Read nande Lũka 9 Bible Online

Lũka 9 - nande bible

Lũka 9

¹Neryo Yesu mwabirikira abiga ĩkũmĩ nʼababiri bo haguma, mwahabo obũtokĩ nʼehamũlĩ yʼerihiga esyombĩnga syosĩ, nʼerĩlamya abakonĩ.

²Neryo mwatumabo erĩtũla omwatsi wʼobwami bwa Nyamuhanga nʼerĩlamya abakonĩ.

³Kandi mwabwirabo ati, Simutwale kindu busana nʼolugendo lwenyũ, kutse omũtso, kutse engunza, kutse akalyo, kutse franka, kutse esyokanzu ĩbĩrĩ.

⁴Nʼomo nyũmba eyo bakabakokayamo, mwĩkalemo erĩhĩka aho mwasyalũĩra oko mũyi oyo.

⁵Nʼaho abandu bakagana erĩbakokya, omugulu mũkalũa oko mũyĩ oyo imwakunguta olũtũtũ oluli oko bisando byenyũ, busana nʼerĩmĩnyĩsyabo.

⁶Neryo abiga mobahongoka nʼerigenda omo mĩyĩ yosĩ, erĩtũla Engulu Yowene, nʼerĩlamya abandu ehosĩ.

⁷Herode, omũtabalĩ wʼeGalĩlaya, mowa emyatsi yosĩ eyabere, neryo mwahanga-hangya omutima, kusangwa abandi bandu bati, Yoane Mũbatĩsya abĩrĩlũbũka oko baholĩ!

⁸Abandi bati, Elĩa abiriswahuluka, nʼabandi bati, Omuguma gʼoko bamĩnyererĩ ba kera abirisuba.

⁹Herode ati, Yoane monamũtwa kʼomutwe, omundu oyo nindi oyo ngowa kwʼemyatsi eyĩ kwehĩ? Neryo Herode mwasonda-sonda erilola uku Yesu.

¹⁰Neryo abakwenda babere babisubula, mobabwira Yesu emyatsi yosĩ bakola. Neryo Yesu mwatwalabo oko mũyĩ owakahulawa mo Betesaĩda.

¹¹Nʼesyondeko syabere syaminya, mosyamukwama. Naye mwakokyabo, iniakabwirabo omwatsi wʼobwami bwa Nyamuhanga, neryo mwalamya ababya nʼobwaga bwʼerĩlamĩbwa.

¹²Neryo bwabere bwasonda erihumbera, abiga erĩkũmĩ nʼababiri mobamũhikako bati, Ulagane nʼendeko batoke eriya omo mĩyĩ nʼamalima ebĩhererenĩe, batoke eriyagotserayo nʼeribana ebyʼerirya; kusangwa tuli eno yʼomo mbwarara.

¹³Nĩkwa Yesu mwabwirabo ati, Nenyũ muhebo akʼerirya. Nabo mobabũga bati, Situwite bindi, wa nʼamandu atanu nʼamahere abiri. Wanzĩre itwayagula ebyalya busana nʼabandu bosĩ aba kwehĩ?

¹⁴Abalume ababyaho babya nga elfu ĩtanu (5,000). Neryo Yesu mwabwira abiga buwe ati, Mwĩkalaye abandu mo ndeko-ndeko yʼamakũmĩ atanu-atanu.

¹⁵Neryo abiga mobakola batya, mobĩkalya abandu bosĩ bʼahisi.

¹⁶Neryo Yesu mwĩmya amandu atanu nʼamahere abiri, mwalalamira endata elubula, neryo mwatsumula kalyo ako, neryo mwatsũtsangago mwahabyo oko biga ati bahĩrebyo embere syʼabandu omo ndeko.

¹⁷Abosĩ mobalya, mobũgũta. Neryo abiga mobasonga-songya ebyasaka, ebitiri ĩkũmĩ nʼebibiri byʼebitahangukira.

¹⁸Omugulu Yesu abya akasaba ĩyowene, abiga mobamũhĩkako, neryo Yesu mwabũlyabo ati, Esyondeko sĩkabũga siti nyirindi kwehĩ?

¹⁹Mobamũsũbĩrya bati, Abandi bati uli Yoane Mũbatĩsya, nĩkwa abandi bati uli Elĩa, nʼabandi bati, omuguma gʼoko bamĩnyererĩ ba kera oyo wabĩrĩlũbũka.

