Read nande Eryibuka Ebihano 3 Bible Online

Eryibuka Ebihano 3 - nande bible

Eryibuka Ebihano 3

¹Neryo motwabũnũkala, motwahetuka omo nzira yʼeBasanĩ; na Ogĩ omwami wʼeBasanĩ mwahuluka eritubambira omo malwa, iye nʼabandu buwe bosĩ.

²Nĩkwa Omwami Mukulu mwambwira, ati, Sigumubahe; kusangwa nabĩrĩmũhĩra, nʼabandu buwe bosĩ, nʼekitaka kiwe, omo byala byawe; neryo wasyamukola ngoko wakola Sĩhonĩ omwami wʼAbaamorĩ, oyo wabya ĩkere eHesĩbonĩ.

³Omwami Mukulu Nyamuhanga wetu mwahĩra Ogĩ omo byala byetu nibya, nʼomwami wʼeBasanĩ, nʼabandu buwe bosĩ; kandi motwamũtĩnda erĩhĩka aho isihali oyo wamusakako.

⁴Kandi oko mugulu oyo motwahamba emĩyĩ yiwe yosĩ; isihali omũyĩ ogo tutabanyega; emĩyĩ makũmĩ ndatu, ekihugo kyosĩ kyʼeArgobũ, obwami bwa Ogĩ eBasanĩ.

⁵Emĩyĩ yosĩ eyo ĩyĩkangatĩre omo syonyĩhĩmbo nyiri-nyiri, nʼesyongyo, nʼemĩkangĩ; kandi emĩyĩ mingi kutsibu eyite ko nyĩhĩmbo.

⁶Motwatĩndayo ndeke ngoko twakola Sĩhonĩ omwami wʼeHesĩbonĩ, erĩtĩnda ndeke abalume nʼabakalĩ nʼabana bʼobuli mũyĩ.

⁷Nĩkwa ebihangulo byosĩ, nʼebindu ebyo byʼemĩyĩ, motwanyegabyo busana netu.

⁸Oko mugulu oyo motwĩmya ekihugo erĩlũsyakyo omo byala byʼabami babiri bʼAbaamorĩ ababya eyisirya wʼeYorodanĩ oko musya wʼeArnonĩ erĩhĩka oko kitwa kyʼeHermonĩ.

⁹[Abanya Sĩdonĩ bakahula Hermonĩ mo Sĩrĩonĩ, nʼAbaamorĩ bakahulago mo Senĩrĩ;]

¹⁰Emĩyĩ yosĩ yʼebwerere, nʼeGĩleadĩ yosĩ, nʼeBasanĩ, erĩhĩka oko Saleka nʼeEdĩreĩ, emĩyĩ yʼobwami bwa Ogĩ eBasanĩ.

¹¹[Kusangwa Ogĩ omwami wʼeBasanĩ ĩyowene mwasĩgala oko basĩgalira bʼeRefaĩmũ; engyingo yiwe yabya engyingo yʼekyuma; iri eRaba ewʼabana ba Amonĩ. Obuli bwayo bwabya metere ĩnĩ, nʼobugali bwayo bwabya hakũhĩ na metere ĩbĩrĩ.]

¹²Nʼoko mugulu oyo motwĩmya ekihugo ekĩ mo nzĩgalya, erĩtsũka eAroerĩ, omũyĩ owali hakũhĩ nʼomusya wʼeArnonĩ, nʼoluhande lwʼekihugo kyʼebitwa kyʼeGĩleadĩ, nʼemĩyĩ yakyo monahayo Abarũbenĩ nʼAbagadĩ.

¹³Oluhande lwasĩgala lwʼeGĩleadĩ, nʼeBasanĩ yosĩ, obwami bwa Ogĩ, monahabyo oko luhande lwʼekihanda kya Manase; ekihugo kyosĩ kya Argobũ, kyʼeBasanĩ kyosĩ. Kyo kikahulawa mo kihugo kyʼAbarefaĩmũ.

