Read nande Eryibuka Ebihano 19 Bible Online

Eryibuka Ebihano 19 - nande bible

Eryibuka Ebihano 19

¹Omugulu Omwami Mukulu Nyamuhanga wenyũ asyatĩnda ebihanda ebyo, ekihugo kyabo Omwami Mukulu Nyamuhanga wenyũ ekyo akabaha, nenyũ mũkasĩgalyakyo, nʼerĩĩkala omo mĩyĩ yabo, nʼomo manyũmba wabo;

²mwasyayisombolera emĩyĩ ĩsatu omo katĩkatĩ kʼekihugo kyenyũ, ekyo Mwami Mukulu Nyamuhanga wenyũ akabaha erĩsĩgalyakyo.

³Mwasyayitulira esyonzira nʼerigaba ekihugo kyenyũ, ekyo Mwami Mukulu Nyamuhanga wenyũ akabaha mo nzĩgalya, mo bitswe bisatu, obuli mwĩtĩ wʼomundu atoke erisagirayo.

⁴Oyũ go mwatsi wʼomwĩtĩ wʼomundu oyo wasyasagirayo nʼeribyaho; omugulu omundu akĩta omwĩra wuwe yʼomwʼĩbũlĩkĩra, ĩsĩalĩtamũkwa busu erĩmbere;

⁵ngʼomugulu omundu akaya emũsĩtũ nʼomwĩra wuwe eriyasenya, nʼebyala biwe bikahamba embasa erikonda omuti, nʼembasa ikakuka, ikabanda omwĩra wuwe akahola, iniatoka eritibita oko muguma wʼemĩyĩ eyĩ nʼeribyaho.

⁶Omũkĩsya wʼomusasi isyakwama omwĩtĩ wʼomundu oyo omugulu omutima wuwe akinatabagana nʼerihitana, akamũhĩkako omo nzira, kusangwa enzira ni nyiri, akamũswĩrya erĩmwĩta; isiatolere luholo, kusangwa siabya amũkwĩre obusu oko mugulu wʼerĩmbere.

⁷Kikaleka inabahana nyiti, mwasyayisombolera emĩyĩ ĩsatu.

⁸Kandi Omwami Mukulu amabatomekera ekindi kihugo, ngoko abĩrĩlahĩrĩrya abotata-kulu wenyũ, akabaha ekihugo kyosĩ ekyo alaga eriha abotata-kulu wenyũ;

⁹kandi wamateya ekihano ekyo ngakuhana mũnabwĩre, erikolakyo, erianza Omwami Mukulu Nyamuhanga wenyũ, nʼerigendera omo syonzira siwe ebiro byosĩ; neryo wasyayitomekera emĩyĩ ĩsatu, oko yindi ĩsatu eyĩ.

¹⁰Omusasi owate ko musango syũtawe omo kihugo kyenyũ, ekyo Mwami Mukulu Nyamuhanga wawe akabaha mo mwandu, olubanza lwʼomusasi silubabyeko lutya.

¹¹Nĩkwa Omundundi amakwa mũlĩkyabo yʼobusu, akamũlĩmbya, akamugulukira nʼerĩmũswĩrya akahola, neryo akasagira omo muguma wʼemĩyĩ eyĩ.

¹²Neryo abakulu bʼomũyĩ wuwe basyamutumirako erimwenda eyo, nʼerimuhotera omo byala byʼomũkĩsya wʼomusasi.

¹³Erĩso lyenyũ sirisyemuganyira, nĩkwa mwasyalũsya omusasi owate ko musango oko Baĩsraelĩ, omwatsi wenyũ atoke erĩũwana.

¹⁴Sĩmũsyelũsaya ebiminyikalo byʼemitano ya mũlĩkyenyũ, eyahandawa oko mugulu wa kera, omo mwandu wenyũ ogo mwasyalya, omo kihugo ekyo Mwami Mukulu Nyamuhanga wenyũ akakuha erĩsĩgalyakyo.

¹⁵Omũlangĩrĩ muguma siasyehangana oko mundu erimuhandikirira busana nʼerĩlolo lyahi kutse ebibi byahi, ebyo abĩrĩhalyamo. Okwʼĩtũlago lyʼabalangĩrĩ babiri kutse okwʼĩtũlago lyʼabalangĩrĩ basatu, omwatsi asyaminyikala ko ni kwenene.

¹⁶Omũlangĩrĩ wʼamabehĩ amahangana erihandikirira omundu busana nʼerikola nabi,

¹⁷neryo abandu babiri bosĩ abali oko buhaka obo, basyahangana embere syʼOmwami Mukulu, nʼembere syʼabahererĩ nʼabatswerĩ abasyabyaho ebiro ebyo.

¹⁸Neryo abatswerĩ basyabũlĩrĩrya ndeke, neryo omũlangĩrĩ amabya ini wʼamabehĩ, iniabirihandikirira mugala wabo yʼamabehi,

¹⁹neryo mwasyamukola kwʼaganĩraya erikola mugala wabo. Litya mwasyalũsya ebibi omo katĩkatĩ kenyũ.

²⁰Nʼabakasyasĩgalira basyowa, nʼeriubaha, ibataswasubira erikola ebibi byʼomũsĩndo oyo omo katĩkatĩ kenyũ.

²¹Nʼameso wenyũ siasyeganyira; engebe busana nʼengebe, erĩso busana nʼerĩso, nʼerĩno busana nʼerĩno, ebyala busana nʼebyala, ekisando busana nʼekisando.