe, iniakalira nʼerĩtsapya ebisando bya Yesu omo mĩsonĩa yiwe. Neryo mwasangula ebisando bya Yesu omo nzwiri syʼomutwe wuwe, nʼeriryatsirirabyo, neryo mũtũlĩra amagũta ayo awakakumba ndeke kutsibu oko bisando biwe.

³⁹Neryo omugulu Omũfarĩsayo oyo wabirikira Yesu alangira ekyo, mwayibwira omwisi wuwe ati, Kumbe omundu oyũ nga nĩ mũmĩnyererĩ, kumbe angaminyerera omũkalĩ oyũkamũtũlako, nʼomũsĩndo wuwe kwʼali mukola-nabi.

⁴⁰Neryo Yesu mwabwira Sĩmonĩ ati, Sĩmonĩ nyiwite ekyʼerikubwira. Naye ati, Mũkangĩrĩrya, ũtũlego.

⁴¹Neryo Yesu mwabũga ati, Mohabya omũbwekĩ muguma wʼesyofranka oyo wabweka abandu babiri. Abandu aba babya kʼomwĩnda, omuguma wʼesyofranka magana atanu, nʼogundi amakũmĩ atanu.

⁴²Babere babula ebyʼerĩmũtũha, omũbwekĩ oyũ mwabuyira ababiri bosĩ. Nĩkwa nindi wa kubo yo wasyamwanza kwilaba kwehĩ?

⁴³Sĩmonĩ mwamũsũbĩrya ati, Mbino oyo abuyira bingi. Neryo Yesu mwamubwira ati, Wamatswera ndeke.

⁴⁴Neryo mwakebera omũkalĩ oyo, mwabwira Sĩmonĩ ati, Wamalangira omũkalĩ oyũ kwehĩ? Mongingira omo nyũmba yawe; mutetamba amagetsi busana nʼebisando byage, nĩkwa iye abĩrĩtsapya ebisando byage omo mĩsonĩa yiwe nʼerisangulabyo omo nzwiri siwe.

⁴⁵Mũtetariyĩkokya nʼerinyiryatsirira; nĩkwa iye erĩtsũka omugulu indingira sĩalĩtũmbya eriryatsirira ebisando byage.

⁴⁶Mutetahakabya omutwe wage wʼamagũta, nĩkwa iye abĩrĩhakabya ebisando byage omo magũta awakakumba ndeke kutsibu.

⁴⁷Kikaleka inakubwira nyiti, Ebibi biwe bingi byabiribuyirwa, kusangwa abirianza kutsibu; nĩkwa oyukabuyirawa bike, akanza hake.

⁴⁸Neryo Yesu mwabwira omũkalĩ oyo ati, Ebibi byawe byamabibuyirwa.

⁴⁹Neryo ababya okwʼirya haguma naye, mobatsũka erĩbũga bati, Oyũ nindi oyukabuyira ebibi kwehĩ?

⁵⁰Neryo Yesu mwabwira omũkalĩ ati, Erĩkĩrĩrya lyawe lyamakũlamya; ugende buholo.