Read nande Eryibuka Ebihano 26 Bible Online

Eryibuka Ebihano 26 - nande bible

Eryibuka Ebihano 26

¹Neryo omugulu mwamabingira omo kihugo ekyo Mwami Mukulu Nyamuhanga wawe akabaha busana nʼomwandu, kandi mũkasĩgalyakyo, nʼerĩĩkala mukyo,

²mwasyĩmya Obuyilula bwʼebĩgũma byosĩ byʼekitaka, ebyo mwasyahulula omo kihugo ekyo Mwami Mukulu Nyamuhanga wawe akabaha; neryo mwasyahĩrabyo omo kitiri, neryo mwasyaya aho Mwami Mukulu Nyamuhanga wenyũ akayisoga, erĩĩkalyaho erĩna liwe.

³Neryo mwasyahĩka oko mũhererĩ oyo wasyabyaho oko biro ebyo, mwasyamubwira muti, Ngatũlago mũnabwĩre oko Mwami Mukulu Nyamuhanga wawe, ko nabĩrĩhĩka omo kihugo ekyo Mwami Mukulu alahĩrĩraya abotata-kulu wetu erituhakyo.

⁴Nʼomũhereri asyimya ekitiri omo byala byawe, nʼeritekakyo ahisi embere wʼekiherero kyʼOmwami Mukulu Nyamuhanga wawe.

⁵Neryo mwasyasũbĩrya nʼerĩbũga embere syʼOmwami Mukulu Nyamuhanga wawe, muti, Tata wage abya Mũsũrĩa oyukagala-ganda; neryo mwandagalira eMĩsĩrĩ, neryo mwabungirayo, ibane bake okwʼiganza; nʼeyo, mwabya kihanda kinene, nʼekyʼamaka, nʼekyʼabandu bangi.

⁶NʼAbanya Mĩsĩrĩ mobatukola nabi, mobatwagalya, mobatũkolesya obukobe bũkalĩre.

⁷Neryo motwalakira Omwami Mukulu Nyamuhanga wʼabotata-kulu wetu, kandi Omwami Mukulu mwowa omulenge wetu, mwalangira amagalĩ wetu, nʼomũbĩrĩ wetu, nʼobunube bwetu;

⁸kandi Omwami Mukulu mwatũlũsya eMĩsĩrĩ omo byala bĩkalĩre, nʼokuboko kũyĩsũmbĩre, nʼebĩkĩta obuba binene, nʼebiminyikalo, nʼebyʼeriswekera;

⁹kandi abirituleta hano, kandi abirituha ekihugo ekĩ, ekihugo ekyoswĩre mwʼamasabũ nʼobuki.

¹⁰Na lino lebaya, namaleta Obuyilula bwʼebĩgũma byʼekitaka, ebyo Uwe Mwami Mukulu wabirimba. Neryo wasyatekabo ahisi embere syʼOmwami Mukulu Nyamuhanga wawe, nʼerĩramya embere syʼOmwami Mukulu Nyamuhanga wawe.

¹¹Neryo uwe, nʼOmũlawĩ, nʼowʼehandi oyuli omo katĩkatĩ kenyũ, mwasyatsema omo bibuya byosĩ ebyo Mwami Mukulu Nyamuhanga wawe abiribaha, uwe nʼekĩtũnga kyawe.

¹²Neryo omugulu mwamabibuga eririha ekiguma kyʼomwʼĩkũmĩ kyʼerikanyirira lyosĩ ryawe oko mwaka wʼakasatu, oyo ni mwaka wʼeribana ekiguma kyʼomwʼĩkũmĩ, neryo mwasyahakyo oko Mũlawĩ, nʼoko wʼehandi, nʼoko ngũbĩ, nʼoko mũkwakalĩ, ibatoka erirya omo muhana wenyũ nʼerĩũgũta.

¹³Kandi mwasyabũga embere syʼOmwami Mukulu Nyamuhanga wenyũ muti, Nabĩrĩlũsya ebindu bĩbũyĩrĩre omo nyũmba yage, kandi nabirihabyo Omũlawĩ, nʼoko wʼehandi, nʼoko ngũbĩ, nʼoko mũkwakalĩ, ngʼebihano byawe byosĩ ebyo wabirinyihana; sĩndĩtahalya kutse eribirirwa ebihano byawe nʼahake.

¹⁴Sinditalya kubyo omwʼĩsũsũmana lyage, kutse sĩndĩtalũsya kubyo inyine mũtsandĩrya, kutse eriherera kubyo busana nʼabaholĩ. Nabirihulikirira omulenge wʼOmwami Mukulu Nyamuhanga wage; nabirikola ebyosĩ ebyo wabirinyihana.

¹⁵Usamalire eyĩkwa oko hʼerĩĩkala hawe habũyĩrĩre, omo lubula, utsumule abandu bawe Ĩsraelĩ, nʼekitaka ekyo wabirituha, ngoko walahĩrĩraya, abotata-kulu wetu, ekihugo kyoswĩre mwʼamasabũ nʼobuki.

¹⁶Mũnabwĩre Omwami Mukulu Nyamuhanga wenyũ akabahana erikola emigambo nʼebilayiro ebĩ; neryo mwasyateyabyo nʼerikolabyo nʼomutima wenyũ gosĩ, nʼekĩrĩmũ kyenyũ kyosĩ.

¹⁷Mwabiriyisinga Omwami Mukulu mũnabwĩre eribya Nyamuhanga wenyũ, kandi muti mwanzĩre erigendera omo nzira siwe, nʼerĩteya emigambo yiwe, nʼebihano biwe, nʼebilayiro biwe, nʼerĩowa omulenge wuwe.

¹⁸NʼOmwami Mukulu abiriyisinga nywe mũnabwĩre eribya bandu buwe, enzĩgalya yiwe yʼebindu biwe ngoko abiribalaga, kandi ati mwangateya ebihano biwe byosĩ;

¹⁹kandi ati asyabahĩra endata oko bihanda byosĩ ebyo abirihangika, busana nʼeripipa nʼerĩkũmayira, nʼomwʼĩsĩkya; imwatoka eribya ekihanda kĩbũyĩrĩre oko Mwami Mukulu Nyamuhanga wawe, ngoko abĩrĩbũga.