¹⁴Yaĩrĩ mugala wa Manase mwĩmya ekihugo kyosĩ kyʼeArgobũ, erĩhĩka oko mutano wʼAbagesũrĩ nʼAbamaaka, neryo mwahulayo mo Basanĩ, ngʼerĩna liwe, Hawo-yaĩrĩ, erĩhĩka na mũnabwĩre.

¹⁵Na Makĩrĩ monamuha eGĩleadĩ.

¹⁶Nʼoko Barũbenĩ nʼAbagadĩ monahabo erĩtsũka eGĩleadĩ erĩhĩka oko musya wʼeArnonĩ, omo katĩkatĩ kʼomusya, nʼomutano wakyo, erĩhĩka oko lũsĩ Yaboko, oluli mutano wʼabana ba Amonĩ;

¹⁷nʼeAraba nibya, nʼeYorodanĩ nʼemitano yalo, erĩtsũka eKĩneretĩ erĩhĩka oko ngetsi yʼeAraba, ye Ngetsi yʼomũnyũ, eyĩkwa oko mandagala wʼePĩsĩga erilola endata.

¹⁸Neryo monabahana oko mugulu oyo, nyiti, Omwami Mukulu Nyamuhanga wenyũ abiribaha ekihugo ekĩ erĩsĩgalyakyo; Ĩnywe balume bosĩ bʼamaka mwasyasoka embere syʼabagala benyũ abana ba Ĩsraelĩ, ĩmũnahekĩre ebindu byʼamalwa.

¹⁹Nĩkwa abakalĩ benyũ nʼabana benyũ balere, nʼesyonde syenyũ (nyĩnasĩ ko muwite esyonde nyingi), basyasĩgala omo mĩyĩ yenyũ eyo nabiribaha,

²⁰erĩhĩka aho Mwami Mukulu asyalũhũkirya abagala benyũ, nga nywe, nabo nibya ĩbakasĩgalaya ekihugo ekyo Mwami Mukulu Nyamuhanga wenyũ akahabo eyisirya wʼeYorodanĩ; neryo mwasyasuba obuli mundu oko lubibi luwe olo nabiribaha.

²¹Nʼoko mugulu oyo monahana Yosũa, nyiti, Ameso wawe abirilangira ebyosĩ ebyo Mwami Mukulu Nyamuhanga wenyũ akola oko bami babiri aba; litya Omwami Mukulu asyakolera amami gosĩ awʼeyo mukasokera.

²²Simubahebo; kusangwa Omwami Mukulu Nyamuhanga wenyũ, iye yukabalwira.

²³Kandi oko mugulu oyo monalirira Omwami Mukulu, nyiti,

²⁴Uwe Nyamuhanga Omwami Mukulu, wabĩrĩtsũka erĩkangya omugombe wawe, obukulu bwawe, nʼebyala byawe byʼamaka; kusangwa nyamuhanga ni wahi omo lubula kutse omo kihugo, oyo wangatoka erikola ngʼemĩbĩrĩ yawe, kandi ngʼemikolere yawe eyĩkalĩre kwehĩ?

²⁵Ngakusaba nyiti Uleke nyisoke, nyilangire ekihugo kibuya ekiri eyisirya oko Yorodanĩ, nʼekihugo kyʼekitwa ekyo ekyowene kyʼeLebanonĩ.

²⁶Nĩkwa Omwami Mukulu mwanyihitanako busana nenyũ, kandi mwatetanyihulikirira; neryo Omwami Mukulu mwambwira ati, Ũtwĩraye aho, sũsyebũga nage kandi oko mwatsi oyo.

²⁷Uhetukire omo singi yʼePĩsĩga, Usumbe ameso wawe ebwanga bwʼeyĩkwa, nʼelutambi lwʼendata, nʼolundi lutambi lwʼeyĩkwa, nʼebwanga bwʼendata, usamalire omo meso wawe; kusangwa siwendisyasoka eYorodanĩ eyĩ.

²⁸Nĩkwa uhamule Yosũa, ũsũbaye omutima wuwe; ũmũsĩkaye; kusangwa asyasoka embere syʼabandu aba, kandi asyahabo omwandu wʼekihugo ekyo wasyasamalira.

²⁹Neryo motwĩkala omo musya oyo eyisirya wʼeBetĩ-Peorĩ.