Read nande Eryibuka Ebihano 33 Bible Online

Eryibuka Ebihano 33 - nande bible

Eryibuka Ebihano 33

¹Oyũ go mũyĩsa ogo Musa, omundu wa Nyamuhanga, atsumulamo abana ba Ĩsraelĩ embere wʼoluholo luwe.

²Neryo mwabũga ati, Omwami Mukulu mwalũa eSĩnaĩ, Mwatsindukirabo akalũa eSeĩrĩ, Mwakangabasanĩa erĩlũa oko Kitwa kyʼeParanĩ, Mwalũa ahali amaelfu makũmĩ wʼababũyĩrĩre. Oko byala biwe byʼamali habya ekyakakala kĩkakolerya busana nabo.

³Ega, anzĩre ebihanda; Ababũyĩrĩre buwe bosĩ bali omo byala byawe. Mobakwama omo bisando byawe; Abosĩ bakangirira oko bĩnywa byawe.

⁴Musa mwatuhana, omo mugambo, Enzĩgalya busana nʼendeko ya Yakobo.

⁵Naye abya mwami wʼeYesũrũnĩ, Omugulu abakulu bʼabandu bahĩndanĩbawa, Ebihanda byosĩ bya Ĩsraelĩ haguma.

⁶Rũbenĩ abyeho, siahole; Kutse abalume buwe Sibabye bake.

⁷Nʼebĩ busana na Yũda; ati, Wowe uwe, Mwami Mukulu, omulenge wa Yũda, Umulete omo bandu buwe. Mwalwirabo omo byala biwe; Kandi ubye mũwatĩkya eribambira esyonzĩgũ siwe.

⁸Na busana na Lawĩ mwabũga ati, Tũmĩmũ yawe na Ũrĩmũ yawe bibye nʼomundu wawe oyukakenga Nyamuhanga, Oyo walengako eMasa, Oyo wanegena naye oko magetsi wʼeMerĩba;

⁹Oyo wabũga busana nʼĩse wuwe na nyĩnya wuwe, ati mondaganĩryabo; Kutse mwatakenga bagala babo, Kutse mwatasamalira bagala buwe. Kusangwa babirikwamirira ekĩnywa kyawe, Mobateya endagano yawe.

¹⁰Basyakangĩrĩrya Yakobo yʼebilayiro byawe, Basyakangĩrĩrya Ĩsraelĩ yʼemigambo yawe. Basyakũkũmbĩrya obukwa, Nʼobuhere bwʼerĩokererya bosĩ oko kiherero kyawe.

¹¹Uwe Mwami Mukulu, utsumule obũsokĩ buwe, Ũlĩge omũbĩrĩ wʼebyala biwe. Ũbũne esyombindi syʼabandu abakakangama erilwa naye, Nʼabakamũkwa obusu, ibataswahangana.

¹²Busana na Benyamĩna mwabũga ati, Omwanze wʼOmwami Mukulu ĩkale naye buholo; Akamulembera omo musibo gosĩ, Kandi akĩkala omo katĩkatĩ kʼebitigo biwe.

¹³Busana na Yosefũ mwabũga ati, Omwami Mukulu atsumule ekihugo kiwe, Busana nʼebindu bibuya ebikayisogawa byʼelubula, busana nʼekimi, Na busana nʼemirindi eyikabundama eyĩkwa,

¹⁴Na busana nʼebindu bibuya ebikayisogawa byʼeryuba, Na busana nʼebindu bibuya, ebyalya byʼebirimo,

¹⁵Na busana nʼebindu bibuya byʼebitwa bya kera, Na busana nʼebindu byʼobũgũlĩ bunene byʼebitwa bya kera-kera,

¹⁶Na busana nʼebindu bibuya kye kitaka nʼerĩũsũla lyakyo, Nʼobwenge bʼoyo wĩkere omo kisuki. Bĩhĩke oko mutwe wa Yosefũ, Nʼoko kahũlĩ-hũlĩ kʼomutwe wʼoyo wasololawa oko bagala babo.

¹⁷Ngʼakambere kʼende yiwe, ekĩkengenĩe ni kiwe; Nʼamahembe wuwe ni mahembe wʼenganda. Asyakũna mugo mwʼebihanda, erĩhĩka oko ndũlĩ syʼekihugo. Nabo ni maelfu makũmĩ wa Efũraĩmũ, Kandi ni maelfu wa Manase.

¹⁸Na busana na Zebũlũnĩ mwabũga ati, Zebũlũnĩ, utseme, omwʼihuluka lyawe; Na Ĩsakarĩ, omo syohema syawe.

¹⁹Basyabirikira ebihanda oko kitwa; Eyo, basyahonga amahere wʼeritunganene. Kusangwa basyalũsya ebingi byʼesyongetsi, Nʼebindu byʼomusege ebĩbĩsamĩre.

²⁰Na busana na Gadĩ mwabũga ati, Omũyĩsa abye nʼoyũkakanyĩrĩraya Gadĩ; Akagotsera ahisi ngʼendale yʼobũkalĩ, Akasatangaya okuboko, ega, nʼakahũlĩ-hũlĩ kʼomutwe.

²¹Neryo mwayisombolera erĩgabo lyʼerĩmbere, Kusangwa eyoyo yabikawa erĩgabo lyʼomũtabalĩ; Kandi mwasa nʼabasondolĩ bʼabandu; Mwaberererya erĩbanza lʼOmwami Mukulu, Nʼebilayiro biwe uku Ĩsraelĩ.

²²Na busana na Danĩ mwabũga ati, Danĩ ni kyana kyʼendale, Ekĩkatwa ekyika erĩlũa eBasanĩ.

²³Na busana na Nafũtalĩ mwabũga ati, Uwe Nafũtalĩ, ũgũtĩre nʼobutaga, Nʼerĩũsũla nʼomũyĩsa wʼOmwami Mukulu, Ũsĩgalaye engetsi nʼekyʼelutambi lwʼeyĩkwa.

²⁴Na busana na Aserĩ mwabũga ati, Aserĩ awite omũyĩsa kwilaba bagala; Aganyirawe nʼabagala babo, Kandi atoberaye ekisando kiwe kyʼomo magũta.

²⁵Esyongomo syawe syasyabya syʼebyuma nʼemiringa; Kandi ebiro byawe ko bingana, akagala kawe ko kasyabya katya.

²⁶Sihali oyulingene na Nyamuhanga wʼeYesũrũnĩ, Oyukagendera oko matũkũ erĩkũwatĩkya, Akalaba omo kyanya omo bukulu buwe.

²⁷Nyamuhanga Wʼerikota yo bwĩkalo bwawe, Nʼamaboko Wʼerikota akakuwatirira. Kandi mwahiga enzĩgũ yʼeyĩhya embere syawe, Kandi mwabũga ati, Togotaya.

²⁸Neryo Ĩsraelĩ ĩkere buholo, Nʼekitehero kya Yakobo ĩyowene, Omo kihugo kyʼengano nʼebĩnyũ bihya-bihya; Ega, amatũkũ wuwe akabũkaya ekimi.

²⁹Uwe Ĩsraelĩ, Ũyĩsyandire. Nindi oyuli nga we, ekihanda Omwami Mukulu alamaya, Oyuli ngabo yʼerĩwatĩkya lyawe, Nʼomũyalĩ wʼobũsĩnge bwawe! Nʼesyonzĩgũ syawe syasyakwanira; Nawe wasyalyatangirira emyanya yabo yʼendata.