Read nande Eryibuka Ebihano 4 Bible Online

Eryibuka Ebihano 4 - nande bible

Eryibuka Ebihano 4

¹Na lino, uwe Ĩsraelĩ, uhulikirire emigambo, nʼebilayiro, ebyo ngabakangĩrĩraya erikolabyo; imwabyaho, nʼeriingira nʼerĩsĩgalya ekihugo ekyo Mwami Mukulu Nyamuhanga wʼabotata-kulu wenyũ, akabaha.

²Simusyatomeka oko kĩnywa ekyo ngabahana, kutse sĩmũsyakehayakyo, imwatoka erĩteya ebihano byʼOmwami Mukulu Nyamuhanga wenyũ ebyo ngabahana.

³Ameso wenyũ abiriyilangirira ekyo Mwami Mukulu akola erĩmbere eBalĩ-Peorĩ; kusangwa abalume bosĩ abakwama Balĩ-Peorĩ, Omwami Mukulu Nyamuhanga wawe abĩrĩtogotyabo omo katĩkatĩ kenyũ.

⁴Nĩkwa Ĩnywe mwamakirira oko Mwami Mukulu Nyamuhanga wenyũ mukineho mũnabwĩre, Ĩnywe bosĩ.

⁵Lebaya, nabĩrĩbakangĩrĩrya emigambo nʼeritswera, ngoko Mwami Mukulu Nyamuhanga wage anyihana, imwatoka erikola mutya omo kihugo ekyo mukayamo erĩsĩgalyakyo.

⁶Neryo mũtegaye nʼerikolabyo; kusangwa aya ni menge wenyũ nʼeriminya lyenyũ omo meso wʼebihanda, abasyowa emigambo yosĩ eyĩ, bati, Kwenene ekihanda ekĩ ni bandu bʼamenge nʼeriminya.

⁷Kusangwa ekihanda kinene ni kyahi ekiwite nyamuhanga hakũhĩ nakyo kitya, ngoko Mwami Mukulu Nyamuhanga wenyũ ali omugulu tukamubirikira kwehĩ?

⁸Kutse ekihanda kinene ni kyahi ekiwite emigambo nʼeritswera ebitunganene ngʼemigambo yosĩ eyĩ, eyo ngahĩra emuliro wenyũ mũnabwĩre kwehĩ?

⁹Ekiguma kisa Ũyĩtegaye, Ũtegaye ndeke ekĩrĩmũ kyawe, ukasyibirirwa emyatsi eyo ameso wawe alangira, ĩkasyalũa omo mutima wawe ebiro byosĩ byʼengebe yawe; nĩkwa ũmĩnyĩsayeyo abana bawe, nʼabitsikulu bawe.

¹⁰Wibuke ekiro wahangana embere syʼOmwami Mukulu Nyamuhanga wawe eHorebũ, omugulu Omwami Mukulu abũga nage ati, Ũnyĩhĩndanĩraye abandu, nage inatoka erĩowĩsyabo ebĩnywa byage, ibatoka eriiga erinyubaha ebiro byosĩ bakabyaho muna-kihugo, kandi babane erĩkangĩrĩrya abana babo.

¹¹Nenyũ momwasegera hakũhĩ nʼeryimana eyĩkwa oko kitwa; nʼekitwa mokyaka mʼomuliro erĩhĩka omo katĩ kʼolubula, haguma nʼomwĩrĩmya, nʼebĩtũ, nʼomũhĩndanĩa.

¹²Kandi Omwami Mukulu mwabũga nenyũ omo katĩkatĩ kʼomuliro; momwowa omulenge wʼebĩnywa, nĩkwa momutalangira omubiri, go nʼomulenge musa.

¹³Naye mwabatũlĩra endagano yiwe eyo abahana erikolayo, bye nʼebihano ĩkũmĩ; kandi mwasakago oko bisayi bibiri byʼamabwe.

¹⁴Kandi Omwami Mukulu mwanyihana oko mugulu oyo erĩbakangĩrĩrya emigambo nʼeritswera, imwabana erikolabyo omo kihugo ekyo mukasokeramo erĩsĩgalyakyo.

¹⁵Neryo mũyĩtegaye ndeke; kusangwa momutalangira omũsĩndo wahi wʼomubiri ekiro ekyo Mwami Mukulu abũgĩra nenyũ eHorebũ omo katĩkatĩ kʼomuliro;

¹⁶mũkasyayĩtsandya nʼeriyiyirira esyosanamu esĩbatsĩre ngʼomubiri wʼekindu kyahi, ekĩsosekanĩo kyʼobulume kutse kyʼobũkalĩ,

¹⁷ekĩsosekanĩo kyʼenyama yahi eyiri muna-kihugo, ekĩsosekanĩo kyʼenyonyũ yahi eyiwite ebĩpũpa, eyikaguluka omo kyanya,

¹⁸ekĩsosekanĩo kyʼekindu kyahi ekikakululuka oko kitaka, ekĩsosekanĩo kyʼamahere wahi awali omo magetsi omo kihugo.

