Read nande Eryibuka Ebihano 1 Bible Online

Eryibuka Ebihano 1 - nande bible

Eryibuka Ebihano 1

¹Ebĩ byo bĩnywa ebyo Musa abũga nʼAbaĩsraelĩ bosĩ eyisirya wʼeYorodanĩ omo mbwarara, omo Araba owalolĩre eSũfũ, omo katĩkatĩ kʼeParanĩ, nʼeTofelĩ, nʼeLabanĩ, nʼeHazerotĩ, nʼeDĩzahabũ.

²Ni lugendo lwʼebiro ĩkũmĩ na kiguma erĩlũa eHorebũ omo nzira yʼekitwa kyʼeSeĩrĩ erĩhĩka eKadesĩ-Barnea.

³Kandi omo mwaka wʼamakũmĩ ani, omo mukera wʼerĩkũmĩ nʼomuguma, nʼoko kiro kyʼerĩtsũka omukera, Musa mwabũga nʼabana ba Ĩsraelĩ ebyosĩ ebyo Mwami Mukulu amuha erihanabo;

⁴enyũma wʼerĩswĩrya Sĩhonĩ, omwami wʼAbaamorĩ, oyo wabya wĩkere eHesĩbonĩ, na Ogĩ omwami wʼeBasanĩ, oyo wabya wĩkere eAstarotĩ, eEdĩreĩ.

⁵Eyisirya wʼeYorodanĩ, omo kihugo kyʼeMoabũ, Musa mwatsũka erĩtũla ekihano ekĩ ati,

⁶Omwami Mukulu Nyamuhanga wetu mwabũga netu eHorebũ, ati, Mwamĩkala oko kitwa ekĩ ko bingaho.

⁷Mũbũnũkale, muhongoke, mugende oko kihugo kyʼebitwa ebyʼAbaamorĩ, na hakũhĩ nʼaho, omo Araba, omo kihugo kyʼebitwa, nʼomo bwerere, nʼelutambi lwʼeyĩkwa, nʼoko mũsike wʼengetsi, ekihugo kyʼAbanya Kanana, nʼeLebanonĩ, erĩhĩka oko lũsĩ lunene, olũsĩ lwʼeFũratĩ.

⁸Mũlebaye, nabĩrĩhĩra ekihugo embere syenyũ; muyemo mwĩmaye ekihugo ekyo Mwami Mukulu alahĩrĩraya abotata wenyũ, Abrahamũ, na Ĩsaka, na Yakobo eriha kyobo nʼoko bana babo enyũma kubo.

⁹Kandi monabwirabo oko mugulu oyo, nyiti, Sinangatoka eribaheka ĩngyowene,

¹⁰Omwami Mukulu Nyamuhanga wenyũ abĩrĩbakanyĩrĩrya, neryo mũlebaye, mũnabwĩre muli bangana nʼesyongũnũnũ syʼekyanya omo nzige.

¹¹Omwami Mukulu, Nyamuhanga wʼabotata wenyũ, abakanyĩrĩraye engendo elfu kwilaba ko muli, nʼeribatsumula, ngoko abiribalaga!

¹²Nangatoka nyiti eriheka obũlĩtohe bwenyũ, nʼemiheke yenyũ, nʼamalwa wenyũ kwehĩ?

¹³Muyisoge abandu bʼamenge nʼeriminya, ababirikola omũbĩrĩ, oko bihanda byenyũ, nage nasyahĩrabo mo bakulu benyũ.

¹⁴Nenyũ momwanyĩsũbĩrya muti, Omwatsi ogo wabĩrĩbũga owene erikolago.

¹⁵Neryo monĩmya abakulu bʼebihanda byenyũ, abandu bʼamenge, ababirikola omũbĩrĩ, monahĩrabo mo bakulu benyũ, abasondolĩ bʼamaelfu, nʼabasondolĩ bʼamagana, nʼabasondolĩ bʼamakũmĩ atanu, nʼabasondolĩ bʼerĩkũmĩ, nʼabakulu oko bihanda byenyũ ko biri.

¹⁶Neryo monahana abatswerĩ benyũ oko mugulu oyo, nyiti, Mowe emyatsi omo katĩkatĩ kʼabagala benyũ, mutswere eritunganene omo katĩkatĩ kʼomundu nʼomugala wabo, kutse owʼehandi, oyuli naye.

¹⁷Isimwasombola bandu omwʼitswera; mwasyowa abake-bake nʼabakulu-bakulu omo lulengo luguma; simubahe ameso wʼabandu; kusangwa eritswera ni rya Nyamuhanga; nʼomwatsi owakalĩre kwĩnywe mwasyandeterago, mowago.

¹⁸Nʼoko mugulu oyo monabahana emyatsi yosĩ eyo mwangakola.

¹⁹Neryo motwahongoka erĩlũa eHorebũ, motwalaba omo mbwarara yosĩ eyo eyĩkalĩre eyo mwalangira, omo nzira ikagendera omo kihugo kyʼebitwa kyʼAbaamorĩ, ngoko Mwami Mukulu Nyamuhanga wetu atuhana; neryo motwahĩka eKadesĩ-Barnea.

²⁰Kandi monabũga nenyũ nyiti, Mwamahĩka oko kihugo kyʼebitwa kyʼAbaamorĩ, ekyo Mwami Mukulu Nyamuhanga wetu akatuha.

²¹Lebaya, Omwami Mukulu Nyamuhanga wenyũ abĩrĩhĩra ekihugo embere syenyũ; muhetuke, mwĩmayekyo, ngoko Mwami Mukulu, Nyamuhanga wʼaboso-kulu wenyũ, abĩrĩbũga nenyũ. Simubahe, kutse sĩmũhahũkaye emitima.

