Read nande Eryibuka Ebihano 21 Bible Online

Eryibuka Ebihano 21 - nande bible

Eryibuka Ebihano 21

¹Omundu amabanika ĩnĩabĩrĩkwa omo kihugo ekyo Mwami Mukulu akabaha erĩsĩgalyakyo, iniagotsere ahisi, kandi oyulyamwĩta ĩsĩasĩbwe.

²Neryo abakulu benyũ nʼabatswerĩ benyũ basyahuluka, neryo basyalenga ebilometere oko mĩyĩ ĩtĩmbĩre hakũhĩ oko mundu oyũlĩtawa.

³Neryo omũyĩ owali hakũhĩ-kũhĩ nʼomundu oyũlĩtawa, abakulu bʼomũyĩ oyo basyaleta enyana yʼende, eyite yakola omũbĩrĩ, nʼeyite yakurakĩ omo ngomo;

⁴nʼabakulu bʼomũyĩ oyo basyandagalya enyana eyo omo musya ahali amagetsi awakasenda, ahate halimwa kutse eriherwa kalyo, neryo basyanyolera ebĩkya byʼenyana eyo byʼomo musya.

⁵Nʼabagala ba Lawĩ abahererĩ basyasegera hakũhĩ; kusangwa abo bo Mwami Mukulu Nyamuhanga wawe abiriyisoga erimukolera nʼeritsumula omo lĩna lyʼOmwami Mukulu; nabo basyatwa obuli buhaka nʼobuli mwaga.

⁶Nʼabakulu bosĩ bʼomũyĩ oyo, owali hakũhĩ-kũhĩ nʼomundu oyũlĩtawa, basyanabĩrya ebyala byabo endata wʼenyana eyo balianyola ebĩkya byayo omo musya.

⁷Neryo basyasũbĩrya bati, Ebyala byetu sĩbyetũta omusasi oyũ, kutse ameso wetu sialitalangirago.

⁸Uwe Mwami Mukulu, ubuyire abandu bawe Abaĩsraelĩ, abo wabĩrĩtongolya, kandi Sũhĩre omusasi owate ko lubanza omo katĩkatĩ kʼabandu bawe Ĩsraelĩ. Nʼolubanza lwʼomusasi oyo lwasyabuyirwa kubo.

⁹Mutya mwasyalũsya olubanza omo katĩkatĩ kenyũ olwʼomusasi owate ko musango, omugulu mukasyakola ekitunganene omo meso wʼOmwami Mukulu.

¹⁰Omugulu mukayalwa nʼesyonzĩgũ syenyũ, nʼOmwami Mukulu Nyamuhanga wenyũ akahĩrabo omo byala byenyũ, nenyũ mukahekabo mo banyegwa,

¹¹neryo mukalangira omo katĩkatĩ kʼabanyegwa omũkalĩ mubuya, kandi ukamusonda, kandi ukasonda erĩmũhĩkya;

¹²wasyamuleta eka omo nyũmba yawe; neryo asyasĩsa omutwe wuwe nʼerĩtwa esyonyala siwe.

¹³Kandi asyambula esyongimba syʼobunyegwa buwe, asyĩkala omo nyũmba yawe, kandi asyalira ĩse wuwe na nyĩnya wuwe oko mukera muguma gosĩ; nʼenyũma wʼaho wasyamwĩmya nʼeribya ĩba wuwe, naye asyabya mũkalĩ wawe.

¹⁴Neryo wamatindamutsemera, wasyamuleka erigenda aho anzĩre; nĩkwa susyemũgũlaya nʼahake oko franka, susyemuyira ngʼomukobe, kusangwa wabirimuhemula.

¹⁵Omundu amabya nʼabakalĩ babiri, omuguma ini mwanze, nʼogundi ini musombe, kandi bamamubutira abana, omwanze nʼomusombe ababiri bosĩ; neryo akambere kamabya ini kʼomusombe;

¹⁶neryo ekiro akasyaha bagala buwe bʼomwandu ogo awite, siasyeyira omugala wʼomwanze eribya kambere emuliro wʼomugala wʼomusombe, oyuli kambere.

¹⁷Nĩkwa asyasĩma akambere, omugala wʼomusombe, erimuha amagabo abiri oko byosĩ awite; kusangwa nĩ ʼtsũka lyʼamaka wuwe; ehamũlĩ yʼakambere ni yiwe.

¹⁸Omundu amabya nʼomwana oyukalemana nʼoyukayisamambula, ĩsĩalĩowa omulenge wʼĩse wuwe kutse omulenge wa nyĩnya wuwe, kandi nomo bangamusuyira, ĩsĩalĩowabo;

¹⁹neryo ĩse wuwe na nyĩnya wuwe basyamutsimba, basyamũhũlũkĩrya oko bakulu bʼomũyĩ wuwe, nʼoko lũkyo lwʼaho wuwe.

²⁰Neryo basyabũga nʼabakulu bʼomũyĩ wuwe bati, omwana wetu oyũ alemene akayisamambula, syatũkengĩre; iye ni wʼomururu nʼomũkũndĩrya.

²¹Neryo abalume bosĩ bʼomũyĩ wuwe basyamwĩta omo mabwe; mwasyalũsya ebibi omo katĩkatĩ kenyũ; nʼAbaĩsraelĩ bosĩ basyowa, ibubaha.

²²Kandi omundu amakola ekibi ekitolere oluholo, neryo akĩtwa, ukamuhanika oko muti;

²³ekĩnda kiwe isikyasiba oko muti ekiro kyosĩ, nĩkwa mwasyamuta ekiro ekyo; kusangwa oyukahanikawa iniatakĩrwe na Nyamuhanga; mũkasyatsandya ekihugo kyenyũ ekyo Mwami Mukulu Nyamuhanga wenyũ akabaha mo mwandu.