²⁰Neryo Yesu mwabũlyabo ati, Nenyũ, mũkabũga muti nyirindi kwehĩ? Petero mwamũsũbĩrya ati, Uli Kristo wa Nyamuhanga.

²¹Neryo Yesu mwaganĩabo nʼerihanabo ati sibabwire omwatsi oyũ go mundu,

²²ati, Omugala wʼOmundu atolere iniagalwa kutsibu, nʼeriganwa nʼabakulu, nʼabahererĩ bakulu, nʼabakangĩrĩrya bʼEmigambo nʼakandi ĩnĩĩtwa, neryo enyũma wʼebiro bisatu ĩnĩalũbũkĩbwa.

²³Neryo Yesu mwabwira abosĩ ati, Omundu amanza erinyikwama, ayigane, aheke omusalaba wuwe obuli kiro, anyikwame.

²⁴Kusangwa omundu Oyukasonda erĩlamya engebe yiwe asyatalyayo; nʼomundu Oyũkatalaya engebe yiwe busana nage asyalamyayo.

²⁵Omundu akabana endũndĩ yahi; amatunda ekihugo kyosĩ nĩkwa akatalya engebe yiwe kwehĩ?

²⁶Nĩkwa omundu amanyĩkwa esĩsonĩ, nʼeripona ebĩnywa byage, Omugala wʼOmundu asyamũkwa esĩsonĩ omugulu asyasa omo lukengerwa luwe, nʼolwa Tata wuwe, nʼolwʼabamalaĩka babũyĩrĩre.

²⁷Nĩkwa ngababwira kwenene nyiti, Hali abandu abimene hano, abatendisyahola bate balangira Obwami bwa Nyamuhanga.

²⁸Neryo enyũma wʼerĩbũga emyatsi eyĩ, nga biro munani, Yesu mwĩmya Petero na Yakobo na Yoane haguma naye, mobaya oko kitwa eriyasabirayo.

²⁹Neryo abere anemusaba, erisosa lyʼobũsũ buwe molyahinduka, nʼesyongimba siwe mosyahenĩa nʼerĩkangabasanĩa.

³⁰Neryo lebaya, abandu babiri babya bakakanĩa naye; babya Musa na Elĩa.

³¹Ibakabutuka omwʼĩkangabasanĩa lyʼelubula, ĩbakakanaya omwatsi wʼoluholo luwe olo akasyaholera eYerũsalema.

³²Nĩkwa Petero nʼababya naye mobayitsingirako nʼotũgotserĩ; nĩkwa babere babuka, mobalangira erĩkangabasanĩa liwe nʼabandu babiri ibanahangene haguma naye.

³³Neryo abandu abo omugulu basonda erigenda, Petero mwabũga na Yesu ati, Mukama, lyowene ko tuli hano; tũhĩmbe amahema asatu, enguma busana nawe, nʼenguma busana na Musa, nʼenguma busana na Elĩa, ĩsĩasĩ ngʼakabũgakĩ.

³⁴Abere anemũbũga ebĩ, ekĩtũ mokyahuluka mokyasũkũlĩryabo; nabo mobubaha omugulu ekĩtũ kyasũkũlĩrayabo.

³⁵Neryo omulenge mwalũa omo kĩtũ ati, Oyũ ni Mugala wage, Omusombolwa wage; mũmowe!

³⁶Neryo omulenge abere abĩũmbya, Yesu mwabanikaho ĩyowene. Abiga mobabya bũkũtũ, mobatabwira mundu omo biro ebyo emyatsi eyo balialangira.

³⁷Neryo engyakya mobandagala bakalũa oko kitwa, nʼendeko nene moyahĩndana na Yesu.

³⁸Neryo omundu oyo wabya omo ndeko mwabũga nʼomulenge munene ati, Mũkangĩrĩrya! ngakulembalemba nyiti Ũlebaye omwana wage oyo nyĩbũtĩre, ĩyowene musa!

³⁹Neryo akahambawa nʼekĩrĩmũ, neryo inialaka, kandi kĩkamũsala-salaya, iniaburura erĩhũlo, kandi kĩkamũhũnzanga, sikirimuleka lũba.

⁴⁰Monalemba-lembĩre abiga bawe nyiti bakiguse eyĩhya, nĩkwa mobatalũkĩre.

⁴¹Yesu mwasũbĩrya ati, Ĩnywe lulengo lwʼerĩtendĩkĩrĩrya nʼolwʼobuhaka, nasyĩkala nenyũ omo mugulu gungahi, nasyababegerya mugulu gungahi kwehĩ? Ulete mugala wawe yo hano.

