Read nande Eryibuka Ebihano 29 Bible Online

Eryibuka Ebihano 29 - nande bible

Eryibuka Ebihano 29

¹Ebĩ bye bĩnywa byʼendagano eyo Mwami Mukulu ahana Musa omo kihugo kyʼeMoabũ eyite ngʼendagano eyo ayira nabo eHorebũ.

²Neryo Musa mwabirikira Abaĩsraelĩ bosĩ, mwabũga nabo ati, Mwabirilangira ebyosĩ ebyo Mwami Mukulu akolera Farao embere syʼameso wenyũ omo kihugo kyʼeMĩsĩrĩ, nʼoko bagombe buwe bosĩ, nʼekihugo kiwe kyosĩ;

³erirengwako lĩhene eryo ameso wawe abirilangira, ebiminyikalo, nʼebyʼeriswekera binene.

⁴Nĩkwa Omwami Mukulu sialitabaha omutima wʼeriminya, nʼameso wʼerĩrebya, nʼamatwĩ wʼerĩowa, erĩhĩka oko kiro ekĩ.

⁵Kandi nabiribasondola emyaka makũmĩ ani omo mbwarara; esyongimba syenyũ mositabakulirako, nʼesyongendero syenyũ sisiritakulira omo bisando byenyũ.

⁶Simwetalya bundu, kutse sĩmwetapũlya ebĩnyũ kutse obũhĩre; imwatoka eriminya kwʼindi Mwami Mukulu Nyamuhanga wenyũ.

⁷Nʼomugulu mwahĩka hano, Sĩhonĩ omwami wʼeHesĩbonĩ, na Ogĩ omwami wʼeBasanĩ, mobatubambira omo malwa, netu motwakĩndabo;

⁸kandi motwĩmya ekihugo kyabo motwahakyo oko Barũbenĩ mo mwandu, nʼoko Bagadĩ, nʼoko luhande lwʼekihanda kya Manase.

⁹Neryo mũtegaye ebĩnywa byʼendagano eyĩ mukolebyo, imwatoka erigasa omo byosĩ mukakola.

¹⁰Ĩnywe bosĩ mwimene mũnabwĩre embere syʼOmwami Mukulu Nyamuhanga wenyũ; abakama benyũ, nʼebihanda byenyũ, nʼabakulu benyũ, nʼabasondolĩ benyũ, abalume bosĩ ba Ĩsraelĩ,

¹¹abana benyũ, abakalĩ benyũ, nʼowʼehandi wenyũ oyuli omo bilaliriro byenyũ, erĩtsũka oko mũsenyĩ oyukabasenyera erĩhĩka oko yukabahekera amagetsi wenyũ;

¹²imwatoka eriingira omo ndagano yʼOmwami Mukulu Nyamuhanga wenyũ, nʼomo kisemo kiwe, ekyo Mwami Mukulu Nyamuhanga wenyũ akayira nenyũ mũnabwĩre;

¹³iniatoka erĩbahanganĩa mũnabwĩre eribya kihanda busana naye, kandi iniatoka eribya Nyamuhanga wenyũ, ngoko ababwira, kandi ngoko alahĩrĩraya abotata-kulu wenyũ, uku Abrahamũ, uku Ĩsaka, nʼuku Yakobo.

¹⁴Nĩkwa sindiyira endagano eyĩ nʼerĩlahĩrya erĩ nenyũ ĩmwebene,

¹⁵nĩkwa haguma nʼoyo wimene netu hano mũnabwĩre embere syʼOmwami Mukulu Nyamuhanga wetu, nibya haguma nʼoyute haguma netu hano mũnabwĩre,

¹⁶(kusangwa mũnasĩ ngoko twĩkala omo kihugo kyʼeMĩsĩrĩ, kandi ngoko twalaba omo katĩkatĩ kʼebihanda ebyo mwalabamo.

