Read nande Eryibuka Ebihano 11 Bible Online

Eryibuka Ebihano 11 - nande bible

Eryibuka Ebihano 11

¹Neryo wasyanza Omwami Mukulu Nyamuhanga wawe nʼerĩteya emilage yiwe, nʼemigambo yiwe, nʼebilayiro biwe, nʼebihano biwe emigulu yosĩ.

²Kandi muminye ekĩ kyo mũnabwĩre; kusangwa sĩndĩbũga nʼabana benyũ abatabya basĩ, nʼabate balangira erikunga lyʼOmwami Mukulu Nyamuhanga wenyũ, obukulu buwe, nʼebyala biwe, byʼamaka, nʼokuboko kuwe kũyĩsũmbĩre,

³nʼebĩmĩnyĩsyo biwe, nʼemĩbirĩ yiwe, eyo akolera Farao omwami wʼeMĩsĩrĩ, nʼekihugo kiwe kyosĩ omo katĩkatĩ kʼeMĩsĩrĩ;

⁴kandi nʼekyo akola oko milondo yʼeMĩsĩrĩ, oko syosabayĩrĩ, nʼoko syogalĩ syabo; ngoko alengaya kubo Engetsi yʼEngula omugulu babakwamirira, kandi Omwami Mukulu mwaheryabo ndeke.

⁵Kandi ebyo abakolera omo mbwarara, erĩhĩka aho mwahĩkĩra hano;

⁶nʼebyo akolera Datanĩ na Abĩramũ, abagala ba Elĩabũ, mugala wa Rũbenĩ; ngoko kitaka mokyatandukala nʼerimerabo, nʼebĩtũnga byabo, nʼamahema wabo, nʼobuli kindu kiriho ekyakwamabo, omo katĩkatĩ kʼAbaĩsraelĩ bosĩ.

⁷Nĩkwa ameso wenyũ abirilangira omũbĩrĩ munene gosĩ wʼOmwami Mukulu ogo akola.

⁸Busana nʼekyo mwasyateya obuli kihano ekyo ngabahana mũnabwĩre, imwabana, eribya nʼamaka, nʼeriingira nʼerĩsĩgalya ekihugo ekyo, eyo mukasokera erĩsĩgalyakyo;

⁹kandi imwatoka erĩkanyĩrĩrya ebiro byenyũ omo kihugo ekyo Mwami Mukulu alahĩrĩraya abotata-kulu wenyũ erihabo nʼabana babo, ekihugo ekyoswĩre mwʼamasabũ nʼobuki.

¹⁰Kusangwa ekihugo ekyo mukingiramo erĩsĩgalyakyo, sikiri ngʼekihugo kyʼeMĩsĩrĩ, eyo mwalũa, eyo mwabiba esyombuto syenyũ, nʼerĩheheryasyo omo bisando byenyũ, ngʼeririma lyʼesyonyenyĩ.

¹¹Nĩkwa ekihugo kyʼeyo mukasokera erĩsĩgalyakyo, ni kihugo kyʼebitwa nʼemisya, kĩkapũlaya amagetsi wʼembũla yʼobũtũkũ,

¹²ni kihugo ekyo Mwami Mukulu Nyamuhanga wenyũ akahĩra kʼomutima; ameso wʼOmwami Mukulu ali kukyo emigulu yosĩ, okwʼĩtsũka lyʼomwaka erĩhĩka okwʼihwa lyago.

¹³Neryo mwasyabya mwamahulikirira ebihano byage nʼomũhwa ebyo ngabahana mũnabwĩre, erianza Omwami Mukulu Nyamuhanga wenyũ, nʼerimukolera nʼomutima wenyũ gosĩ nʼekĩrĩmũ kyenyũ kyosĩ,

¹⁴nasyĩna embũla busana nʼekihugo kyenyũ oko kirimo kyayo, embũla yʼembere, nʼembũla yʼenyũma, imwatoka erigesa amagese wenyũ, nʼebĩnyũ byenyũ bihya-bihya, nʼamagũta wenyũ.

¹⁵Kandi ngandisyaha ebiti mo bũlĩsĩryo bwenyũ busana nʼebihangulo byenyũ, neryo mwasyalya ĩmũgũta.

¹⁶Mũyĩlebaye, emitima yenyũ ĩkasyatebĩbwa, ĩmwabũnũkala, mukakolera esindi nyamuhanga, nʼerĩramyasyo.

