Read nande Eryibuka Ebihano 32 Bible Online

Eryibuka Ebihano 32 - nande bible

Eryibuka Ebihano 32

¹Mutege okũtũ, ĩnywe matũkũ, muleke nyĩbũge; Nʼekihugo kyowe ebĩnywa byʼobuno bwage.

²Erĩkangĩrĩrya lyage litogonge ngʼembũla, Erĩbũga lyage ribombe ngʼekimi, Ngʼobunyenye bwʼembũla oko biti bihehere, Kandi ngʼeriwa lyʼembũla oko biti.

³Kusangwa ngandĩtũla erĩna lyʼOmwami Mukulu. Muhe obukulu uku Nyamuhanga wetu.

⁴Omũhanganĩrĩ oyo! Omũbĩrĩ wuwe ahĩkene; Kusangwa emibere yiwe yosĩ itunganene. Nyamuhanga oyuteregula kandi oyute nʼomwatsi ate wʼeribanza litunganene. Atunganene, kandi ni wʼerĩbanza lyʼekwenene.

⁵Babirimukola nabi, Si bana buwe, busana nʼekirema kyabo. Ni lulengo lwʼomwaga nʼolũhengemĩre.

⁶Mũkatũha Omwami Mukulu mutya, Ĩnywe bandu bakĩrũ abate na menge kwehĩ? Iye si tata wenyũ oyo wabagula kwehĩ? Abiribahangika, nʼerĩbahanganĩa.

⁷Mwibuke ebiro bya kera, Mũganĩraye emyaka yʼesyondengo syosĩ, Mũbũlaye tata wenyũ, naye akandĩbakangya; Abakulu benyũ basyababwira.

⁸Omugulu Owendata Kutsibu aha ebihanda byʼomwandu wabo, Omugulu asolola abana bʼabandu, Mwahĩra emitano yʼebihanda Ngʼemiganzo yʼabana ba Ĩsraelĩ.

⁹Kusangwa erĩgabo lyʼOmwami Mukulu ba bandu buwe; Yakobo nĩ ʼgabo lyʼomwandu wuwe.

¹⁰Mwamweya omo kihugo kyʼembwarara, Nʼomo bwerere obute mokĩ obukahuha; Iye mwamũtĩmbako, mwamulembera, Mwamũteya ngʼemboneryo yʼerĩso liwe.

¹¹Ngʼerĩsamba likakola-kola Olutu lwalyo, Lĩkapũperera endata oko byana byalyo, Likasanza ebĩpũpa byalyo, nʼerihambabyo, Likahekabyo oko bĩpũpa byalyo.

¹²Omwami Mukulu ĩyowene mwamusondola, Kandi sihabya ogundi nyamuhanga haguma naye.

¹³Mwamũtambya ahayĩsũmbĩre bʼekihugo, Kandi mwalya akalyo kʼamalima; Mwamwongya obuki obũkalũa omwʼĩbwe, Nʼamagũta awakalũa omwʼĩbwe rĩkalĩre;

¹⁴Olukoko lwʼamasabũ wʼende, nʼamasabũ wʼesyombũlĩ Haguma nʼebĩsabũ byʼehyana hyʼembũlĩ, Nʼesyombangale syʼomuhanda wʼeBasanĩ, nʼesyombene-hene, Haguma nʼengano nyibuya; Kandi momwapũlya ebĩnyũ, byʼomusasi wʼebĩgũma byʼebĩnyũ.

¹⁵Nĩkwa Yesũrũnĩ mwaneneha, mwalyata omwĩse. Mwabirineneha, mwabiritunahala, mwamatendera; Neryo mwasĩganĩa Nyamuhanga oyo wamũkengeregesanaya, Mwaserembula Erĩbwe ryʼerilama liwe.

¹⁶Mobamũmũkya mwʼobũha omo syonyamuhanga syʼehandi; Mobamũhĩtanĩa omo nye.

¹⁷Mobahongera esyombĩnga, esite Nyamuhanga, Oko syonyamuhanga batabya basĩ, Oko syonyamuhanga nyihya-nyihya esyahuluka enyũma, Esyo abotata-kulu wenyũ batubaha.

¹⁸Momwasĩganĩa Erĩbwe eryababuta, Mwabiribirirwa Nyamuhanga oyo wababuta.