¹⁹Kandi mukasyalalamira obũtũkũ, kandi omugulu mukalangira eryuba nʼomukera nʼesyongũnũnũ, esyonzige syosĩ syʼekyanya, ukatwalawa erĩramyabyo, nʼerikolerabyo, ebyo Mwami Mukulu abirigabira bandu bosĩ eyĩkwa wʼobũtũkũ.

²⁰Nĩkwa Omwami Mukulu abĩribĩmya, nʼerĩbalũsya omwʼĩsĩngo ĩnene lyʼebyuma, erĩlũa eMĩsĩrĩ, eribayira mo bandu bʼenzĩgalya yiwe, ngoko kiri mũnabwĩre.

²¹Kandi Omwami Mukulu mwanyihitanako busana nenyũ, kandi mwalahĩrya ati sinangasoka eYorodanĩ, kandi sinangingira omo kihugo kyowene ekyo, ekyo Mwami Mukulu Nyamuhanga wenyũ akabaha eribya mwandu.

²²Kusangwa nasyaholera omo kihugo ekĩ, sinangasoka eYorodanĩ; nĩkwa Ĩnywe mwasyasoka nʼerĩsĩgalya ekihugo kibuya kino.

²³Mũyĩtegaye, mukasyibirirwa endagano yʼOmwami Mukulu Nyamuhanga wenyũ, eyo alagana nenyũ, mukayikolera esyosanamu esĩbatsĩre omo mubiri wʼekĩndũkĩ ekyo Mwami Mukulu Nyamuhanga wenyũ abaganaya omo kihano kiwe.

²⁴Kusangwa Omwami Mukulu Nyamuhanga wenyũ, ni muliro owakatogotaya, Nyamuhanga wʼobũha.

²⁵Omugulu mwasyabuta abana nʼabitsikulu, imwamabibuga ebiro binene omo kihugo ekyo, ĩmũkayĩtsandaya, nʼeriyikolera esyosanamu sĩbatsĩre ngʼomubiri wʼekĩndũkĩ, mukakola ebibi omo meso wʼOmwami Mukulu Nyamuhanga wenyũ, erĩmũhĩtanĩa;

²⁶ngabirikira olubula nʼekihugo eribya mũlangĩrĩ mũnabwĩre, mukandisyahera kwenene lũba omo kihugo ekyo mukasokerako, eYorodanĩ erĩsĩgalyakyo. Simwendĩsyakanyĩrĩrya ebiro byenyũ mukyo, nĩkwa mwasyahwerekererĩbwa kutsibu.

²⁷Kandi Omwami Mukulu asyabapanza-panzira omo katĩkatĩ kʼebihanda, mwasyasĩgala mo bake omwʼiganza lyenyũ omo bihanda, eyo Mwami Mukulu asyabahigira.

²⁸Mwasyakolerayo esyonyamuhanga, omũbĩrĩ wʼebyala byʼabandu, esyʼemiti, nʼamabwe, esitelangira, kutse erĩowa, kutse erirya, kutse erikumbirwa.

²⁹Nĩkwa eyo mwasyasonda-sonda Omwami Mukulu Nyamuhanga wenyũ, kandi mwasyamubana, omugulu mwasyamusonda-sonda nʼomutima wenyũ gosĩ nʼekĩrĩmũ kyenyũ kyosĩ.

³⁰Omugulu muli omo maligo, nʼemyatsi yosĩ eyo ĩyamabĩbahĩkĩra, omo biro byʼenyũma mwasyasubira Omwami Mukulu Nyamuhanga wenyũ, nʼerihulikirira omulenge wuwe.

³¹Kusangwa Omwami Mukulu Nyamuhanga wenyũ ni Nyamuhanga wʼeriganyira; siendisyakuleka, kutse erĩkũherya, kutse eribirirwa endagano yʼabotata-kulu wawe eyo alahĩrĩrayabo.

³²Kusangwa mũbũlaye lino busana nʼebiro ebyabirilaba, ebyabya embere syawe, erĩtsũka ekiro ekyo Nyamuhanga ahangika omundu muna-kihugo, mũbũlaye oko ndũlĩ nguma yʼelubula erĩhĩka oko yindi. Habirikolwa omwatsi munene ngʼoyũ kwʼali, kutse kwanowĩrwe ekĩsosĩrego, kwehĩ?

