Read nande Eryibuka Ebihano 9 Bible Online

Eryibuka Ebihano 9 - nande bible

Eryibuka Ebihano 9

¹Wowe, uwe Israelĩ! Ukandisoka eYorodanĩ yo mũnabwĩre, eriingira nʼerisingula ebihanda binene nʼebyʼamaka kwilaba we, emĩyĩ minene eyĩkangatĩre erĩhĩka omo kyanya,

²abandu banenebanene nʼabali-bali, ba bagala ba Anakĩ, abo wasĩ, nʼabo mũkowa engulu yabo bati, Nindi wangatoka erihangana embere syʼabagala ba Anakĩ kwehĩ?

³Neryo muminye mũnabwĩre, Omwami Mukulu Nyamuhanga wenyũ ni ye yukasoka embere syenyũ ngʼomuliro owakagulumira. Asyaheryabo, kandi asyakĩndabo embere syenyũ; nenyũ measyahigabo nʼerĩheryabo lũba, ngoko Mwami Mukulu abĩrĩbũga nenyũ.

⁴Sĩmũbũge omo mutima wenyũ, Omwami Mukulu abihigabo embere syenyũ, muti, Omwami Mukulu abirinyireta erĩsĩgalya ekihugo ekĩ omo litunganene ryage; nĩkwa ni busana nʼebibi byʼebihanda ebĩ Omwami Mukulu akasingulabyo embere syenyũ.

⁵Si busana nʼeritunganene lyenyũ, kutse busana nʼerĩhĩkana lyʼomutima wenyũ, ukingira erĩsĩgalya ekihugo kyabo; nĩkwa busana nʼebibi byʼebihanda ebĩ, Omwami Mukulu akahigabyo embere syenyũ, iniatoka erĩsĩkya erĩlahĩrya eryo Mwami Mukulu alahĩrĩraya abotata-kulu wenyũ, Abrahamũ, na Ĩsaka, na Yakobo.

⁶Neryo muminye, Omwami Mukulu, Nyamuhanga wawe, kwʼatebaha ekihugo kibuya ekĩ erĩsĩgalyakyo busana nʼeritunganene ryenyũ; kusangwa muli kihanda kyʼengoto eyitegonda.

⁷Mwibuke, simwibirirawe, ngoko mwagalĩranaya Omwami Mukulu Nyamuhanga wenyũ erihitana omo mbwarara; erĩtsũka ekiro mwalũa omo kihugo kyʼeMĩsĩrĩ, aho mũkahĩkĩra hano, mwabiriyisamambula oko Mwami Mukulu.

⁸Nibya eHorebũ momwagalĩranĩa Omwami Mukulu, kandi Omwami Mukulu mwabahitanako, kyaleka iniasonda erĩbaherya.

⁹Omugulu nahetukira oko kitwa eriyahabwa ebisayi byʼamabwe, bye bisayi byʼendagano eyo Mwami Mukulu alagana nenyũ, oko mugulu oyo, monasiba oko kitwa emisibo makũmĩ ani nʼebiro makũmĩ ani; mondalya kalyo kutse erĩpũlya amagetsi.

¹⁰Kandi Omwami Mukulu mwamba ebisayi bibiri byʼamabwe ebĩsakĩrweko omo munwe wa Nyamuhanga; kandi kwabya ebĩnywa byosĩ ebyo Mwami Mukulu ababwira oko kitwa omo katĩkatĩ kʼomuliro oko kiro kyʼerĩhĩndana.

¹¹Neryo oko ndũlĩ yʼemisibo makũmĩ ani nʼebiro makũmĩ ani, Omwami Mukulu mwamba ebisayi bibiri byʼamabwe, bye bisayi byʼendagano.

¹²Neryo Omwami Mukulu mwambwira ati, Hangana, Ũlũe hano ũkĩme lũba; kusangwa abandu bawe abo walũsaya eMĩsĩrĩ bamayĩtsandya. Babiribinduka lũba omo nzira eyo nahanabo; babiriyihesera esanamu eyĩnũnĩrye.

¹³Kandi Omwami Mukulu mwambwira ati, Nabirilangira abandu aba ko ni bandu bʼengoto itegonda.

