Read nande Lũka 8 Bible Online

Lũka 8 - nande bible

Lũka 8

¹Enyũma wʼaho Yesu mwatsũka erilaba ehosĩ omo mĩyĩ nʼomo hĩyĩ, ĩnĩakatũlaganaya Engulu Yowene nʼerĩtũla omwatsi wʼobwami bwa Nyamuhanga. Abiga erĩkũmĩ nʼababiri mobagenda haguma naye,

²nʼabakalĩ nibya abalamĩbawa kwʼebĩrĩmũ bibi nʼesyondwala. Ye Marĩa oyukahulawa mo Magdalene, oyo walũsĩbawa kwʼesyombĩnga sirinda,

³na Yoana, muka Kũza, omũbĩkĩ wʼebindu bya Herode, na Susana, nʼabandi bakalĩ bangi ababya bakawatĩkya Yesu nʼabiga buwe omo bindu byabo.

⁴Abandu mobahĩka uku Yesu bakalũa oko mĩyĩ mingi; nʼomugulu endeko nene yahĩndana haguma, Yesu mwatwa omũsyo ati,

⁵Omundu mwayabiba esyombuto siwe. Neryo omugulu abibasyo esindi mosyatogera oko mũsĩke wʼenzira; mosyalyatangirirwa, nʼesyonyonyũ syʼomo kyanya mosyatomengerasyo.

⁶Nʼesindi mosyatogera oko kitaka kyʼamabwe, nʼomugulu syalasa mosyuma kusangwa mosyabula amagetsi.

⁷Nʼesindi mbuto mosyatogera omo mahwa; nʼamahwa mwatasa haguma nasyo, mwakũsyasyo.

⁸Nʼesindi mbuto mosyatogera oko kitaka kyowene, Mosyalasa, mosyasohola esyombuto ĩgana. Omugulu Yesu abya akabũga emyatsi eyĩ, mwabya akabirikira ati, Oyuwite amatwĩ wʼerĩowa, owe!

⁹Neryo abiga mobabũlya Yesu enzumwa yʼomũsyo oyũ.

¹⁰Neryo Yesu mwasũbĩrya ati, Mwabirihabwa eriminya erĩkũmbo lyʼobwami bwa Nyamuhanga; nĩkwa abandi bakahabawa omo mĩsyo: neryo erilangira sibalangire, nʼerĩowa, sibaminye.

¹¹Nĩkwa enzumwa yʼomũsyo yeyĩ: embuto kye kĩnywa kya Nyamuhanga.

¹²Esyombuto esyatogera oko mũsĩke wʼenzira ni bandu abakowa; nĩkwa Satanĩ yĩkahĩka nʼerĩlũsya omwatsi gʼomo mitima yabo, ibatatoka erĩkĩrĩrya nʼerĩlamĩbwa.

¹³Esyombuto esyatogera oko kitaka kyʼamabwe ba bandu abakowa ekĩnywa nʼeriangirirakyo nʼobutseme. Nĩkwa ekĩnywa ekyo sikiribana emĩrĩhĩ; bakĩkĩrĩraya katambĩ kake, neryo oko mugulu wʼerirengwako, bakatswa.

¹⁴Nʼesyombuto esyatogera omo mahwa ni bandu abakowa; nĩkwa amaganĩryo nʼebindu nʼerĩyĩtsemesya lyʼengebe yʼeno, bĩkakũsaya ekĩnywa ekyo, neryo ikitera ndeke.

¹⁵Esyombuto esyatogera oko kitaka kyowene ba bandu abakowa ekĩnywa ekyo omo mutima ogowene wʼekwenene, ibakahambakyo ndeke omo mutima, neryo ibakahatikana, nʼerĩerya esyombuto syʼekĩnywa kya Nyamuhanga.

¹⁶Nĩkwa sihali mundu oyũkakaya etala nʼerĩkũnĩngĩrayo omo kibindi, kutse erĩhĩrayo eyĩkwa oko ngyingo, nĩkwa akahĩrayo oko mbaniko, neryo abandu abakahĩkamo batoke erilangira etala.

¹⁷Kusangwa sihali ekĩbĩsamĩre ekitendisyamĩnyĩkalĩbwa, kutse erĩkũmbo eritendisyakũmbũlwa.

¹⁸Muyirenge busana nʼebyo mũkowa! Kusangwa omundu oyuwite kindu, asyahabwa ebindi, nʼomundu oyutawitekĩ asyasagulwa nʼekyo alwe aganĩrye ati awite.