¹⁹Kandi Omwami Mukulu mwalangira, mwaponabo Busana nʼerĩhĩtanĩbwa nʼabagala buwe nʼabali buwe.

²⁰Neryo mwabũga ati, Ngandĩbĩsabo obũsũ bwage, Ngandĩsyalebya endũlĩ yabo ko yasyabya. Kusangwa ni lulengo lwʼeriyihandika, Ni bana bate nʼobutalegula.

²¹Babĩrĩnyĩmũkya mwʼobũha omo bite Nyamuhanga; Babĩrĩnyĩhĩtanĩa omo sanamu syabo. Ngandĩmũkya obũha omo bate kihanda; Nasyahĩtanĩabo omo kihanda kĩkĩrũ.

²²Kusangwa omuliro amakĩbwa omwʼihitana lyage, Akaka erĩhĩka Ekũlĩmũ kwʼĩkwa yo hali, Akalya ekihugo omwʼikanya lyago, Akakaya omuliro omo bibanza byʼebitwa.

²³Nasyalunda kubo kʼobũlĩge; Nasyalasabo omo misoha yage.

²⁴Basyabonda omo nzala, nʼeribugwa omo kĩhũnzo. Nʼerihera erĩkalĩre; Nasyatumirabo ameno wʼesyonyama syʼomolĩ, Haguma nʼobuti bwʼebindu byʼolũtũtũ ebikayikura.

²⁵Eyĩhya omũyalĩ asyabasĩga bũmbũtete, Nʼomo manyũmba erĩũbahya; Asyaherya omũlwana nʼomumbesa ababiri bosĩ, Oyukonga haguma nʼomundu wʼesyombwĩ.

²⁶Monabũga nyiti, Nasyasatyabo mo bitswe-bitswe, Nasyaleka eryibukabo ĩrĩũmbya omo katĩkatĩ kʼabandu;

²⁷Kumbe sinabya ngubaha erĩũmũkya lyʼenzĩgũ, Esyonzĩgũ syabo sikasyahaba omwʼitswera, Bakasyabũga bati, Ebyala byetu byabĩrĩkĩnda, Kandi Omwami Mukulu sialitakola ebyosĩ ebĩ.

²⁸Kusangwa ni kihanda kitawite bwenge, Kandi eriminya siriri omwisi wabo.

²⁹Kumbe ni bʼamenge, nga babiriminya ekĩ, Ĩbaganĩrya ebĩkandĩsyahĩka kubo!

³⁰Kwʼomuguma angasagya elfu nguma, Nʼababiri ĩbasagya amaelfu ĩkũmĩ go bati, kwehĩ? Omwĩmĩrĩ wabo ngʼatalĩgũlayabo, NʼOmwami Mukulu ngʼatalihoterabo kwehĩ?

³¹Kusangwa omwĩmĩrĩ wabo sialingene nʼomwĩmĩrĩ wetu, Nʼesyonzĩgũ syetu syo sikatswera esĩ.

³²Kusangwa omũlĩkĩ wabo wʼebĩnyũ nĩ wʼomũlĩkĩ wʼebĩnyũ wʼeSodomo, Nʼowʼamalima wʼeGomora. Ebĩgũma byabo byʼebĩnyũ nĩ bĩgũma byʼobuti, Ebisaki byabo bĩkalĩhĩre.

³³Ebĩnyũ byabo ni buti bwʼesyonzoka, Nʼobusewe obũkalĩre bwʼenzwira.

³⁴Ekĩ sĩkĩbĩkĩre haguma nage omo mbĩso kwehĩ? Sĩkĩbohĩre omo katĩkatĩ kʼebindu byage kwehĩ?

³⁵Erĩkĩsya ni ryage, nʼeririha, Oko mugulu atolere ekisando kyabo kyasyatendera. Kusangwa ekiro kyʼerikwa lyabo kiri hakũhĩ, Nʼemyatsi ĩkandĩsyahĩka kubo ikanguha kubo.

³⁶Kusangwa Omwami Mukulu asyakola erĩbanza busana nʼabandu buwe, Nʼeriganyira abagombe buwe; Omugulu akalangira amaka wabo iniahwere, Isihali oyũsĩgere, oyũbohĩrwe kutse oyũtabohĩrwe.