¹⁴Undeke, inatoka erĩheryabo, nʼerĩrĩmya erĩna lyabo eyĩkwa oko bũtũkũ; nawe nasyakuyira mo kihanda kyʼamaka nʼekinene kwilababo.

¹⁵Neryo monabũnũkala monakĩma oko kitwa, omugulu ekitwa kikaka mʼomuliro; nʼebisayi bibiri byʼendagano mobyabya omo byala byage bibiri.

¹⁶Neryo monasamalira, kwenene, ĩmwamabĩhalya oko Mwami Mukulu Nyamuhanga wenyũ. Imwamabiyikolera ekyana kyʼende ekĩnũnĩrye ĩmwabĩrĩlũa omo nzira mo lũba eyo Mwami Mukulu abahana.

¹⁷Nage monahamba ebisayi bibiri ebyo monagusabyo bĩkalũa omo byala byage bibiri, monatulangirabyo embere syʼameso wenyũ.

¹⁸Kandi monawa ahisi embere syʼOmwami Mukulu ngʼerĩmbere omo biro makũmĩ ani nʼemisibo makũmĩ ani; mondalya kalyo kutse erĩpũlya magetsi; busana nʼebibi byenyũ byosĩ ebyo mwahalayamo, imukakola ebibi omo meso wʼOmwami Mukulu, erĩmwagalĩranĩa.

¹⁹Kusangwa monubaha erihitana nʼeriagalirwa erikagulumira, ebyahĩtanaya Omwami Mukulu akasonda erĩbaherya. Nĩkwa Omwami Mukulu mwambulikirira omugulu oyo nibya.

²⁰Kandi Omwami Mukulu mwahitana uku Harũnĩ ko kutsibu, mwasonda erĩmũherya; nage monasabira Harũnĩ oko mugulu oyo.

²¹Nage monĩmya ekindu kibi kyenyũ, ekyana kyʼende ekyo, monahĩsyakyo omo muliro, kandi monakyisekula eriswakyo, nʼeriswakyo mo hike-hike erĩhĩka aho kyanogera ngʼolũtũtũ; kandi monagusa olũtũtũ lwakyo lʼomo kũsĩ akakasenda kakalũa omo kitwa.

²²Kandi eTabera, nʼeMasa, nʼeKĩbrotĩ-hatawa, momwagalĩranĩa Omwami Mukulu.

²³Nʼomugulu Omwami Mukulu abatuma eKadesĩ-Barnea, ati, Muhetuke mũsĩgalaye ekihugo ekyo nabiribaha; neryo momwapona ebihano byʼOmwami Mukulu Nyamuhanga wenyũ; kandi momũtetamwĩkĩrĩrya, kutse erihulikirira omulenge wuwe.

²⁴Mwabirihona oko Mwami Mukulu erĩtsũka ekiro nabaminya.

²⁵Litya monawa ahisi embere syʼOmwami Mukulu ebiro makũmĩ ani nʼemisibo makũmĩ ani, kusangwa Omwami Mukulu abya ĩnĩabĩrĩbũga ati, Angabaherya.

²⁶Nage monasaba Omwami Mukulu, nyiti, Uwe Mwami Nyamuhanga, sũheraye abandu bawe, bo mwandu wawe, abo wabĩrĩtongolya omo bukulu bwawe, abo wabĩrĩlũsya eMĩsĩrĩ omo byala byʼamaka.

²⁷Wibuke abagombe bawe, Abrahamũ, Ĩsaka, na Yakobo; sulangire oko butsibu bwʼabandu aba, kutse ebibi byabo, kutse amalolo wabo.

²⁸Ekihugo ekyo walũsaya bomo kyasyabũga kiti, Kusangwa Omwami Mukulu mwataluka eriretabo omo kihugo ekyo alagabo, kandi kusangwa akwabo busu, abiriretabo omo mbwarara erĩĩtabo.

²⁹Nĩkwa ibo ni bandu bawe, ni mwandu wawe, abo wabĩrĩlũsyayo omo maka wawe manene nʼomo kuboko kwawe okũyĩsũmbĩre.