Read nande Eryibuka Ebihano 14 Bible Online

Eryibuka Ebihano 14 - nande bible

Eryibuka Ebihano 14

¹Ĩnywe muli bana bʼOmwami Mukulu Nyamuhanga wenyũ; simusyeyisaka, kutse erĩsĩswa engũbũ omo katĩkatĩ kʼameso wenyũ busana nʼabaholĩ.

²Kusangwa muli kihanda kĩbũyĩrĩre busana nʼOmwami Mukulu Nyamuhanga wenyũ, kandi Omwami Mukulu abiriyisoga nywe eribya kihanda busana naye ĩyowene-wene, omo bihanda byosĩ ebiri muna-kihugo.

³Simusyerya ekindu nʼekiguma kyʼesyonye.

⁴Esĩ sye syonyama mwangalyako: ende, nʼembũlĩ, nʼembene-hene,

⁵nʼenombĩ, nʼesaswĩ, nʼekongonĩ, nʼembene yʼomolĩ, nʼenzuku, nʼesama, nʼembene yʼomo bitwa.

⁶Nʼobuli nyama eyĩgabĩre ekigere, eyiwite ekigere ekĩtũlĩre mo bibiri, eyĩkasũbũlaya, omo katĩkatĩ kʼesyonyama esyo syo mwangalya.

⁷Nĩkwa esĩ simwangalya kusyo, esĩkasũbũlaya nʼesĩtũlĩre ekigere: engamia, esungura yʼomolĩ, nʼemberere, kusangwa sĩkasũbũlaya nĩkwa ĩsĩsĩtũlĩre kigere, nĩ nyĩtsandĩrya busana nenyũ.

⁸Nʼengulube, kusangwa itũlĩre ekigere nĩkwa sĩrĩsũbũlaya, iyo nĩ nyĩtsandĩrya busana nenyũ; Simusyerya esĩswĩ syayo, kandi sĩmũsyetũla oko bĩnda byasyo.

⁹Esĩ syo mwangalyako oko syosĩ esiri omo magetsi; ekindu ekiwite ehikibi nʼebikora kyo mwangalyako;

¹⁰nʼesyosĩ esitawite ehikibi nʼebikora simusyeryasyo; nĩ nyĩtsandĩrya kwĩmwe.

¹¹Mwanganalya oko syonyonyũ syosĩ esyerĩre.

¹²Nĩkwa esyo mute mwangalya syesĩ: erĩsamba, erĩsamba-pũngũ, nʼefurakombe,

¹³nʼekĩngewa, nʼemwewe, nʼekihungu omo mĩsĩndo yakyo,

¹⁴nʼobuli kikororo omo mĩsĩndo wabyo,

¹⁵nʼembũnĩ, nʼekisara kyʼekiro, nʼedũdũmĩzĩ, nʼebisara omo mĩsĩndo yabyo,

¹⁶nʼekĩbũkũlũ kike, nʼekĩbũkũlũ kinene, nʼenyarũtũtũ,

¹⁷nʼekisohe, nʼekihungu, nʼekĩnyawarandwe,

¹⁸nʼekorongo, nʼemongo omo mĩsĩndo yasyo, nʼehũdĩhũdĩ, nʼomulima-lima.

¹⁹Nʼebindu byosĩ byʼebĩpũpa ebikakululuka nĩ bĩtsandĩrya busana nenyũ; sibisyeribawa.

²⁰Mwanganalya oko syonyonyũ syosĩ syerĩre.

²¹Simusyerya ekindu ekiryayiholera; mwanganahakyo oko mubunga oyuli omo butala bwenyũ, inialyakyo; kutse mwanganagũlyakyo oko wʼehandi; kusangwa muli kihanda kĩbũyĩrĩre busana nʼOmwami Mukulu Nyamuhanga wenyũ. Sĩmũsyehũka ekyana kyʼembene omo masabũ wa nyĩnya wakyo.

²²Mwasyabana ekiguma kyʼomwʼĩkũmĩ oko byosĩ omwʼikanya lyʼesyombuto syenyũ esĩkalũa omwʼirima lyenyũ oko mwaka nʼoko mwaka.

²³Kandi mwasyalya embere syʼOmwami Mukulu Nyamuhanga wenyũ, aho asyayisoga, erĩhanganĩa erĩna liwe ekiguma kyʼomwʼĩkũmĩ kyʼomo ngano yenyũ, nʼebĩnyũ byenyũ bihya-bihya, nʼamagũta wenyũ nʼehimbere hyʼekihangulo kyenyũ nʼekĩhyo kyenyũ; imwatoka eriiga eriubaha Omwami Mukulu Nyamuhanga wenyũ ebiro byosĩ.

²⁴Kandi enzira yamabya nyiri ũkwʼĩnywe, isimulitoka erĩhĩkayo, kusangwa ni hali ũkwʼĩnywe, aho Mwami Mukulu asyayisoga, erĩhĩraho erĩna liwe, omugulu Omwami Mukulu Nyamuhanga wenyũ asyabatsumula;

²⁵neryo mwasyahĩnganĩakyo mo franka, nʼerĩkũndĩkabyo oko byala byenyũ, neryo mwasyaya aho Mwami Mukulu Nyamuhanga wenyũ asyayisoga.

²⁶Neryo mwasyahĩra esyofranka esyo ukwʼebyo mutima wenyũ akasonda, busana nʼesyonde, kutse esyombũlĩ, kutse busana nʼebĩnyũ, kutse busana nʼobũhĩre, kutse busana nʼekĩndũkĩ ekyo mutima wenyũ akabasondera; neryo mwasyalirabyo aho embere syʼOmwami Mukulu Nyamuhanga wenyũ kandi mwasyatsema, uwe nʼekĩtũnga kyawe.

²⁷NʼOmũlawĩ oyuli omo butala bwenyũ, sĩmũsyemũsĩga; kusangwa siawite erĩgabo kutse mwandu haguma nenyũ.

²⁸Oko ndũlĩ yʼobuli myaka ĩsatu mwasyaleta ekiguma kyʼomwʼĩkũmĩ oko bindu byenyũ oko mwaka oyo, mwasyabikabyo omo butala bwenyũ.

²⁹NʼOmũlawĩ, kusangwa siawite erĩgabo kutse mwandu haguma nenyũ, nʼowʼehandi, nʼengũbĩ, nʼomũkwakalĩ, abali omo butala bwenyũ, basyasa, basyalya, basyũgũta; Omwami Mukulu Nyamuhanga wenyũ atoke eribatsumula omo mũbĩrĩ gosĩ wʼebyala byenyũ ogo mukakola.