Read nande Eryibuka Ebihano 22 Bible Online

Eryibuka Ebihano 22 - nande bible

Eryibuka Ebihano 22

¹Wamalangira ende yʼomugala wenyũ kutse embũlĩ yiwe ikatala, sĩmũyĩbĩse kusyo; kwenene, mwasyaletasyo kandi uku mugala wenyũ.

²Kandi mugala wenyũ amabya ate hakũhĩ nenyũ, kutse ĩsĩmũmwasĩ, mwasyatwalayo eka oko nyũmba yenyũ, nayo yasyabya haguma nenyũ erĩhĩka aho mugala wenyũ asyasonderyayo, neryo mwasyamũsũbũlĩryayo.

³Kandi mwasyakola mutya nʼepunda yiwe; kandi mwasyakola mutya nʼolukimba luwe; kandi mwasyakola mutya oko buli kindu kitere ekya mugala wenyũ, ekyo abĩrĩtalya, nenyũ banakyo. Simuli nʼehamũlĩ yʼerĩbĩsabyo.

⁴Mwamalangira epunda ya mugala wenyũ kutse ende yiwe yabiriwa oko mũsĩke wʼenzira, sĩmũsyeyĩbĩsa kusyo; kwenene mwasyamũwatĩkya erisumbayo.

⁵Omũkalĩ syasyembala esyongimba syʼomulume, kutse omulume syasyembala olukimba lwʼomũkalĩ; kusangwa oyukakola emyatsi eyo ni nye oko Mwami Mukulu Nyamuhanga wenyũ.

⁶Olutu lwʼenyonyũ lwamabya omo nzira embere syenyũ, omo muti wahi kutse oko kitaka, haguma nʼebyana kutse oko mayi, nʼenyĩnya wabyo ĩbũndamĩre oko byana kutse oko mayi, sĩmũsyĩmaya nyĩnya haguma nʼebyana.

⁷Kwenene mwasyalwĩka enyĩnya erigenda, nĩkwa ebyana mwanganayĩmĩryabyo; omwatsi wenyũ iniatoka erĩũwana, kandi imwatoka erĩkanyĩrĩrya ebiro byenyũ.

⁸Omugulu ũkahĩmba enyũmba nyihya-nyihya, mwasyahĩmba ekikunda oko lutwe lwenyũ, mukasyaleta olubanza lwʼomusasi oko nyũmba yenyũ omundu amatoga kuyo.

⁹Simusyehera emĩsĩndo ĩbĩrĩ yʼembuto omwʼirima lyenyũ lyʼebĩnyũ, ebĩgũma byosĩ bikasyahera, embuto mwahera, nʼerikanya lyʼeririma lyʼebĩnyũ.

¹⁰Sĩmũsyerĩmĩsaya ende haguma nʼepunda erikura eyĩsũka.

¹¹Simusyambala olukimba lũtũlũngene, obweya bwʼembũlĩ nʼekĩtanĩ haguma.

¹²Simusyeyira amayeye oko mĩsĩke ĩnĩ yʼolukimba lwenyũ, olo mukayiswika.

¹³Omundu amaherũkya omũkalĩ, amamwĩmya neryo akamupona,

¹⁴nʼerimulega ebĩkĩta esĩsonĩ, nʼerimuletera erĩna libi ati, Monĩmya omũkalĩ oyũ, neryo monasegera hakũhĩ naye, mondamubana ko biminyikalo byʼobumbesa.

¹⁵Neryo ĩse wʼomumbesa oyo, na nyĩnya wuwe, basyahũlũkya ebiminyikalo byʼobumbesa buwe oko bakulu bʼomũyĩ oko syongyo syʼomũyĩ.

¹⁶Neryo ĩse wʼomumbesa oyo asyabũga nʼabakulu ati, Monaha mwali wage oko mulume oyũ eribya mũkalĩwe, naye amamupona;

¹⁷neryo, akamulega emyatsi yʼesĩsonĩ ati, Mondabana oko mwali wawe kwʼebiminyikalo byʼobumbesa; nĩkwa ebĩ bye biminyikalo byʼobumbesa bwa mwali wage. Nabo basyasanza olukimba olo embere syʼabakulu bʼomũyĩ.

¹⁸Nʼabakulu bʼomũyĩ oyo basyahamba omulume oyo nʼerĩmũswĩrya;

¹⁹kandi basyamũlĩhĩsya ebĩtsĩpa erĩgana nʼerihahyo ũkwʼĩse wʼomumbesa oyo, kusangwa abiriluka omumbesa wa Ĩsraelĩ yʼerĩna libi; naye asyabya mũkalĩ wuwe; siasyemuhiga na kera.

²⁰Nikwa omwatsi oyo amabya ini kwenene, nʼebiminyikalo byʼobumbesa bitetabanika oko mumbesa oyo;

²¹neryo basyahũlũkya omumbesa oyo oko lũkyo lwʼenyũmba yʼĩse wuwe, nʼabalume bʼomũyĩ wuwe basyamwĩta omo mabwe, kusangwa abirikola obũkĩrũ omo Ĩsraelĩ, eribya mũsĩngĩrĩ omo nyũmba yʼĩse wuwe; litya mwasyalũsya ebibi omo katĩkatĩ kenyũ.

²²Omundu amabanika akagotsera nʼomũkalĩ oyũhĩkĩbwe, neryo ababiri bosĩ basyahola, omulume wagotsera nʼomũkalĩ, nʼomũkalĩ oyo; litya mwasyalũsya ebibi omo Baĩsraelĩ.

²³Hamabya omwana-muto oyũtasĩ mulume ĩnĩasĩmolĩbwe nʼomundu, nʼogundi mulume akamweya eka, akagotsera naye;

²⁴neryo mwasyahũlũkyabo ababiri oko lũkyo lʼomũyĩ oyo, ĩmwĩtabo omo mabwe; omumbesa oyo, kusangwa mwatalaka iniane eka; nʼomulume kusangwa abirihemula omũkalĩ wa mũlĩkyabo. Litya mwasyalũsya ebibi omo katĩkatĩ kenyũ.

²⁵Nĩkwa omulume ameya omwana-muto yʼomolĩ oyũsĩmolĩbwe, nʼomundu oyo akamũkĩnda, nʼerigotsera naye; omundu oyo ĩyowene oyo wagotsera naye asyahola.

²⁶Nĩkwa simusyekola omumbesa oyo yo kindu; sihali ekibi oko mumbesa oyo ekitolere oluholo; kusangwa ngoko mundu akahangana uku mũlĩkyabo, akamwĩta, omwatsi oyũ kwʼali atya.

²⁷Omugulu amwegaya omolĩ, omumbesa oyũsĩmolĩbwe mwalaka, isihali mundu wʼerĩmũlekerya.

²⁸Omundu ameya omwana-muto oyuli mumbesa kũndũ, ĩsĩalĩasĩmolĩbwa, akamuhamba, akagotsera naye, bakeyĩbwa;

²⁹neryo omulume oyo wagotsera naye asyaha ĩse wʼomukondo oyo esyosekelĩ makũmĩ atanu syʼekĩtsĩpa, naye asyabya mũkalĩ wuwe, kusangwa abĩrĩmũtsandya; siasyemuhiga omo biro biwe byosĩ.

³⁰Omundu sĩasyĩmaya omũkalĩ wʼĩse wuwe, litya siasyesukula olukimba lwʼĩse wuwe.