¹⁷Kandi, mwabirilangira esyonye syabo, nʼesyosanamu syabo syʼemiti nʼamabwe, nʼekĩtsĩpa nʼesyamagetsi, esyabya omo katĩkatĩ kabo);

¹⁸hakasyabya omo katĩkatĩ kenyũ omulume kutse omũkalĩ, kutse ekĩtũnga, kutse ekihanda, omutima wabo akabũnũkala mũnabwĩre akalũa oko Mwami Mukulu Nyamuhanga wetu, akayakolera esyonyamuhanga syʼebihanda ebyo; hakasyabya omũlĩhĩ owakabuta ebĩgũma byʼobuti nʼerikaliha;

¹⁹neryo ikyabya, omugulu akowa ebĩnywa byʼeritakira erĩ, akayitsumula omo mutima wuwe ati, Nasyabya nʼobuholo, nomo nangalendera omwʼiyihandika lyʼomutima wage, erĩherya ekitaka kyʼamagetsi haguma nʼekyũmĩre.

²⁰Omwami Mukulu sĩendĩsyalĩga eribuyira omundu oyo, nĩkwa erihitana lyʼOmwami Mukulu nʼobũha buwe byasyaka erĩhĩsya omundu oyo, nʼobuli ʼtakira lyosĩ erĩsakĩre omo kitabu ekĩ lyasyamubundako, nʼOmwami Mukulu asyalĩmya erĩna liwe lyʼeyĩkwa oko bũtũkũ.

²¹Neryo Omwami Mukulu asyamusolola busana nʼekibi erĩlũa omo bihanda byosĩ bya Ĩsraelĩ, ngʼamatakire gosĩ wʼendagano awasakĩre omo kitabu ekĩ kyʼemigambo.

²²Nʼolulengo olukandisyasa, abana benyũ abakandisyahangana enyũma wenyũ, nʼowʼehandi oyũkandĩsyalũa omo kihugo kyʼehali, omugulu bakalangira ebĩhũnzo byʼekihugo ekyo, nʼesyondwala esyo Mwami Mukulu abĩrĩlwalyakyo basyabũga bati,

²³Ekihugo kyosĩ kyayo nĩ bũsĩngo, nʼomũnyũ, omulala wʼeriakirira, sikyeherawa, kandi sikyebuta, nʼebiti sibyelasa mukyo, ngʼerisinduka lyʼeSodomo nʼeGomora, Adĩma na Zeboyĩmũ, ebyo Mwami Mukulu asindula omwʼihitana liwe, nʼomwʼigalirwa liwe.

²⁴Ebihanda byosĩ byasyabũga biti, Busana nakĩ Omwami Mukulu abirikola atya oko kihugo ekĩ kwehĩ? Kwʼerihitana lĩnene eryamaka erĩ ni busana nakĩ kwehĩ?

²⁵Neryo abandu basyabũga bati, Kusangwa balekĩre endagano yʼOmwami Mukulu, Nyamuhanga wʼabotata-kulu wabo, eyo alagana nabo omugulu alũsayabo omo kihugo kyʼeMĩsĩrĩ.

²⁶Kandi mobayakolera esindi nyamuhanga, nʼerĩramyasyo, esyonyamuhanga esyo batabya basĩ, nʼesyo atahabo.

²⁷Kyalekĩre erihitana lyʼOmwami Mukulu iryaka oko kihugo ekyo, erireterakyo obuli butakire bosĩ obũsakĩre omo kitabu ekĩ;

²⁸kandi Omwami Mukulu mwakulabo omo kihugo kyabo omwʼigalirwa, nʼomwʼihitana, nʼomwʼihitikirana ĩnene, nʼerigusabo omo kindi kihugo, ngoko kine mũnabwĩre.

²⁹Emyatsi yʼerĩkũmbo ni yʼOmwami Mukulu Nyamuhanga wetu; nĩkwa emyatsi eyĩbĩswĩrwe ni yetu, nʼeyʼabana betu, kera na kera, itwatoka erikola ebĩnywa byosĩ byʼemigambo eyĩ.