Read nande Eryibuka Ebihano 8 Bible Online

Eryibuka Ebihano 8 - nande bible

Eryibuka Ebihano 8

¹Erihana lyosĩ eryo ngabahana mũnabwĩre mwasyateya erikolalyo, imwabana eribyaho, nʼerikanya, nʼeriingira nʼerĩsĩgalya ekihugo ekyo Mwami Mukulu alahĩrĩraya abotata-kulu benyũ.

²Kandi mwasyibuka enzira yosĩ eyo Mwami Mukulu Nyamuhanga wenyũ abasondolamo emyaka yosĩ eyo amakũmĩ ani omo mbwarara, iniatoka erĩbakehya, nʼeribalengako, eriminya ekyabya omo mutima wenyũ, nga mwasyateya ebihano biwe kutse iyihi.

³Kandi mwabakehya, kandi mwabĩta enzala, kandi mwabalĩsya amana, ago mutabya mwasĩ, kutse abotata-kulu wenyũ batabya basĩ; neryo iniatoka erĩbamĩnyĩsya omundu kwʼatekota busana nʼobundu busa, nĩkwa omundu akakota busana nʼobuli kĩnywa ekĩkalũa omo buno bwʼomwami Mukulu.

⁴Oko myaka makũmĩ ani esyongimba syenyũ mositakulira oko mibiri yenyũ, kutse ebisando byenyũ mobĩtabĩmba-bĩmba.

⁵Kandi mwasyaganĩrya omo mitima yenyũ, muti, ngoko mundu akakunga mugala wuwe, Omwami Mukulu Nyamuhanga wawe kwʼakabakunga atya.

⁶Neryo, mwasyabika ebihano byʼOmwami Mukulu Nyamuhanga wawe, nʼerigendera omo syonzira siwe, nʼerimubaha.

⁷Kusangwa Omwami Mukulu Nyamuhanga wenyũ akabaleta omo kihugo kibuya, ekihugo kyʼesyonyũsĩ, ekyʼesĩsoko, nʼesyongũnũnũko, esikasenda omo misya nʼomo bitwa;

⁸ekihugo kyʼengano nʼekisusu, nʼemĩrĩkĩ yʼebĩnyũ nʼemiti yʼemĩtĩnĩ nʼemikomamanga; ekihugo kyʼemiti yʼemĩzeĩtũnĩ, nʼobuki;

⁹ekihugo aho mwasyalya obundu obutebula, simwendisyabula kindu mukyo; ekihugo ekyo amabwe wakyo ni byuma, nʼomo bitwa byakyo mwasyatakula mwʼemiringa.

¹⁰Omugulu mwamabirya ĩmũgũta, kandi mwasyapipa Omwami Mukulu Nyamuhanga wenyũ busana nʼekihugo kibuya ekyo abiribaha.

¹¹Mũyĩtegaye mukasyibirirwa Omwami Mukulu Nyamuhanga wawe, eritindabika ebihano biwe, nʼebilayiro biwe, nʼemigambo yiwe, ebyo ngabahana mũnabwĩre.

¹²Neryo mwamabirya mũkũgũta, kandi mwamabĩhĩmba amanyũmba mabuya, nʼerĩĩkala mugo,

¹³kandi omugulu ebihangulo byenyũ nʼebĩhyo byenyũ byamabikanya, nʼebĩtsĩpa byenyũ nʼesyamagetsi syenyũ byamabikanya, nʼebyosĩ ebyo muwite byamabikanya;

¹⁴omutima wenyũ akasyayĩhamaya, kandi imwibirirwa Omwami Mukulu Nyamuhanga wawe, oyo wabalũsaya omo kihugo kyʼeMĩsĩrĩ, omo nyũmba yʼobukobe.

¹⁵Oyo wabasondola omo mbwarara nene nʼeyĩtĩre obuba, omuli esyonzoka syʼomuliro nʼesyonge, nʼekitaka ekĩkwĩre enyota ekite mo magetsi; oyo wababanira amagetsi gʼomwʼĩbwe erĩkalĩre po-po-po.

¹⁶Oyo wabalĩsaya amana gʼomo mbwarara, ago abotata-kulu wenyũ batabya basĩ; iniatoka erĩbakehya, kandi iniatoka eribalengako, eribakola ndeke oko mũheryo wawe.

¹⁷Mũkasyabũga omo mutima wenyũ muti, Akagala nʼeritoka lyʼebyala byage byabirinyibanira obuteke obũ.

¹⁸Nĩkwa mwasyibuka Omwami Mukulu Nyamuhanga wawe kusangwa iye yukabaha amaka wʼeribana obuteke; iniabana erihanda endagano yiwe eyo alahĩrĩraya abotata-kulu wenyũ, nga mũnabwĩre.

¹⁹Neryo mwasyabya mwamibirirwa Omwami Mukulu Nyamuhanga we nyũ, imukakwama esindi nyamuhanga, nʼeriyikolerasyo, nʼerĩramyasyo, ngabowĩsaya mũnabwĩre ko mwasyaherĩbwa kũndũ.

²⁰Ngʼebihanda ebyo Mwami Mukulu akaheraya embere syenyũ, nenyũ ko mwasyahera mutya; kusangwa momutasonda erihulikirira omulenge wʼOmwami Mukulu Nyamuhanga wenyũ.