³⁷Neryo asyabũga ati, Esyonyamuhanga syabo siri hahi kwehĩ? Nʼomwĩmĩrĩ oyo basonda erisagirako kwehĩ?

³⁸Nindi yo walya ebĩsabũ byʼamahere wabo, Nʼerĩpũlya ebĩnyũ byʼobuhere bwabo bwʼerĩpũlya kwehĩ? Bahangane, babawatĩkaye, Uleke babye aho mũkabĩsama!

³⁹Mũlebaye ngoko ĩngye, ĩngye indi ye, Kandi sihali nyamuhanga ate ĩngye. Ĩngye ngĩta, kandi ngaha engebe; Nabĩrĩhũtalya, kandi nĩĩngye oyũkalamaya, Kandi sihali oyo wangalũsya omo byala byage.

⁴⁰Kwenene ngasumbira ebyala byage byʼelubula, Ngabũga nyiti, Ngoko ngakota,

⁴¹Namagusungula omũyalĩ wage owaka-kangabasanaya, Nʼebyala byage bikahamba erĩbanza; Ngandĩsyakĩsya esyonzĩgũ syage, Kandi ngandiriha abakanyĩkwa obusu.

⁴²Ngandĩkũndya emisoha yage omo musasi, Nʼomũyalĩ wage asyalya esĩswĩ, Haguma nʼomusasi wʼabĩtawa nʼababohwa, Erĩlũa oko basondolĩ bʼenzĩgũ abʼesyonzwiri nyiri.

⁴³Mutseme, ĩnywe Bihanda, nʼabandu ba Nyamuhanga. Kusangwa asyakĩsya omusasi wʼabagombe buwe, Kandi asyaha erĩkĩsya oko nzĩgũ siwe, Kandi asyalihira ekihugo kiwe nʼabandu buwe.

⁴⁴Neryo Musa mwasa mwabũga ebĩnywa byosĩ ebĩ byʼolwimbo olo, omo matwĩ wʼabandu, iye, haguma na Yosũa mugala wa Nũnĩ.

⁴⁵Neryo Musa abere abibuga erĩbũga ebĩnywa byosĩ ebĩ oko Baĩsraelĩ bosĩ;

⁴⁶mwabũga nabo ati, Mũhĩre emitima yenyũ oko bĩnywa byosĩ ebyo ngabakongomerera mũnabwĩre, ebyo mwasyahana abana benyũ erikwamirira erikolabyo, bye bĩnywa byosĩ byʼemigambo eyĩ.

⁴⁷Kusangwa sĩ kĩnywa kyʼemitenyo busana nenyũ; ni ngebe yenyũ. Kandi busana nʼekĩnywa ekĩ mwasyakanyĩrĩrya ebiro byenyũ omo kihugo, eyo mukasoka eYorodanĩ erĩyasĩgalyakyo.

⁴⁸Kandi Omwami Mukulu mwabũga na Musa ekiro ekyo kisa-kisa, ati,

⁴⁹Hetukira oko kitwa ekĩ kyʼeAbarĩmũ, oko kitwa kyʼeNebo, ekiri omo kihugo kyʼeMoabũ, ekĩhererenĩe nʼeYerĩko; Ũlebaye ekihugo kyʼeKanana, ekyo ngaha abana ba Ĩsraelĩ eribya nzigalya.

⁵⁰Uholere omo kitwa ekyo ukahetukiramo, kandi ũkandĩeya abotata-kulu wawe, ngoko Harũnĩ mugala wenyũ aholera oko kitwa kyʼeHorĩ, naye mweya abotata-kulu wuwe.

⁵¹Kusangwa mwanyĩhalayako omo katĩkatĩ kʼabana ba Ĩsraelĩ oko magetsi wʼeMerĩba wʼeKadesĩ, omo mbwarara yʼeZĩnĩ; kusangwa momutanyiyira mo mũbũyĩrĩre omo katĩkatĩ kʼabana ba Ĩsraelĩ.

⁵²Kusangwa wasyasamalira ekihugo ekyo igune hali kukyo; nĩkwa siwendisyaya omo kihugo ekyo ngaha oko bana ba Ĩsraelĩ.