Read nande Eryibuka Ebihano 12 Bible Online

Eryibuka Ebihano 12 - nande bible

Eryibuka Ebihano 12

¹Eyĩ yo migambo nʼeritswera ebyo mwasyayĩtegererya erikola omo kihugo ekyo Mwami Mukulu, Nyamuhanga wʼabotata-kulu wenyũ abiribaha erĩsĩgalyakyo ebiro byosĩ ebyo mwasyakotera omo kihugo.

²Kwenene mwasyaherya ehosĩ aho ebihanda ebyo mwasyasingula bakolera esyonyamuhanga syabo, oko bitwa biri-biri, nʼoko hitwa, nʼomo ndĩna yʼobuli muti mubisi.

³Kandi mwasyasambula ebiherero byabo, mukunungule esyondũyĩ syabo, mũhĩsĩrĩraye esyosanamu sya Asera syabo syʼomo muliro; mukondere ahisi esyosanamu esĩbatsĩre, esyonyamuhanga syabo; kandi mwasyaherya erĩna lyasyo aho.

⁴Simusyekolera Omwami Mukulu Nyamuhanga wenyũ yo mutya.

⁵Nĩkwa aho Mwami Mukulu Nyamuhanga wenyũ asyayisoga omo katĩkatĩ kʼebihanda byenyũ byosĩ, erĩhĩra erĩna liwe ryoho, aho mwasyasa embere siwe.

⁶Nʼaho ho mwasyaletera amahere wenyũ wʼerĩokererya, nʼamahongo wenyũ, nʼekiguma kyʼomwʼĩkũmĩ kyenyũ, nʼobuhere bwʼerisumba bwʼebyala byenyũ, nʼemisago yenyũ, nʼamahere wenyũ wʼeritswa, nʼehimbere hyʼesyonde syenyũ, nʼehimbere hyʼesyombũlĩ syenyũ.

⁷Nʼaho ho mwasyalira embere syʼOmwami Mukulu Nyamuhanga wenyũ, kandi mwasyatsemera ebyosĩ mukakola omo byala byenyũ, Ĩnywe nʼebĩtũnga byenyũ, omo ebyo Mwami Mukulu abiribatsumulira.

⁸Simwendisyakola ebiri ngʼemyatsi eyo tukakola hano mũnabwĩre, obuli mundu ebĩkowana omo meso wuwe;

⁹kusangwa simulimwahĩka omwʼiluhuka nʼomo mwandu ogo Mwami Mukulu Nyamuhanga wenyũ akabaha.

¹⁰Nĩkwa omugulu mwasyasoka eYorodanĩ, nʼerĩĩkala omo kihugo ekyo Mwami Mukulu Nyamuhanga wenyũ akabawataya mo mwandu, naye akabaha erihumula oko syonzĩgũ syenyũ syosĩ esĩbatĩmbĩreko, imwabana erĩĩkala buholo.

¹¹Neryo aho Mwami Mukulu Nyamuhanga wenyu asyayisoga erĩĩkalya erĩna liwe, aho ho mwasyaleta ebyosĩ ngabahana; amahere wenyũ wʼerĩokererya, nʼamahongo wenyũ, nʼekiguma kyʼomwʼĩkũmĩ kyenyũ, nʼobuhere bwʼerisumba bwʼebyala byenyũ, nʼemisigo yenyũ eyisombwere eyo mwasyalahĩrya busana nʼOmwami Mukulu.

¹²Kandi mwasyatsema embere syʼOmwami Mukulu Nyamuhanga wenyũ, ĩnywe, nʼabagala benyũ nʼabali benyũ, nʼabagombe benyũ bʼobulume, nʼabagombe benyũ bʼobũkalĩ, nʼOmũlawĩ oyuli omo syongyo syenyũ, kusangwa siawite erĩgabo kutse omwandu haguma nenyũ.

¹³Mũyĩtegaye Simusyeherera amahere wenyũ wʼeriokererya ehosĩ-hosĩ ukalangira;

¹⁴nĩkwa aho Mwami Mukulu asyayisoga omo kihanda kiguma oko bihanda byenyũ, aho mukandisyaherera amahere wenyũ wʼerĩokererya, nʼaho ho mwasyakolera ebyosĩ ngabahana.

¹⁵Nĩkwa, mwanganasĩnza nʼerirya esĩswĩ omo syongyo syenyũ, ngʼerisonda lyʼomutima wenyũ gosĩ ngʼeritsumula lyʼOmwami Mukulu Nyamuhanga wenyũ eryo abiribaha; abatsandĩrya nʼaberĩre bangalya kusyo, ngʼesyosaswĩ, nʼesyosama.

¹⁶Nĩkwa Simusyerya omusasi; mwasyũtago oko kitaka ngʼamagetsi.