³³Ko hali bandu abakowa omulenge wa Nyamuhanga na kera akabũgĩra omo katĩkatĩ kʼomuliro, ngoko mwabĩrĩowago, ibabyaho kwehĩ?

³⁴Kutse hali nyamuhanga oyo wabirirenga erĩyĩmĩrya ekihanda omo katĩkatĩ kʼekindi kihanda, omo malĩge, nʼomo biminyikalo, nʼomo byʼeriswekera, nʼomo malwa, nʼomo byala byʼamaka, nʼomo kuboko kũyĩsũmbĩre, kandi omo byʼerĩũbahya binene, ngʼebyosĩ ebyo Mwami Mukulu Nyamuhanga wenyũ abakolera omo Mĩsĩrĩ embere syʼameso wenyũ kwehĩ?

³⁵Ĩnywe mwakangĩbawa ebyo, mutoke eriminya Omwami Mukulu kwʼali Nyamuhanga; sihali gundi nina ye.

³⁶Erĩlũa elubula mwabowĩsya omulenge wuwe, iniatoka eribakunga; kandi omo kihugo mwaleka imwalangira omuliro wuwe munene; kandi momowa ebĩnywa biwe bĩkalũa omo katĩkatĩ kʼomuliro.

³⁷Kandi kusangwa anza abotata-kulu benyũ kyaleka iniayisoga abana babo enyũma wabo. Kandi mwabalũsya eMĩsĩrĩ, omo bũtokĩ buwe bunene;

³⁸erihiga ebihanda binene nʼebyʼamaka kwilaba we, embere syawe, erĩkwĩngĩrya, nʼerikũha ekihugo kyabo mo mwandu, ngoko kiri mũnabwĩre.

³⁹Neryo muminye ekĩ kyo mũnabwĩre, mũhĩrekyo oko mutima wenyũ, Omwami Mukulu kwʼali Nyamuhanga omo lubula endata nʼomo kihugo eyĩkwa; sihali gundi.

⁴⁰Neryo mwasyateya emigambo yiwe, nʼebihano biwe, ebyo ngabaha mũnabwĩre, imwabana ebibuya, Ĩnywe nʼabana benyũ enyũma, kandi imwatoka erĩkanyĩsya ebiro byenyũ omo kihugo, ekyo Mwami Mukulu Nyamuhanga wenyũ akabaha, busana nʼemigulu yosĩ.

⁴¹Neryo Musa mwahigula emĩyĩ ĩsatu eyisirya wʼeYorodanĩ eluhande lwʼeyo eryuba likasira;

⁴²neryo oyũkĩta omundu iniabana erisagirako, oyũkĩta mũlĩkyabo erĩbũlĩkĩra, ĩsĩamũkwĩre obusu erĩmbere; akasagira oko muguma wʼemĩyĩ eyĩ iniatoka eribyaho,

⁴³eBezerĩ omo mbwarara, ebwerere, busana nʼAbarũbenĩ; na Ramotĩ eGĩleadĩ, busana nʼAbagadĩ; na Golanĩ eBasanĩ, busana nʼAbamanase.

⁴⁴Kandi oyũ go mugambo ogo Musa ahĩra embere syʼabagala ba Ĩsraelĩ.

⁴⁵Erĩ nĩ ʼtũlago, nʼemigambo, nʼebilayiro ebyo Musa abwira abana ba Ĩsraelĩ, omugulu balũa eMĩsĩrĩ,

⁴⁶eyisirya wʼeYorodanĩ, omo musya owalolĩre eBetĩ-Peorĩ, omo kihugo kya Sĩhonĩ omwami wʼAbaamorĩ, oyo wabya wĩkere eHesĩbonĩ, oyo Musa nʼabana ba Ĩsraelĩ bakĩnda omugulu balũa eMĩsĩrĩ.

⁴⁷Kandi mobĩmya ekihugo kiwe mo nzĩgalya yabo nʼekihugo kya Ogĩ omwami wʼeBasanĩ, abami babiri bʼAbaamorĩ, ababya eyisirya wʼeYorodanĩ erilola ebwanga bwʼeyo eryuba likasira;

⁴⁸erĩtsũka eAroerĩ, owali oko mũsĩke wʼomusya wʼeArnonĩ, erĩhĩka oko kitwa kyʼeSĩonĩ, ye Hermonĩ,

⁴⁹nʼeAraba hosĩ eyisirya wʼeYorodanĩ erilola endata, erĩhĩka oko ngetsi yʼeAraba, eyĩkwa oko mandagala wʼePĩsĩga.