Read nande Eryibuka Ebihano 20 Bible Online

Eryibuka Ebihano 20 - nande bible

Eryibuka Ebihano 20

¹Omugulu mukayalwa nʼesyonzĩgũ syenyũ, mukalangira esyosabayĩrĩ, nʼesyogalĩ, nʼabandu banene kwilaba nywe, simusyubahabo; kusangwa Omwami Mukulu Nyamuhanga wenyũ ali haguma nenyũ, oyo wabalũsaya omo kihugo kyʼeMĩsĩrĩ.

²Neryo kikandisyabya omugulu mukasegera hakũhĩ nʼamalwa, Omũ hererĩ asyayĩtũnda hakũhĩ nʼerĩbũga nʼabandu,

³asyabwirabo ati, Ĩnywe Baĩsraelĩ, mowe, mũkayĩtũnda hakũhĩ nʼerilwa nʼesyonzĩgũ syenyũ; omutima wenyũ sialembere; simubahe, kutse erititimana, kutse sĩmũkwe bo buba;

⁴kusangwa Omwami Mukulu Nyamuhanga wenyũ yukagenda nenyũ, eribalwira nʼesyonzĩgũ syenyũ, erĩbalamya.

⁵Nʼabakulu basyabũga nʼabandu bati, Nindi abĩrĩhĩmba enyũmba nyihya-nyihya, isialiahigulayo kwehĩ? Agende asube omo nyũmba yiwe, akasyahola omo malwa, nʼogundi mundu akahigulayo.

⁶Kandi nindi oyo wabirihera eririma lyʼebĩnyũ, isialialya oko bĩgũma byalyo kwehĩ? Agende asube omo nyũmba yiwe, akasyahola omo malwa, nʼogundi mundu akalya oko bĩgũma byalyo.

⁷Kandi nindi abĩrĩsĩmolya omũkalĩ, ĩsĩalĩamũherũkya kwehĩ? Agende asube omo nyũmba yiwe, akasyaholera omo malwa, nʼogundi mundu akamwĩmya.

⁸Nʼabakulu basyabũga kandi nʼabandu bati, Nindi oyukubaha, kandi owʼomutima owakapũka-pũka kwehĩ? Agende asube omo nyũmba yiwe, omutima wʼabagala babo akasyasendekerera ngʼomutima wuwe.

⁹Neryo omugulu abakulu basyabuga erĩbũga nʼabandu, basyahĩra abasondolĩ bʼemilondo oko bandu.

¹⁰Omugulu mũkayĩtũnda hakũhĩ nʼomũyĩ erilwa nago, mwasyahabo omwatsi wʼobuholo.

¹¹Neryo amabasũbirya omo buholo, nʼeribakingulira, abandu bosĩ abakabanikamo basyabya bagombe benyũ nʼeribakolera.

¹²Kandi amatindasonda eriyira Obuholo nenyũ, nĩkwa akasonda erilwa nenyũ, mwasyatĩmbĩrago omo malwa.

¹³Nʼomugulu Omwami Mukulu Nyamuhanga wenyũ asyahĩrago omo byala byenyũ, mwasyaswĩrya obuli mulume wago omo boya bwʼomũyalĩ.

¹⁴Nĩkwa abakalĩ, nʼabana, nʼebihangulo, nʼebyosĩ ebiri omo mũyĩ, ebindu byosĩ byago, mwasyayĩmĩryabyo mo binyego; kandi mwasyalya ebinyego byʼesyonzĩgũ syenyũ, ebyo Mwami Mukulu Nyamuhanga wenyũ abiribaha.

¹⁵Mwasyakola mutya nʼemĩyĩ yosĩ eyiri hali kwĩnywe, eyite mĩyĩ yʼebihanda ebiri hakũhĩ.

¹⁶Nĩkwa omo mĩyĩ yʼebihanda, ebyo Mwami Mukulu Nyamuhanga wenyũ akabaha mo mwandu, sĩmũsyesĩgaho ekindu nʼekiguma ekikahumula.

¹⁷Nĩkwa mwasyatĩnda ndeke-ndeke Omũhĩtĩ, nʼOmũamorĩ, nʼOmukanana, nʼOmũperĩzĩ, nʼOmũhĩvĩ nʼOmũyebũsĩ; ngoko Mwami Mukulu abiribahana;

¹⁸bakasyabĩgĩsya erikola ngʼesyonye syabo syosĩ esyo babirikolera esyonyamuhanga syabo; mũkasyahalya oko Mwami Mukulu Nyamuhanga wenyũ.

¹⁹Omugulu mwasyatĩmba oko mũyĩ biro bingi, erilwirago erĩkĩndago, sĩmũsyeheraya emiti yago omwʼikondayo omo mbasa; kusangwa mwanganalya kuyo, kandi simusyekonderayo ahisi; kusangwa omuti wʼomolĩ ni mundu kwehĩ? Muti mũkatĩmbĩrayo kwehĩ?

²⁰Emiti misa eyo wasĩ ndeke kwʼite yʼakalyo, yo mwasyaherya nʼerikondayo; kandi mwasyahĩmba ebisambiro oko mũyĩ owakalwa nawe, erĩhĩka aho asyaterera.