¹⁷Nʼerihitana lyʼOmwami Mukulu iryaka kwĩnywe, akalĩba amatũkũ, ihatawa mbũla, nʼekitaka ĩkĩterya emyaka yakyo; imwahwa lũba omo kihugo ekyo kibuya ekyo Mwami Mukulu akabaha.

¹⁸Neryo mwasyabika ebĩnywa byage ebĩ omo mitima yenyũ nʼomo kĩrĩmũ kyenyũ; kandi mwasyabohabyo oko byala byenyũ bibye bĩmĩnyĩsyo, kandi byasyabya bitambara byʼebĩmĩnyĩsyo omo katĩkatĩ kʼembũmo yenyũ.

¹⁹Kandi mwasyĩyĩsyabyo abana benyũ, nʼerigambulira byobo omugulu wĩkere omo nyũmba yawe, nʼomugulu ukagendera omo nzira, nʼomugulu ukagotsera, nʼomugulu ukabuka.

²⁰Kandi wasyasakabyo oko nzeguliro syʼenyũmba yawe, nʼoko syongyo syenyũ;

²¹neryo ebiro byenyũ ibyabana erĩkanyĩbwa, nʼebiro byʼabana benyũ, omo kihugo ekyo Mwami Mukulu alahĩrĩraya abotata-kulu wenyũ eriha kyobo, omugulu amatũkũ akine endata oko kihugo.

²²Kusangwa mwamateya nʼomũhwa ebihano byosĩ ebĩ ebyo ngabahana, erikolabyo, erianza Omwami Mukulu Nyamuhanga wenyũ, erirendera omo nzira siwe syosĩ, nʼerimakirirana naye;

²³neryo Omwami Mukulu asyahiga ebihanda byosĩ ebĩ embere syenyũ, nenyũ mwasyasingula ebihanda bikulu-bikulu nʼebĩbalengĩrye amaka.

²⁴Obuli mwanya ogo bulyatiro bwʼekisando kyenyũ bwasyalyatako asyabya wenyũ; erĩtsũka oko mbwarara, nʼeLebanonĩ, erĩtsũka nʼoko lũsĩ, olũsĩ lwʼeEfũratĩ, erĩhĩka oko ngetsi yʼenyũma yasyabya mutano wenyũ.

²⁵Sihendisyabya mundu oyo wasyatoka erihangana embere syenyũ; Omwami Mukulu Nyamuhanga wenyũ asyahĩra obuba bwenyũ nʼolubahwa lwenyũ oko kihugo kyosĩ mwasyalyatangako ngoko abĩrĩbũga nenyũ.

²⁶Mũlebaye, ngahĩra embere syenyũ mũnabwĩre omũyĩsa nʼobutakire;

²⁷omũyĩsa mwamahulikirira oko bihano byʼOmwami Mukulu Nyamuhanga wenyũ, ebyo ngabahana mũnabwĩre;

²⁸nʼobutakire, mwamatindahulikirira ebihano byʼOmwami Mukulu Nyamuhanga wenyũ, nĩkwa mukakita omo nzira eyo ngabahana mũnabwĩre, eriyakwama esindi nyamuhanga esyo mutabya mwasĩ.

²⁹Neryo omugulu Omwami Mukulu Nyamuhanga wenyũ asyabaleta omo kihugo ekyo mũkayasĩgalaya, mwasyahĩra eritsumula oko kitwa kyʼeGerĩzĩmũ, nʼobutakire oko kitwa kyʼeEbalĩ.

³⁰Sibiri eyisirya wʼeYorodanĩ, eyĩkwa oko nzira wʼeyo eryuba likalengera, omo kihugo kyʼAbanya Kanana abĩkere eAraba, eyisirya wʼeGĩlgalĩ, hakũhĩ nʼemiti yʼemĩalonĩ yʼeMore kwehĩ?

³¹Kusangwa mukasonda erisoka eYorodanĩ, eriingira erĩsĩgalya ekihugo ekyo Mwami Mukulu Nyamuhanga wenyũ akabaha, neryo mwasyasĩgalyakyo, nʼerĩĩkala mukyo.

³²Kandi mũyĩtegereraye erikola emigambo yosĩ nʼeritswera lyosĩ eryo ngahĩra embere syenyũ mũnabwĩre.