Read nande Eryibuka Ebihano 23 Bible Online

Eryibuka Ebihano 23 - nande bible

Eryibuka Ebihano 23

¹Oyuhutere oko bihege, kutse oyũtwĩrwe kwʼenzũko yiwe siasyingira omo ndeko yʼOmwami Mukulu.

²Omwasa-na-nyĩnya syasyingira omo ndeko yʼOmwami Mukulu; Sihabye mwana wabo erĩhĩka oko lulengo lwʼerĩkũmĩ, eriingira omo ndeko yʼOmwami Mukulu.

³Omũamonĩ kutse Omũmoabũ siasyingira omo ndeko yʼOmwami Mukulu; Sihabye mwana wabo erĩhĩka oko lulengo lwʼerĩkũmĩ, eriingira omo ndeko yʼOmwami Mukulu kera na kera.

⁴Kusangwa mobatasangana nenyũ nʼobundu nʼamagetsi omo nzira omugulu mwalũa eMĩsĩrĩ, kandi kusangwa mobahemba Balama mugala wa Beorĩ oyo walũa eBetorĩ wʼeMesopatamia eribatakira.

⁵Nĩkwa Omwami Mukulu Nyamuhanga wenyũ mwatalĩga erihulikirira Balama; nĩkwa Omwami Mukulu Nyamuhanga wenyũ mwabindula eritakira mo mũyĩsa busana nenyũ, kusangwa Omwami Mukulu Nyamuhanga wenyũ abanzĩre.

⁶Susyesonderabo Obuholo bwabo kutse omũyĩsa wabo ebiro byawe byosĩ na kera.

⁷Sũsyekwa Omũedomũ yo nye; kusangwa iye ni mugala wenyũ. Sũsyekwa Omunya Mĩsĩrĩ yo nye; kusangwa wabya owʼehandi omo kihugo kiwe.

⁸Abana bʼolulengo lwʼakasatu ababũtĩrwe kubo bangingira omo ndeko yʼOmwami Mukulu.

⁹Omugulu mukahuluka omo mulondo eriyalwa nʼesyonzĩgũ syenyũ, mwasyayĩteya oko buli kindu kibi.

¹⁰Hamabya mundu omo katĩkatĩ kenyũ omũtsandĩrya busana nʼekĩkamũbũlĩkĩranaya omo kiro, neryo asyaya ekyaswa kyʼekilaliriro, syasyingira omo kilaliriro.

¹¹Nĩkwa omugulu bukasonda erĩĩra asyayikosa omo magetsi; neryo eryuba lyabirenga iningira omo kilaliriro.

¹²Kandi mwasyabya nʼomwanya nibya omo kyaswa kyʼekilaliriro, eyo mwasyaya ebwiga.

¹³Kandi mwasyabya nʼakasũka omo byuma byenyũ; neryo omugulu ũkĩkala ahisi ekyaswa eyo, mwasyatakula muko, neryo mwasyabinduka ĩmwakũnĩngĩra ekĩkabalũako.

¹⁴Kusangwa Omwami Mukulu Nyamuhanga wenyũ akalendera omo kilaliriro kyenyũ, erĩbalamya, nʼerĩkĩnda esyonzĩgũ syenyũ embere syenyũ; kikatuma ekilaliriro kyenyũ kitolere ikyabya kĩbũyĩrĩre, iniatalangira kindu ekĩtĩsĩrĩre kuwe, akasyabũnũkala akabalũako.

¹⁵Sĩmũsyesũbaya omukobe oko mukama wuwe oyo wasagira ukʼuwe erĩlũa oko mukama wuwe.

¹⁶Asyĩkala omo katĩkatĩ kenyũ, aho asyayisoga omo mũyĩ muguma wenyũ, ahakamũtsemesaya ndeke; sĩmũsyemũnũbaya.

¹⁷Sihasyebya mũtetĩ omo bali bʼAbaĩsraelĩ, kutse Sihasyebya omulume oyukateta omulume omo bagala ba Ĩsraelĩ.

¹⁸Simusyereta obũhĩngĩ bwʼomũtetĩ, kutse obũhĩngĩ bwʼomulume oyukateta ogundi mulume, omo nyũmba yʼOmwami Mukulu Nyamuhanga wenyũ busana nʼerĩlahĩrĩrya. Kusangwa ebibiri ebĩ ni nye oko Mwami Mukulu Nyamuhanga wenyũ.

¹⁹Simusyebweka mugala wenyũ busana nʼendũndĩ; endũndĩ yʼesyofranka, endũndĩ yʼebyalya, endũndĩ yʼekĩndũkĩ ekikabwekawa busana nʼendũndĩ.

²⁰Oko wʼehandi wanganabweka busana nʼendũndĩ; nĩkwa oko mugala wenyũ simusyebweka busana nʼendũndĩ, Omwami Mukulu Nyamuhanga wenyũ atoke erikutsumula omo byosĩ ukakola omo byala byawe omo kihugo ekyo mukayamo erĩsĩgalyakyo.

²¹Omugulu mwasyalahĩrĩrya ekĩlahĩryo oko Mwami Mukulu Nyamuhanga wenyũ, simusyerindirira erĩtũhakyo; kusangwa Omwami Mukulu Nyamuhanga wenyũ kwenene asyababũlyakyo; ikyabya kibi ũkwʼĩnywe.

²²Nĩkwa mwamayĩkakĩrya erĩlahĩrya, sikyendisyabya kibi ũkwʼĩnywe.

²³Ekĩkalũa omo mĩnywa yenyũ mwasyakwamirira erikolakyo; ngoko mwabĩrĩlahĩrya oko Mwami Mukulu Nyamuhanga wenyũ, olũsũnzo lwʼeriyitswa, eryo mwabirilaga omo buno bwenyũ.

²⁴Omugulu mũkahĩka omwʼirima lyʼebĩnyũ lya mulĩkyenyũ, wanganalya oko bĩgũma byʼebĩnyũ ngoko wanzĩre, ĩgũgũta; nĩkwa sĩmũsyehĩra nʼebike omo kitiri kyawe.

²⁵Omugulu mũkahĩka omo ngano yʼomũlĩkyenyũ, neryo mwanganatwa amakũndĩ omo byala byenyũ; nĩkwa sĩmũsyehĩra omũtemĩ oko ngano ya mũlĩkyenyũ.