¹⁹Neryo nyĩnya nʼabagala babo Yesu mobahĩka, nĩkwa mobataluka erĩhĩka hakũhĩ naye busana nʼendeko.

²⁰Neryo omundu mwabwira Yesu ati, Koyo wawe nʼabagala benyũ banimene eyĩhya, bakasonda erikulolako.

²¹Nĩkwa Yesu mwasũbĩryabo ati, Koyo wage, nʼabagala betu ba bakowa ekĩnywa kya Nyamuhanga, nʼerikolakyo.

²²Neryo ekiro kiguma Yesu mwingira omo bwato haguma nʼabiga buwe, neryo mwabwirabo ati, Tusokere eyisirya wʼengetsi. Neryo mobahongoka.

²³Babere bakahongola obwato, Yesu mwayato. Neryo ekihunga mokyandagalira omo ngetsi, nʼobwato mobwasonda erĩũsũla mwʼamagetsi, mobabya omo bwĩko.

²⁴Neryo abiga mobahĩka uku Yesu, mobamũbũkya bati, Mukama, Mukama, tukahwa! Neryo Yesu mwahangana, mwakunga ekihunga, nʼerikarama lyʼebisunda, nabyo mobyatekana mohahita esĩsyerere.

²⁵Neryo Yesu mwabwira abiga ati, Erĩkĩrĩrya lyenyũ liri hahi kwehĩ? Nabo mobubaha, mobasweka, ibakabwirana bati, Omundu oyũ nindi Oyukahana ebihunga nʼamagetsi, ibyamukenga kwehĩ?

²⁶Neryo mobahongola obwato eriya oko kihugo kyʼAbagerase ekiri eyisirya kwʼeGalĩlaya.

²⁷Neryo Yesu abere ahĩka oko mũsĩke wʼengetsi oko kitaka, omundu muguma mwahĩndana naye ĩnĩakalũa omo mũyĩ. Omundu oyo abya kwʼesyombinga, kandi isialiambala esyongimba oko biro binene, ĩsĩalĩkala omo nyũmba, nĩkwa omo katĩkatĩ kʼesisinda,

²⁸Abere alola uku Yesu, neryo mwalaka, mwawa ahisi embere siwe, neryo mwabũga nʼomulenge munene ati, indi nʼomwatsi wahi nawe, uwe Yesu, Mugala wa Nyamuhanga Wʼendata Kutsibu, ngakulemba-lemba nyiti sũnyagalaye.

²⁹Kusangwa Yesu iniabirihana ekĩrĩmũ kibi ekyo ati kĩlũe omo mundu oyo. Esyongendo nyingi ikyabirimuhamba; kandi abya iniabiribohwa omo mahulula nʼemisege, nʼerĩteyĩbwa, nĩkwa mwabya akatwa amahulula wuwe iniakatwalawa nʼembĩnga omo mbwarara.

³⁰Neryo Yesu mwabũlyayo ati, Uwendi kwehĩ? Nayo moyasũbĩrya yiti, Erĩna lyage ni ndeko, kusangwa esyombĩnga nyingi isyabirimũhĩkako.

³¹Nʼesyombĩnga esyo mosyalemba-lemba Yesu siti siahanesyo eriya omo kũlĩmũ.

³²Nĩkwa ekihangulo kinene kyʼesyongulube kyabya ikikalira oko kitwa, nʼesyombĩnga mosyalemba-lemba Yesu siti alĩgĩresyo eriingira omo syongulube. Neryo mwalĩgĩrasyo.

³³Neryo esyombĩnga mosyalũa oko mundu oyo, mosyingira omo syongulube; nʼekihangulo kyosĩ ekyo mokyatibita eyĩkwa ahasenzere erĩhĩka omo ngetsi, neryo mosyasenda.

³⁴Neryo omugulu abalĩsya basyo balangira ebyamabya, mobatibita mobayatũla omwatsi oyũ omo mũyĩ nʼomo kihugo ekyo.

³⁵Neryo abandu mobayalebya ebyabere; mobahĩka uku Yesu, mobeya omundu oyo wabya kwʼesyombĩnga ĩsyabĩrĩmũlũako ĩnĩanĩkere oko bisando bya Yesu, iniambite esyongimba, iniabiribya mundu wʼobũlengekanĩa, neryo abosĩ mobubaha.

³⁶Neryo abandu abalangira omwatsi oyo, mobabwira abandu ngoko oyo wabya kwʼesyombĩnga kwʼalamĩbawa.