⁴²Neryo abere anemwasa embĩnga eyo moyamugusa ahisi, moyamũgala-galya. Nĩkwa Yesu mwakunga ekĩrĩmũ kibi ekyo, mwalamya omwana, neryo mwamũsũbya ũkwʼĩse wuwe.

⁴³Nĩkwa abandu bosĩ mobasweka kutsibu busana nʼobũtokĩ bunene bwa Nyamuhanga.

⁴⁴Nĩkwa omugulu abandu bosĩ babya bakaswekera emĩbĩrĩ Yesu abya akakola, Yesu mwabwira abiga buwe ati, Muhulikirire ebĩnywa ebĩ, kusangwa Omugala wʼOmundu asyahoterwa oko bandu.

⁴⁵Nĩkwa mobataminya ekĩnywa ekĩ, kandi mokyabĩswa kubo, sibaminyekyo, kandi babya bakubaha erĩmũbũlya enzumwa yʼomwatsi oyũ.

⁴⁶Neryo mohabya obuhaka omo katĩkatĩ kabo nindi nga yo mukulu.

⁴⁷Nĩkwa Yesu mwaminya ebyo babya bakaganĩrya omo mitima yabo, neryo mwĩmya omwana mulere mwamũhanganĩa hakũhĩ naye,

⁴⁸neryo mwabwirabo ati, Omundu oyũkakokaya omwana mulere ngʼoyũ omo lĩna lyage akanyĩkokaya; nʼoyũkanyĩkokaya, akakokaya oyo wanyituma. Kusangwa oyuli muke omo katĩkatĩ kenyũ yo mukulu.

⁴⁹Neryo Yoane mwasũbĩrya ati, Mukama motwalangira omundu akahiga esyombĩnga omo lĩna lyawe; neryo motwalenga erĩmũkakĩrya kusangwa isiali oko ndeko yetu.

⁵⁰Nĩkwa Yesu mwamubwira ati, Sĩmũmũkakĩraye, kusangwa oyute nzĩgũ yenyũ iniali oko luhande lwenyũ.

⁵¹Neryo ebiro bya Yesu byʼeritwalwa elubula byabere byasonda erĩhĩka hakũhĩ, mwahĩra omutima wuwe oko lugendo lwʼeriya eYerũsalema.

⁵²Neryo mwatuma abakwenda embere siwe. Nabo mobahongoka, mobingira omo mũyĩ wʼAbanya Samarĩa, erĩkokotya aho angahĩkĩra.

⁵³Nĩkwa abandu bayo mobatamũkokya kusangwa ĩnĩabĩrĩhĩra omutima wuwe eriya eYerũsalema.

⁵⁴Neryo omugulu abiga buwe, ye Yakobo na Yoane balangira omwatsi oyũ, mobabũga bati, Mukama, wanzĩre itwabirikira omuliro alũe elubula nʼeribugabo kwehĩ?

⁵⁵Nĩkwa Yesu mwakeberabo, mwakungabo ati, Sĩmwasĩ omũsĩndo wʼekĩrĩmũ muliko.

⁵⁶Kusangwa Omugala wʼOmundu mwatasa erĩherya esyongebe syʼabandu, nĩkwa busana nʼerĩlamyasyo. Neryo mobaya oko gundi mũyĩ.

⁵⁷Neryo babere banemugenda omo nzira, omundu muguma mwabwira Yesu ati, Ngandikukwama ehosĩ ukandiya.

⁵⁸Yesu mwamubwira ati, Esyoboha sinawite ebyũna, nʼesyonyonyũ syʼomo kyanya esyonyutu; nĩkwa Omugala wʼOmundu siawite aho angagotserya omutwe wuwe.

⁵⁹Neryo Yesu mwabwira ogundi mundu ati, Unyikwame; nĩkwa mwabũga ati, Mukama, uleke nyĩtsũke eriyata tata wage.

⁶⁰Nĩkwa Yesu mwamubwira ati, Uleke abaholĩ bate abaholĩ babo. Nĩkwa uwe ugende ehosĩ ũtũle omwatsi wʼobwami bwa Nyamuhanga.

⁶¹Ogundi mundu mwabũga ati, Mukama, ngandisyakukwama, nĩkwa uleke ngayalagana nʼabʼewetu.

⁶²Yesu mwamubwira ati, Sihali oyukawata okwʼĩsũka neryo akakebera enyũma, akatolera obwami bwa Nyamuhanga.