Read nande Eryibuka Ebihano 18 Bible Online

Eryibuka Ebihano 18 - nande bible

Eryibuka Ebihano 18

¹Abahererĩ bʼAbalawĩ, kye kihanda kyosĩ kya Lawĩ, sikyendisyabya nʼerĩgabo kutse omwandu haguma na Ĩsraelĩ; basyalya amahere wʼOmwami Mukulu awakakolawa omo muliro, nʼerĩgabo liwe.

²Kandi sibendisyabya nʼomwandu omo katĩkatĩ kʼabagala babo; Omwami Mukulu ni mwandu wabo, ngoko alagabo.

³Kandi erĩ ryasyabya erĩgabo lyabo lĩkalũa oko bandu, oko bakahera obuhere, yamabya ende kutse embũlĩ, basyaha omũhererĩ yʼekiboko nʼamatema abiri, nʼekĩhũ.

⁴Mwasyamuha Obuyilula bwʼengano nʼobwʼebĩnyũ byenyũ bihya-bihya, nʼobwʼamagũta wenyũ, nʼobuyilula bwʼobweya bwʼesyombũlĩ syenyũ.

⁵Kusangwa Omwami Mukulu Nyamuhanga wenyũ abirimusombola omo bihanda byawe byosĩ, erihangana erikola omo lĩna lyʼOmwami Mukulu, iye nʼabagala buwe kera na kera.

⁶Kandi Omũlawĩ amahũma akalũa omo mũyĩ wawe omo Ĩsraelĩ yosĩ, eyo ĩkere, akahĩka omugulu akakwa omũhwa aho Mwami Mukulu asyayisoga;

⁷neryo asyakola omo lĩna lyʼOmwami Mukulu Nyamuhanga wuwe, ngoko bagala babo bosĩ Abalawĩ bakakola, abakahanganaho embere syʼOmwami Mukulu.

⁸Basyalya amagabo alingirirene awʼerirya, nĩkwa ebikasa omwʼĩgũlya omwandu wʼabĩse wuwe biteko.

⁹Wasyabya wabĩhĩka omo kihugo ekyo Mwami Mukulu Nyamuhanga wawe akabaha, simusyiga erikola ngʼemĩsĩndo yʼebyʼesyonye syʼebihanda ebyo.

¹⁰Simusyebanika ko mundu oyũkalabaya mugala wuwe kutse mwali wuwe omo muliro, nʼoyukakola obulagu, oyũkalagũlĩraya ebĩtũ, kutse omũkũmũ, kutse omũloyĩ,

¹¹kutse omusaki, kutse oyũkakanaya nʼabalĩmũ, nʼomũkũmũ, nʼoyukabirikira abaholĩ.

¹²Kusangwa Omundundi oyukakola emyatsi eyĩ ni nye oko Mwami Mukulu; kandi busana nʼesyonye esĩ, Omwami Mukulu Nyamuhanga wenyũ asyahigabo embere syenyũ.

¹³Mwasyabya butsira lubanza embere syʼOmwami Mukulu, Nyamuhanga wenyũ.

¹⁴Kusangwa ebihanda ebĩ byo mwasyasingula: abakahulikirira abakalagula, nʼabakũmũ; nĩkwa Ĩnywe, Omwami Mukulu Nyamuhanga wenyũ sialitabalĩgĩra erikola mutya.

¹⁵Omwami Mukulu Nyamuhanga wenyũ asyakũhanganĩrya omũmĩnyererĩ omo katĩkatĩ kʼabandu benyũ, oyuli nga ngye; mwasyowa oyo.

¹⁶Ebĩ byo mwabũlaya Omwami Mukulu Nyamuhanga wenyũ eHorebũ oko kiro kyʼerĩhĩndana, muti, Suleke ngowa kandi omulenge wʼOmwami Mukulu Nyamuhanga wage, Suleke ngalangira omuliro munene oyũ kandi, ngasyahola.

¹⁷Neryo Omwami Mukulu mwabũga nage ati, Bamabũga ndeke.

¹⁸Nasyahanganĩryabo omũmĩnyererĩ oyuli nga we omo katĩkatĩ kʼabagala babo; kandi nasyahĩra ebĩnywa byage omo buno buwe, naye asyabwirabo ebyosĩ ngamuhana.

¹⁹Neryo oyutendisyahulikirira ebĩnywa byage ebyo asyabũga omo lĩna lyage, nasyamũtũhũlyabyo.

²⁰Nĩkwa omũmĩnyererĩ, oyo wasyabũga ekĩnywa nʼepono omo lĩna lyage, ekyo ndamuhana erĩbũga, kutse akasyabũga omo lĩna lyʼesindi nyamuhanga, omũmĩnyererĩ oyo asyahola.

²¹Nawe wamabũga omo mutima wawe uti, Twasyaminya ekĩnywa kyʼOmwami Mukulu ekyo atabũga kyo tuti kwehĩ?

²²Omugulu omũmĩnyererĩ akabũga omo lĩna lyʼOmwami Mukulu, omwatsi oyo amatindabererera, kutse erĩhĩka kwenene, ekyo ni kindu ekyo Mwami Mukulu atabũga. Omũmĩnyererĩ oyo abĩrĩbũga nʼepono; Sigumubahe.