³⁷Neryo abandu bosĩ bʼekihugo kyʼAbagerase nʼekindi kihugo kyayo, mobabũlya Yesu bati alũe kubo, kusangwa mobubaha kutsibu. Neryo Yesu mwingira omo bwato, mwasubula.

³⁸Neryo omundu oyo walũa kwʼesyombĩnga mwalemba-lemba Yesu eribya haguma naye. Nĩkwa Yesu mwamutuma ati,

³⁹Usube eka wawe, ubwirebo emyatsi minene eyo Nyamuhanga abirikukolera. Neryo omundu oyo mwayatũlago omo mũyĩ gosĩ emyatsi minene eyo Yesu amukolera.

⁴⁰Neryo omugulu Yesu asubula, endeko moyamũkokya, kusangwa abosĩ babya ibakamulindirira.

⁴¹Neryo omundu oyukahulawa mo Yaĩro mwasa. Iye abya mũtabalĩ wʼenyũmba yʼerĩhĩndanamo, neryo mwawa oko bisando bya Yesu nʼerimulemba-lemba ati ahĩke omo nyũmba yiwe.

⁴²Kusangwa abya awite mwali muguma musa, wʼemyaka ĩkũmĩ nʼĩbĩrĩ, neryo abya hakũhĩ nʼerihola. Nĩkwa omugulu Yesu abya akayayo, esyondeko mosyamũhatatanĩa.

⁴³Neryo omũkalĩ muguma abyaho oyo wabya akwĩre obũkonĩ bwʼerĩlũsya omusasi oko myaka ĩkũmĩ nʼĩbĩrĩ. Kandi abya iniabiribugira ebindu biwe byosĩ oko banganga, kandi sihabya mundu watoka erĩmũlamya.

⁴⁴Omũkalĩ oyo mwasa omo ndeko enyũma uku Yesu, mwatũla oko mũsĩke wʼolukimba luwe, neryo-neryo erisenda lyʼomusasi wuwe molyũmbya.

⁴⁵Yesu mwabũlya ati, Nindi yo wamanyĩtũlako kwehĩ? Neryo abosĩ mobayigana. Petero mwabũga ati, Mukama, esyondeko sĩkakũkũna nʼerĩkũhatatanĩa!

⁴⁶Nĩkwa Yesu mwabũga ati, Omundu amanyĩtũlako, kusangwa namaminya kʼobũtokĩ bwamanyĩlũako.

⁴⁷Neryo omũkalĩ abere alangira kwʼate angatoka erĩbĩsama, mwahĩka nʼerititimana, mwawa ahisi embere sya Yesu, neryo mwatũlago embere syʼabandu bosĩ ekirialeka ĩnĩamũtũlako, kandi ngoko alamĩbawa neryoneryo.

⁴⁸Nĩkwa Yesu mwamubwira ati, Mwali wage, erĩkĩrĩrya lyawe lyamabĩkũlamya; ugende buholo.

⁴⁹Kandi omugulu Yesu abya akĩnabũga, omundu mwahĩkaho ĩnĩakalũa omo nyũmba yʼomũtabalĩ wʼenyũmba yʼerĩhĩndanamo. Ati, Mwali wawe abirihola; sũswelũhaya Omũkangĩrĩrya.

⁵⁰Nĩkwa omugulu Yesu owa ebyo, mwabwira Yaĩro ati, Sigubahe Wĩkĩrĩraye lisa. Akandilama.

⁵¹Neryo abere ahĩka omo nyũmba, Yesu mwatalĩga mundu akayamo haguma naye, nina Petero, na Yoane, na Yakobo, nʼĩse na nyĩnya bʼomwana oyo.

⁵²Abandu bosĩ babya bakalira nʼerĩsũsũmana. Nĩkwa Yesu mwabũga ati, Muleke eririra, kusangwa sĩaholĩre, nĩkwa alito.

⁵³Nabo mobamuseka, kusangwa ĩbanasĩ kwʼaholĩre.

⁵⁴Nĩkwa Yesu mwahamba ebyala biwe, mwabirikira ati, Iwe mwana, hangana!

⁵⁵Nʼekĩrĩmũ kiwe mokyamusubako, neryo mwahangana lũba. Yesu mwabũga ati bamuhe ebyʼerirya.

⁵⁶Neryo abamubuta mobasweka; nĩkwa Yesu mwahanabo ati, Sibabwire mundu ebyabere.