¹⁷Simusyelira omo syongyo syenyũ mwʼekiguma kyʼerĩkũmĩ kyʼengano yenyũ, kutse kyʼebĩnyũ bihya-bihya byenyũ, kutse amagũta wenyũ, kutse ehimbere hyʼebihangulo byenyũ kutse ehyʼekĩhyo kyenyũ, kutse omusigo nʼomuguma wenyũ ogo mũkalahĩraya kutse amahere wenyũ wʼeriyitswa, kutse obuhere bwʼerisumba bwʼebyala byenyũ;

¹⁸nĩkwa mwasyalirabyo embere syʼOmwami Mukulu Nyamuhanga wenyũ aho Mwami Mukulu Nyamuhanga wenyũ asyayisoga, uwe na mugala wawe, na mwali wawe, nʼomugombe wawe wʼobulume, nʼomugombe wawe wʼobũkalĩ, nʼOmũlawĩ oyuli omo syongyo syenyũ; kandi mwasyatsema embere syʼOmwami Mukulu Nyamuhanga wenyũ omo byosĩ ebyala byenyũ bikakola.

¹⁹Mũyĩtegaye Sĩmũsĩganaye Omũlawĩ omugulu gosĩ muliho omo kihugo kyenyũ.

²⁰Omugulu Omwami Mukulu Nyamuhanga wenyũ asyatomeka oko mutano wenyũ ngoko abiribalaga, nenyũ mũkandĩsyabũga, muti, Nangalya esĩswĩ, kusangwa mũkwĩre amerũ; mwasyalya esĩswĩ erĩhĩka okwʼibuga amerũ wenyũ gosĩ.

²¹Aho Mwami Mukulu Nyamuhanga wenyũ asyayisoga erĩhĩra erĩna liwe, hamabya ini hali ũkwʼĩnywe, neryo mwasyĩta oko kihangulo kyawe kyʼesyonde nʼoko kĩhyo kyawe, esyo Mwami Mukulu abiribaha, ngoko nabiribahana; imwabana eririrasyo omo syongyo syenyũ, ngʼamerũ wenyũ kwʼali.

²²Ngoko esaswĩ nʼenombĩ sikalibawa, ko mwasyalya kusyo ko mutya; abatũndĩrya nʼaberĩre bangalya kusyo olulinga luguma.

²³Ekiguma muminye Simusyerya omusasi; kusangwa omusasi ni ngebe; kandi Simusyerya engebe haguma nʼomubiri.

²⁴Simusyeryago; mwasyũtago oko kitaka ngʼamagetsi.

²⁵Simusyeryago; imwatoka erĩũwana, haguma nʼabana benyũ enyũma wenyũ, omugulu mwasyakola ekitunganene omo meso wʼOmwami Mukulu.

²⁶Bye nʼebindu byenyũ bĩbũyĩrĩre ebyo muwite, nʼemisigo yenyũ, mwasyĩmyabyo imwaya aho Mwami Mukulu asyayisoga.

²⁷Kandi mwasyahonga amahere wenyũ wʼerĩokererya, esĩswĩ nʼomusasi, oko kiherero kyʼOmwami Mukulu Nyamuhanga wenyũ; nʼomusasi wʼamahere wenyũ asyũtũlĩrwa oko kiherero kyʼOmwami Mukulu Nyamuhanga wenyũ; nenyũ mwasyalya esĩswĩ esyo.

²⁸Mũyĩtegereraye erĩowa ebĩnywa byosĩ ebĩ; ngabahana imwatoka erĩũwana eribana obutseme, haguma nʼabana benyũ enyũma wenyũ kera na kera, omugulu mukakola ekiri kibuya nʼekitunganene omo meso wʼOmwami Mukulu Nyamuhanga.

²⁹Omugulu Omwami Mukulu Nyamuhanga wenyũ asyahũmbũla ebihanda embere syawe, eyo ukingira nʼerisingulabyo, nenyũ mukasingulabyo, nʼerĩĩkala omo kihugo kyabyo;

³⁰mũyĩtegaye simutegawe omwʼikwamabyo, bamabĩherĩbwa embere syenyũ; kandi ĩmũtabũlĩrĩrya esyonyamuhanga syabo, muti, Ebihanda ebĩ bikakolera esyonyamuhanga syabyo byo siti kwehĩ? Nage inatoka erikolerasyo nyitya.

³¹Simusyekolera Omwami Mukulu Nyamuhanga wawe yo mutya; kusangwa obuli nye Omwami Mukulu akagalirawa kuyo, ko babirikolera esyonyamuhanga syabo syo batya; kusangwa bakahĩsĩrĩraya omo muliro abagala abo babuta nʼabali babo babuta oko syonyamuhanga syabo.

³²Ekĩndũkĩ ngabahana, mwasyayĩtegererya erikolakyo; simusyetomeka kukyo kutse erĩkehya kukyo.