²²Nenyũ momwambĩkako hakũhĩ obuli muguma wa kwĩnywe, muti, Tutume abandu bʼembere syetu, bayalinge ekihugo busana netu, batuletere engulu yʼenzira eyitutolere erihetukamo, nʼemĩyĩ eyo twasyahĩkamo.

²³Nʼomwatsi oyo mwanyĩtsemesya ndeke; neryo monahamba abandu ĩkũmĩ nʼababiri; busana nʼobuli kihanda, mundu muguma.

²⁴Neryo mobaswabũnũkala mobahetuka omo kihugo kyʼebitwa, mobahĩka oko musya wʼeEskolĩ, mobalingakyo.

²⁵Kandi mobĩmya oko bĩgũma byʼekihugo ekyo omo byala byabo, mobatuleterabyo, kandi mobatuletera engulu, bati, Ni kihugo kyowene ekyo Mwami Mukulu Nyamuhanga wetu akasonda erituha.

²⁶Nĩkwa momũtaliga erihetukirayo, nĩkwa momwapona erihana lyʼOmwami Mukulu Nyamuhanga wenyũ.

²⁷Kandi momwamũsĩnĩngũlĩra omo mahema wenyũ, muti, Kusangwa Omwami Mukulu mwatũkwa obusu, abĩrĩtũlũsya omo kihugo kyʼeMĩsĩrĩ, erituhotera omo byala byʼAbaamorĩ, erĩtũherya.

²⁸Twasyahetukira hahi kwehĩ? Abagala betu babĩrĩhahũkya emitima yetu, bati, Abandu ni bangi, ni bali-bali kwĩtwe; emĩyĩ ni minene-minene, kandi ĩkangatĩre erĩhĩka omo kyanya; kandi twabirilola yʼoko bagala ba Anakĩ eyo.

²⁹Neryo monababwira nyiti, Simubahe, sĩmũkwebo buba.

³⁰Omwami Mukulu Nyamuhanga wenyũ oyukagenda embere syenyũ, asyabalwira ngʼebyosĩ ebyo abakolera omo meso wenyũ eMĩsĩrĩ,

³¹Nʼomo mbwarara, eyo mwalangirira ngoko Mwami Mukulu abaheka, ngoko mundu akaheka mugala wuwe, omo nzira yosĩ mwasiramo erĩhĩka hano.

³²Nĩkwa omo mwatsi oyo momũtĩkĩrĩrya Omwami Mukulu Nyamuhanga wenyũ,

³³oyo wababera embere omo nzira, eribasondera omwanya wʼerihanda amahema wenyũ. Omo kiro iniakabasondola omo muliro, nʼomo musibo iniakabasondola omo kĩtũ nʼerĩbakangya enzira eyo mwangalabamo.

³⁴Neryo Omwami Mukulu mwowa omulenge wʼebĩnywa byenyũ, neryo mwahitana, mwalahĩrya, ati,

³⁵Kwenene sihali nʼomuguma gʼoko bandu aba bʼolulengo lubi olũ oyo wasyalangira ekihugo kyowene, ekyo nalahĩrĩraya erihakyo abotata wenyũ,

³⁶nina Kalebũ mugala wa Yefũne; iye asyalangirakyo; kandi nasyamuha ekihugo ekyo abĩrĩhĩrako ekisando kiwe, nʼoko bana buwe, kusangwa abirikwamirira ndeke Omwami Mukulu.

³⁷Kandi Omwami Mukulu mwanyihitanako busana nenyũ, ati, Nawe siwendisyingirayo.

³⁸Yosũa mugala wa Nũnĩ, oyo wimene embere syawe asyingirayo; ũmũhamĩraye; kusangwa asyaleka Ĩsraelĩ inialyakyo mo mwandu.

³⁹Kandi abana benyũ, abo mwahula muti, Basyabya banyegwa, nʼabana benyũ, abatawite menge mũnabwĩre eriminya ekibuya kutse ekibi, basyingirayo, bo ngasyahakyo, nabo basyasĩgalyakyo.

⁴⁰Nĩkwa Ĩnywe, mũbũnũkale, muhongoke omo mbwarara omo nzira yʼEngetsi yʼEngula.

⁴¹Neryo momwanyĩsũbĩrya muti, Twabirikola nabi oko Mwami Mukulu, tukandihetuka eriyalwa, ngʼebyosĩ ebyo Mwami Mukulu Nyamuhanga abiritulayira. Nenyũ momwayisengera obuli mundu ebindu byʼamalwa biwe, imukanguha erihetukira oko kihugo kyʼebitwa.

⁴²Neryo Omwami Mukulu mwabũga nage ati, Ubwirebo uti, Simuhetuke, kutse eriyalwa; kusangwa Sindi omo katĩkatĩ kenyũ; mũkasyakĩndwa embere wʼesyonzĩgũ syenyũ.

⁴³Ko nababwira nyitya, nenyũ momutahulikirira; nĩkwa momwapona erihana lyʼOmwami Mukulu, momwayikuna, momwahetukira oko kihugo kyʼebitwa.

⁴⁴Neryo Abaamorĩ, ababya bĩkere omo kihugo kyʼebitwa, mobabatanga-tanganĩa, nʼeribahiga, ngʼesyonzuki ko sikarara, nʼerĩbahĩnola eSeĩrĩ erĩhĩka eHorma.

⁴⁵Nenyũ momwasubula nʼeririra embere syʼOmwami Mukulu; nĩkwa Omwami Mukulu mwatahulikirira omulenge wenyũ, kutse eribategera amatwĩ.

⁴⁶Busana nʼekyo momwĩkala eKadesĩ ebiro bingi, ngʼebiro ebyo mwĩkalayo.