Read nande Eryibuka Ebihano 24 Bible Online

Eryibuka Ebihano 24 - nande bible

Eryibuka Ebihano 24

¹Omugulu omundu akenda omũkalĩ, nʼerĩmũhĩkya, amatendĩowana omo meso wuwe, kusangwa abiribana obulema omwisi wuwe, asyamusakira ebarua yʼerimukomola, nʼerimuhayo omo byala biwe, nʼerimuhiga omo nyũmba yiwe.

²Kandi omugulu amabĩlũa omo nyũmba yiwe, anganaherukira oko gundi mulume.

³Kandi ĩba wuwe wʼenyũma amamũkwa obusu, akamusakira ebarua erimukomola, akamuhayo omo byala biwe, akamuhiga omo nyũmba yiwe; kutse ĩba wuwe wʼenyũma amahola, oyo wamũhĩkaya mo mũkalĩwe;

⁴ĩba wuwe wʼerĩmbere, oyo wamuhiga, siangaswamwĩmya eribya mũkalĩ wuwe, kusangwa amabĩtsandĩbwa; kusangwa ekyo ni nye embere syʼOmwami Mukulu; nawe sĩmũsyehalaya ekihugo, ekyo Mwami mukulu Nyamuhanga wenyũ akabaha mo mwandu.

⁵Omugulu omundu akatahaya omũkalĩ muhya-muhya isiagenda haguma nʼemilondo yʼamalwa, kandi siendisyahabwa omũbĩrĩ nʼomuke. Asyabuga Omwaka muguma wʼeka omo bwĩranda, kandi asyatsemesya omũkalĩ wuwe oyo abĩrĩhĩkya.

⁶Sĩmũsyĩmaya oluso kutse engasĩrya mo muwato; kusangwa ĩmũkĩmaya engebe yʼomundu mo muwato.

⁷Omundu amabanika akĩba omuguma gʼoko bagala bʼabana ba Ĩsraelĩ, akamũkolesya mo mukobe, kutse erĩmũgũlya; neryo omwĩbĩ oyo asyahola; mwasyalũsya ebibi omo katĩkatĩ kenyũ.

⁸Mũyĩtegaye busana nʼekĩhũnzo kyʼebihaga, mukwamirire kutsibu erikola ngʼebyosĩ abahererĩ Abalawĩ basyabakangĩrĩrya; ngoko nahanabo, ko mwasyakwamirira erikola mutya.

⁹Mwibuke ebyo Mwami Mukulu Nyamuhanga wenyũ akola Mĩrĩamũ, omo nzĩra omugulu mwalũa eMĩsĩrĩ.

¹⁰Omugulu mukabweka mũlĩkyenyũ yʼomuhandakĩ wʼeribweka, simusyingira omo nyũmba yiwe erienda omuwato wuwe.

¹¹Mwasyimana eyĩhya nʼomundu oyo wabweka asyakuletera omuwato wʼeyĩhya.

¹²Naye amabya ini mundu mwera, Simusyebya nʼomuwato wuwe erĩhĩka engyakya;

¹³kwenene mwasyamũsũbũlĩrya omuwato omugulu eryuba likalenga, iniatoka erigotsera omo lukimba luwe, nʼeribatsumula; nʼekyo kyasyabya eritunganene busana nenyũ embere syʼOmwami Mukulu Nyamuhanga wenyũ.

¹⁴Sĩmũsyenũbaya omũhĩngĩ wenyũ oyuli mwera nʼowʼobwaga, kutse amabya wʼabagala benyũ, kutse owʼehandi abali omo kihugo kyenyũ omo muhana wawe.

¹⁵Oko kiro kiwe mwasyamuha obũhĩngĩ buwe eryuba lite ryalenga, kusangwa iye ni mwera, kandi akahĩra omutima kubo; akasyalakira Omwami Mukulu busana nenyũ, ikyabya kibi ũkwʼĩnywe.

¹⁶Abĩse sĩbĩtawe busana nʼabana, kutse abana sĩbĩtawe busana nʼabĩse babo; obuli mundu asyĩtwa busana nʼekibi kiwekiwe.

¹⁷Sĩmũsyelĩba-lĩbanaya erĩbanza lyʼowʼehandi, kutse engũbĩ, kutse sĩmũsyĩmaya olukimba lwʼomũkwakalĩ mo muwato.

¹⁸Nĩkwa wasyibuka ko wabya mukobe eMĩsĩrĩ, kandi Omwami Mukulu mwakũtongolyayo; kikaleka inakuhana erikola omwatsi oyo.

¹⁹Omugulu mukahulula obuhulule bwenyũ omwʼirima lyenyũ, mukibirirwa omuganda muguma gʼomwʼirima, simusyesubayo eriendago; asyabya busana nʼowʼehandi, busana nʼengũbĩ, na busana nʼomũkwakalĩ, Omwami Mukulu Nyamuhanga wenyũ atoke eribaha omũyĩsa omo mũbĩrĩ gosĩ wʼebyala byenyũ.

²⁰Omugulu mũkalagalaya ebĩgũma byʼomuti wʼomũzeĩtũnĩ wenyũ simusyesubira emitahi yago; byasyabya busana nʼowʼehandi, busana, nʼengũbĩ, na busana nʼomũkwakalĩ.

²¹Omugulu mukoha ebĩgũma byʼeririma lyenyũ ryʼebĩnyũ, simusyesubira amahũmbĩra; asyabya busana nʼowʼehandi, busana nʼengũbĩ, na busana nʼomũkwakalĩ.

²²Kandi mwasyibuka ko mwabya bakobe omo kihugo kyʼeMĩsĩrĩ; kikaleka inabahana erikola omwatsi oyo.