Read nande Eryibuka Ebihano 16 Bible Online

Eryibuka Ebihano 16 - nande bible

Eryibuka Ebihano 16

¹Mũtegaye omukera wa Abĩbũ, mukunate Erikiruka oko Mwami Mukulu Nyamuhanga wenyũ; kusangwa oko mukera wa Abĩbũ, Omwami Mukulu Nyamuhanga wenyũ mwabalũsya omo Mĩsĩrĩ omo kiro.

²Kandi muhongere Erikiruka oko Mwami Mukulu Nyamuhanga wenyũ esyʼekĩhyo nʼoko kihangulo aho Mwami Mukulu asyayisoga erĩĩkalyaho erĩna liwe.

³Simusyerya obundu obuli mwʼekĩhamya haguma nalyo; mwasyalya obundu obute mo kĩhamya ebiro birinda, wa nʼamandu wʼamalĩge; kusangwa mwalũa omo kihugo kyʼeMĩsĩrĩ mo lũba; imwatoka eryibuka ekiro mwalũa omo kihugo kyʼeMĩsĩrĩ ebiro byosĩ byʼobuyingo bwenyũ.

⁴Kandi sihasyebanika ũkwʼĩnywe ekĩhamya omo mitano yenyũ yosĩ oko biro birinda; kutse esĩswĩ nʼahake esyo mukahonga ekiro kyʼerĩtsũka omwʼĩgolo, siyisake omo kiro kyosĩ erĩhĩka oko ngyakya.

⁵Simusyehonga Erikiruka omo butala bwenyũ obo Mwami Mukulu Nyamuhanga wenyũ akabaha;

⁶nĩkwa ha nʼaho Mwami Mukulu Nyamuhanga wenyũ asyayisoga, erĩĩkalyaho erĩna liwe, aho ho mwasyahongera Erikiruka omwʼĩgologolo, okwʼirenga lyʼeryuba oko mugulu mwalũa eMĩsĩrĩ.

⁷Mwasyokyalyo nʼeririralyo aho Mwami Mukulu asyayisoga; kandi mwasyasuba omo syohema syenyũ omo ngyakya wʼaho.

⁸Ebiro ndatu mwasyalya amandu awate mo kĩhamya; nʼoko kiro kyʼakalinda kyasyabya erĩhĩndana lĩbũyĩrĩre oko Mwami Mukulu Nyamuhanga wenyũ; Susyekola mukyo mo mũbĩrĩ.

⁹Mwasyayiganzira amayenga alinda; mwasyatsũka eriganza amayenga alinda erĩtsũka omugulu mũkahĩra olubatsi erigesa engano.

¹⁰Kandi mwasyateya Ekiro Kikulu kyʼAmayenga oko Mwami Mukulu Nyamuhanga wenyũ omo buhere bwenyũ bwʼeriyitswa, obo mwasyaha ngoko Mwami Mukulu Nyamuhanga wenyũ abiribatsumula.

¹¹Kandi mwasyatsema embere syʼOmwami Mukulu Nyamuhanga wenyũ, uwe, na mugala wawe, na mwali wawe, nʼomugombe wawe wʼobulume, nʼomugombe wawe wʼobũkalĩ, nʼOmũlawĩ oyuli omo butala bwenyũ, nʼowʼehandi, nʼengũbĩ, nʼomũkwakalĩ, abali omo katĩkatĩ kenyũ, aho Mwami Mukulu asyayisoga, erĩhĩra erĩna liwe ryʼaho.

¹²Kandi mwasyibuka ko mwabya bakobe eMĩsĩrĩ. Kandi wasyakwamirira nʼerikola emigambo eyĩ.

¹³Mwasyateya Ekiro Kikulu kyʼEbitalikirire ebiro birinda, mwabikuma-kuma ebyʼekĩhũmbĩro nʼoko kĩrĩnga kyʼerikamiramo;

¹⁴neryo mwasyatsema omo Kiro Kikulu kyenyũ, uwe, nʼomugala wawe, nʼomwali wawe, nʼomugombe wawe wʼobulume, nʼomugombe wawe wʼobũkalĩ, nʼOmũlawĩ, nʼowʼehandi nʼengũbĩ, nʼomũkwakalĩ, abali omo butala bwenyũ.

¹⁵Mwasyibuka Ekiro Kikulu kyʼOmwami Mukulu Nyamuhanga wenyũ ebiro birinda aho Mwami Mukulu asyayisoga; kusangwa Omwami Mukulu Nyamuhanga wenyũ asyabatsumula omo byosĩ ebyo mũkeraya; nʼomo mũbĩrĩ wenyũ gosĩ wʼebyala byenyũ, nenyũ mwasyatsema ndeke.

¹⁶Engendo ĩsatu oko mwaka, abalume bawe bosĩ basyahuluka embere syʼOmwami Mukulu Nyamuhanga wenyũ aho asyayisoga, omo Kiro Kikulu kyʼobundu bute mwʼekĩhamya, nʼomo Kiro Kikulu kyʼAmayenga, nʼomo Kiro Kikulu kyʼEbitalikirire, kandi sibasyehulukira embere syʼOmwami Mukulu yo byala bisa.

¹⁷Obuli mundu asyaha ngoko angatoka, ngʼeritsumula lyʼOmwami Mukulu Nyamuhanga wenyũ ko liri eryo abiribaha.

¹⁸Mwasyayiyirira abatswerĩ nʼabakulu omo mĩyĩ yenyũ yosĩ eyo Mwami Mukulu Nyamuhanga wenyũ akabaha, ngʼebihanda byenyũ; nabo basyatswera abandu omwʼitswera litunganene.

¹⁹Sĩmũsyehengemaya ekitunganene; sĩmũsyehĩraho ebitaga; kutse sĩmũsyĩmaya ekyũtũlĩro; kusangwa ekyũtũlĩro kĩkalĩba ameso wʼomundu wʼamenge, nʼerĩhabĩsya ebĩnywa byʼabatunganene.

²⁰Mwasyakwama ebitunganene ndeke, imwatoka eribyaho, nʼerĩsĩgalya ekihugo ekyo Mwami Mukulu Nyamuhanga wenyũ akabaha.

²¹Simusyeyiherera omuti wʼomuhanda wahi eribya Asera hakũhĩ nʼekiherero ekyo mwasyayĩhĩmbĩra kyʼOmwami Mukulu Nyamuhanga wenyũ.

²²Kutse simusyeyitsimbira endũyĩ eyo Mwami Mukulu akakwa obusu.